1 ZÃ 5

1Nɩr za na saw de k'aa Yeezu ɩ n a Kɩrɩta a, ɩ n Naaŋmɩn bʋ̃-dɔwra. Ɛ sob nɛ za na nɔnɛ a dɔwrɛ a, mɩ̀ mɩ́ nɔnɛ nɩ a ʋ bʋ̃-dɔwra. 2A ŋa n'a tɩ mɩ́ bãw kɛ tɩ nɔnɛ nɩ a Naaŋmɩn bibiir: a lɛn daar tɩ na mɩ́ nɔnɛ a Naaŋmɩn ɛ sawr a ʋ nɛ-ƴãwnɩ a. 3A ŋa n'a a Naaŋmɩn nɔ̃wfʋ sɩrɩ ŋmɛ̃: kɛ́ tɩ sawr a ʋ nɛ-ƴãwnɩ. Ɛ a ʋ nɛ-ƴãwnɩ bɛ kpɛmɛ zuo ɩ, 4bʋ̃ʋ n'ʋ vɛ̃, Naaŋmɩn bʋ̃-dɔwra za tʋ̃ɔ nɩ a tẽ-daa, ɛ a tʋ̃ɔfʋ tɩ na tʋ̃ɔ a tẽ-daa a, n'ɩ a tɩ Naaŋmɩn-saw-deb. 5Ãa n'ʋ tʋ̃ɔ a tẽ-daa, a bɛ ɩ a sob nɛ na saw de k'aa Yeezu ɩ n a Naaŋmɩn Bie a? 6A Yeezu Kɩrɩta n'ʋ wa n a ʋ suob kʋ̃ɔ nɩ a ʋ kũu zɩ̃ɩ. A kʋ̃ɔ tɛwr bɛ n'a ʋ wa n ɛ, ʋ wa n nɩ a kʋ̃ɔ nɩ a zɩ̃ɩ. Ɛ a Vʋʋrʋ sõw n'ʋ dɩrɛ a dãsɩɛ kɛ sɩza n'a, a Vʋʋrʋ Sõw na ɩ a yel-mɩŋa a ƴãw. 7Dãsɩɛ dem ata nɛ bɛ: 8a Vʋʋrʋ Sõw, a kʋ̃ɔ nɩ a zɩ̃ɩ, ɛ bɛ za ata lãw nɩ taa dɩrɛ a dãsɩ-been. 9Tɩ mɩ́ saw nɩ a nɩsaalbɛ dãsɩɛ, a Naaŋmɩn dãsɩɛ ɩ n kpɛ̃ɛ zuo a nɩsaalbɛ dem. Ɛ a dãsɩɛ ŋa n'ʋ ʋ dɩ a ʋ Bie ƴãw. 10Sob nɛ na saw de a Naaŋmɩn Bie a, mɩ̀ tɛr ɩ a dãsɩɛ ŋa a ʋ pʋ̀ɔmɩ́. Ɛ cɛ sob nɛ na bɛ mɩ́ saw de a Naaŋmɩn a, mɩ́ de ʋ na bʋɔlɛ zir-ŋmarɛ, ʋ na bɛ saw de a Naaŋmɩn dãsɩɛ ʋ na dɩ a ʋ Bie ƴãw a. 11A dãsɩɛ ʋl n'ɩ ŋa: Naaŋmɩn kʋ̀ tɩ nɩ a nyɔ-vʋʋrʋ na be kʋra lɛ a, ɛ a nyɔ-vʋʋrʋ ŋa n'ʋ tɩ páw a ʋ Bie zie. 12Sob nɛ na tɛr a Bie a, tɛr ɩ a nyɔ-vʋʋrʋ ŋa, ɛ sob nɛ na bɛ tɛr a Naaŋmɩn Bie a, bɛ tɛr a nyɔ-vʋʋrʋ ɛ. 13Ɩ̃ sɛb nyɩ nɩ a a ŋa za kɛ́ nyɩ bãw kɛ nyɩ tɛr ɩ a nyɔ-vʋʋrʋ na be kʋra lɛ a, a nyɩɩm na saw de a Naaŋmɩn Bie a. 14Ɛ bom ŋa n'ʋ so tɩ mɩ́ bɛr tɩɛrʋ a Naaŋmɩn niŋé: tɩmɛ wa zɛlɛ bom a tu a ʋ pʋ-tɩɛrʋ a, ʋ mɩ́ bɛr a wõ a tɩ zɛlʋ. 15Ɛ tɩ na bãw k'ʋʋ mɩ́ bɛrɛ na wone tɩmɛ wa zɛlɛ bom a ʋ zie a, tɩ bãw na kɛ tɩ páw nɩ a bom nɛ tɩ na zɛlɩ a ʋ zie a. 16Nɩr wa nyɛ̃ a ʋ yɛb ʋ maalɛ yel-bier na bɛ kʋ́rɛ a, ʋ puore, ɛ Naaŋmɩn na kʋ̀ n nyɔ-vʋʋrʋ a ʋ yɛb, a yel-bier ʋl wa sɩrɩ bɛ kʋ́rɛ a. Ɛ cɛ, yel-bier kãw be n be kʋ́rɛ. A ʋl ƴãw bɛ n'a ɩ̃ yel kɛ nyɩ puore ɩ. 17Ɩ-faa za ɩ n yel-bier, ɛ cɛ yel-bier za bɛ kʋ́rɛ ɩ. 18Tɩ bãwnɩ a na kɛ Naaŋmɩn bʋ̃-dɔwra za bɛ maalɛ yel-bier ɛ, a Naaŋmɩn Bie gu ʋ na, ɛ a Faalʋ-sob kʋ̃ tʋ̃ɔ ɩ ʋ bom ɛ. 19Tɩ bãw na kɛ Naaŋmɩn so tɩ, ɛ a Faalʋ-sob so a tẽ-daa za. 20Tɩ bãw na kɛ a Naaŋmɩn Bie wa na, wa kʋ̀ tɩ a yã kɛ́ tɩ bãw a Naaŋmɩn-sɩza. Tɩ lãw nɩ nɩ a Naaŋmɩn-sɩza a ʋ Bie Yeezu Kɩrɩta ƴãw. Ʋlɛ n'ɩ a Naaŋmɩn-sɩza nɩ a nyɔ-vʋʋrʋ na be kʋra lɛ a. 21Ɩ̃ bibiir i, nyɩ gùre nyɩ tʋɔra a tɩbɛ ƴãw.

will be added

X\