1 KORƐ̃TƖ 6

1A nyɩ ƴẽn sob na mɩ́ wa tɛr ɩ a yɛb kãw ƴɛrʋ a, ŋmɩŋmɩn za n'a ʋ mɩ́ sʋ̃ɔmɩ bɛr a lãw nɩbɛ, ɛ cen tɩ ƴãw nɩbɛ na bɛ ɩ Kɩrɩta-nɩbɛ a, bɛ maalɛ nɩ bɛ a ƴɛrʋ? 2Nyɩ nɔ̃w bɛ bãw k'aa lãw nɩbɛ nɛ bɛ na maal ɩ a tẽ-daa a ƴɛrʋ bɩɩ? Ɛ nyɩmɛ wa nɛ bɛ na maal ɩ a tẽ-daa a ƴɛrʋ a, nyɩ ɩ n ŋmɩn bɛ sɛw taa nɩ na maalɩ a ƴɛrʋ a yel-pʋrmɛ̃ a ŋa ƴãw? 3Nyɩ bɛ bãw kɛ tɩ na maalɩ nɩ a malkɩ mɩnɛ a ƴɛrʋ bɩɩ? Ɛ́ bɛ nãa yere a tẽw ŋa zu nyɔ-vʋʋrʋ yele e! 4Ɛ cɛ nyɩ na mɩ́ wa tɛr a ƴɛrʋ-maalʋ a ŋa taabɛ a, bʋ̃ʋ ƴãw n'a nyɩ mɩ́ de nɩbɛ, a Lãw-yir na bɛ de a bɛ yele a, ƴãw bɛ ɩ a ƴɛr-maalbɛ? 5Ɩ̃ yere nɩ a a ŋa kɛ́ nyɩ nyɛ̃ vĩ. A ɩ lɛ, nɩsaal za bɛ bãw yã a sɛw a nyɩ pʋɔ na tʋ̃ɔ maalɩ a ƴɛrʋ a ʋ yɛbr cara pʋɔ ʋ? 6Ɛ̀ yɛb pãa mɩ́ tɛr ɩ yɛb ƴɛrʋ nɩbɛ na bɛ saw de Naaŋmɩn a niŋé! 7Alɛ saa ŋmɛ̃ ŋmɩŋmɩn a, nyɩ sãw na baarɩ, nyɩ na tɛr ɩ taa ƴɛrʋ a ƴãw. Bʋ̃ʋ n'ʋ so nyɩ nɩ̃ɛ bɛ sawr bɛ nɛbr nyɩ? Bʋ̃ʋ n'ʋ so nyɩ nɩ̃ɛ bɛ bɛrɛ bɛ farɛ a nyɩ bome za? 8Ɛ́ nyɩmɛ nɩ̃ɛ nɛ bɛ nɛbr a nyɩ taabɛ, ɛ farɛ a bɛ bome za, ɛ a nyɩ yɛbr nɛ bɛ nyɩ ɩrɛ a lɛ. 9Nyɩ nɔ̃w bɛ bãw k'aa bɛlɩ dem na nɛbr a bɛ taabɛ a, kʋ̃ kpɛ a Naaŋmɩn-Naalʋ pʋɔ ʋ? Nyɩ ta bɛlɛ nyɩ tʋɔra a ɩ! A pɩ̃ɔ-yel-maalbɛ, nɩ a bɛl na maalɛ a tɩbɛ a, a pɔw-gaa yel-bier-maalbɛ, nɩ a dɛ-bɛrɛ na gánɛ nɩ a dɛbli a, 10a nyãnyuwr, a bɛl na mɩ́ nyɛ̃ a bɛ tɔ bom a mimir zaalɛ a, a dã-kuolbɛ, a gɛgɛrɩ, lãw nɩ a bɛl na farɛ a bɛ taabɛ bome a, bɛ kʋ̃ kpɛ a Naaŋmɩn-Naalʋ pʋɔ ɩ. 11A ŋa n'a nyɩ mɩnɛ tɩ ŋmɛ̃. Ɛ cɛ bɛ so n a nyɩ dɛwr bɛr nyɩ, bɛ ɩ na nyɩ lɩɛbɩ nɩ-son nɩ nɩ-mɩn a Sore Yeezu Kɩrɩta yúor ƴãw nɩ a tɩ Naaŋmɩn Vʋʋrʋ Sõw ƴãw. 12Nyɩ mɩnɛ mɩ́ yel a: «Ɩ̃ tɛr ɩ sɔr na tʋ̃ɔ ɩ bom za», sɩza n'a, ɛ cɛ «bom za bɛ n'a maalɛ nyɩ ɛ.» Ɩ̃ na tʋ̃ɔ na yel: «Ɩ̃ tɛr ɩ sɔr na tʋ̃ɔ ɩ bom za», ɛ cɛ ɩ̃ kʋ̃ saw ɩ bom za gbãgbaa ɩ. 13Nyɩ mɩ̀ mɩ́ yel a: «Púor ƴãw n'a a bʋ̃-dɩrɩ be, ɛ bʋ̃-dɩrɩ ƴãw n'a a púor mɩ̀ be.» Ɛ Naaŋmɩn na sãw nɩ a bʋ̃-dɩrɩ bɛr, ɛ sãw a púor bɛr. Ɛ cɛ a ƴãgan bɛ be a pɩ̃ɔ-yele maalʋ ƴãw ɛ, a Sore ƴãw n'a ʋ be, ɛ a Sore mɩ̀ be a ƴãgan ƴãw. 14Ɛ a Naaŋmɩn na ɩ a Sore lɛb yi a kũu pʋɔ a, mɩ̀ na ɩ na tɩ lɛb yi a kũu pʋɔ nɩ a ʋ fãw. 15Nyɩ bɛ bãw kɛ a nyɩ ƴãgamɛ ɩ n a Kɩrɩta ƴãgan ɓɛrmɛ bɩɩ? Ɩ̃ na saw na de a Kɩrɩta ƴãgan ɓɛrmɛ ƴãw a lɩɛbɩ pɔw-yɛm ƴãgan ɓɛrmɛ̃ bɩɩ? Ʋ̃ʋ'hʋ̃! Towtow! 16Nyɩ bɛ bãw kɛ nɩr na gã nɩ a pɔw-yɛm a, ʋ lãw nɩ ʋ na bɛ ɩ ƴãw-been ɛ? Bʋ̃ʋ n'ʋ vɛ̃, bɛ yel ɩ a ŋa: «A bɛ za ayi na ɩ n nɩ-been.» 17Ɛ cɛ ʋlɩ sob na lãw nɩ a Sore a, ʋ lãw nɩ ʋ na bɛ ɩ vʋʋr-been. 18Nyɩ zɔrɛ dɛrɛ a pɩ̃ɔ-yele. Yel-bier kãw za nɩsaal na mɩ́ maalɩ a, bɛ ɓanɛ a ʋ ƴãgan ɛ, ɛ cɛ a pɩ̃ɔ-yel-bier-maalɛ a, a ʋ ƴãgan tɔr za n'ʋ ʋ mɩ́ maalɩ a yel-bier kʋ̀. 19Bɩɩ nyɩ taa bɛ bãw kɛ a nyɩ ƴãgan ɩ n a Vʋʋrʋ Sõw yir u? A Vʋʋrʋ Sõw na be a nyɩ pʋɔ ɛ yi Naaŋmɩn zie wa a? Nyɩ bɛ bãwnɩ a nyɩ na bɛ so nyɩ tʋɔra bɩɩ? 20Naaŋmɩn da nyɩ na nɩ libie na bɛ vʋʋr a. A na ɩ lɛ a, nyɩ íre a Naaŋmɩn yúor-vɩɛlʋ-danʋ nɩ a nyɩ ƴãgamɛ.

will be added

X\