1 KORƐ̃TƖ 2

1Yɛbr ɩ, a mãa mɩŋa na tɩ wa a nyɩ zie a, ƴɛr-bãw bɩɩ yã-bãw bɛ n'a ɩ̃ tɩ manɩ nɩ a Naaŋmɩn pʋ-tɩɛr-sɔwla kʋ̀ nyɩ ɛ. 2Bʋ̃ʋ n'ʋ vɛ̃, ɩ̃ tɩ yel a k'ɩ̃ɩ kʋ̃ bãw bom za a nyɩ sɔgɔ, a bɛ ɩ a Yeezu Kɩrɩta yõ ɩ, a Yeezu Kɩrɩta ŋa bɛ na kpa a da-gara zu a. 3Alɛ so ɩ̃ wa a nyɩ zie ɩ bãbaal, ɛ́ dɛ̃bɩ̃ɛ ɩ ɩ̃ mawr ɩ̃ za; 4a ɩ̃ ƴɛrʋ nɩ a ɩ̃ Yel-nʋ̃ɔ̀ hieru bɛ tɩ tu nɩsaal yã-bãwfʋ ƴɛr-bie k'ɩ̃ɩ ƴɛr tʋ̃ɔ nɩ nyɩ ɛ, a tɩ ɩ n wulu a Vʋʋrʋ Sõw na mɩ́ tɩ wul a sãá a, 5k'aa nyɩ saw-deb ta yi nɩsaalbɛ zie ɩ, ɛ yi a Naaŋmɩn kpɛnʋ zie. 6Yã-bãwfʋ ƴɛrʋ n'a tɩ sɩrɩ ƴɛrɛ a Kɩrɩta-nɩbɛ bɛl na bɩ nɩbɛ a bɛ Naaŋmɩn-saw-deb pʋɔ a sɔgɔ, yã-bãwfʋ na bɛ ɩ tẽw ŋa zu dem, bɛ lɛ ɩ tẽw ŋa zu na-mɩnɛ dem a n'ʋ, bɛl be n kũu ƴãw. 7Ɛ cɛ a yã-bãwfʋ ʋl tɩɩm na yere a, ʋ ɩ n Naaŋmɩn yã-bãwfʋ tɩ na kʋ̃ tʋ̃ɔ bãw tɔ a, ɛ ʋ sɔwlɩ gã a. A yã-bãwfʋ ʋl a Naaŋmɩn na tɩ dãw bãwnɩ tɩ cɔbrɩ a tɩ yúor-vɩɛlʋ-danʋ ƴãw, ɛ a dɩta-pɛ-yome za bɛ be sɛr a. 8A tẽw ŋa zu nãà kãw za bɛ tɩ bãw a yã-bãwfʋ ŋa ɩ. Bɛlɛ tɩ ɩ mɛ̃ bɛ bãw ʋ na a, bɛ kʋ̃ʋ tɩ kpa a yúor-vɩɛlʋ-danʋ za Sore a da-gara zu ɛ. 9Ɛ cɛ, mɛ̃ a lɛ bɛ na sɛb a: «Bom nɛ mimir na bɛ nyɛ̃ a, bom nɛ tobr na bɛ wõ a, bom nɛ a tɩɛrʋ na bɛ tɔ a nɩsaal a, ʋlɛ n'ʋ a Naaŋmɩn cɔbrɩ a bɛlɩ dem na nɔnɛ ʋ a ƴãw.» 10Tɩmɛ nɛ bɛ a Naaŋmɩn sɩrɩ ƴãw a Vʋʋrʋ Sõw wul a yel ŋa ʋ ɩ cãa. Bʋ̃ʋ n'ʋ vɛ̃, a Vʋʋrʋ n'ʋ jɛlɛ a yele za, mɩ́ tɩ lãw nɩ a Naaŋmɩn yel-sɔwlɩ za. 11A nɩsaalbɛ pʋɔ a, ãa n'ʋ pãa bãw bom nɛ na be a nɩsaal pʋ̃ɔmɩ́ a, a bɛ ɩ a nɩsaal tɩɛrʋ na be a nɩsaal pʋɔ a? Lɛ mɩ̀ n'a, bom nɛ na be a Naaŋmɩn pʋɔ a, nɩr za bɛ bãw ʋ a bɛ ɩ a Naaŋmɩn Vʋʋrʋ ɛ. 12Tɩɩm a, tɩ bɛ páw a tẽ-daa vʋʋrʋ ɛ, Vʋʋrʋ na yi Naaŋmɩn zie a n'ʋ tɩ páw, kɛ́ tɩ tʋ̃ɔ bãw a maalʋ a Naaŋmɩn na kʋ̀ tɩ a. 13Tɩ bɛ ƴɛrɛ a maalʋ a ŋa ƴɛrʋ nɩ nɩsaal yã-bãwfʋ ƴɛr-bie ɩ, tɩ ƴɛrɛ nɩ a ƴɛrʋ nɩ a Vʋʋrʋ yã-bãwfʋ, manɛ bom na ɩ vʋʋrʋ bom a, nɩ a Vʋʋrʋ ƴɛr-bie. 14A nɩsaal nɩ a ʋ nɩsaalʋ tɛwr kʋ̃ tʋ̃ɔ saw de a yel na yi Naaŋmɩn Vʋʋrʋ zie a ɩ. A yel ŋa mɩ́ ɩ n gẽgẽmi a ʋ zie ʋ kʋ̃ tʋ̃ɔ bãw ʋ ɛ, a Vʋʋrʋ Sõw yõ na n'ʋ mɩ́ ɩ bɛ bãw a pɛr a ƴãw. 15Ɛ cɛ nɩr na tɛr a Naaŋmɩn Vʋʋrʋ a, ʋ mɩ́ bãwnɛ nɩ yele za, ɛ́ nɩr za kʋ̃ tʋ̃ɔ bãw a ʋ yele ɩ. 16Bʋ̃ʋ n'ʋ vɛ̃, bɛ sɛb a kɛ: «Ãa n'ʋ bãw a Sore pʋ-tɩɛrʋ? Ãa n'ʋ na tʋ̃ɔ wul ʋ yã?» Ɛ tɩɩm a, tɩ tɛr ɩ a Kɩrɩta pʋ-tɩɛrʋ.

will be added

X\