1 KORƐ̃TƖ 13

1Mãa saa ɩ mɛ̃ ɩ̃ ƴɛrɛ nɩ a ƴɛr-bʋʋrɛ za a, a nɩsaalbɛ dem nɩ a malkɩ mɩnɛ dem a, ɛ mãa bɛ wa tɛr a nɔ̃wfʋ a, ɩ̃ ɩ na mɛ̃ kúre bɛ na ŋmɩɛr ʋ kone yire a, bom bɛ na ŋmɩɛr ʋ pàwr gɔmɛ̃ a. 2Mãa saa páw a Naaŋmɩn-ƴɛr-manɛ maalʋ, bãw a Naaŋmɩn yel-sɔwlɩ za, ɛ mɩ́ zànɩ bom za bãw a, mãa saa tɛr a Naaŋmɩn-saw-deb ʋ za, a ʋl na na tʋ̃ɔ ɓaw a tan tɩ bin zi-yoru a, mãa bɛ wa tɛr a nɔ̃wfʋ a, ɩ̃ bɛ ɩ bom za ɩ. 3Mãa saa de a ɩ̃ bʋ̃-tɛrɩ za põ kʋ̀ a kɔ̃ dem, mãa saa de a ɩ̃ ƴãgan ƴãw vũùmí a, mãa bɛ wa tɛr a nɔ̃wfʋ a, ɩ̃ bɛ páwr bom za a pʋɔ ɩ. 4A nɔ̃wfʋ tɛr ɩ su-nyɔwra, ʋ sõwne nɩ nɩbɛ, ɛ bɛ kpɛ nyuur ɛ, ʋ bɛ wule ʋ tʋɔra ɩ, ʋ bɛ ɩrɛ pɔ̀lʋ ɛ, 5ʋ bɛ ɩrɛ vĩ yele ɩ, bɛ bɔbr ʋl yõ tɔnɛ ɩ, ʋ bɛ nyɛrɛ suur ɛ, bɛ tɛr pʋ-bier ɛ, 6ʋ bɛ cɩlɛ a yel na bɛ tu sɔr a ƴãw ɛ, yel-mɩŋa ƴãw n'a ʋ mɩ́ cɩlɛ. 7A nɔ̃wfʋ mɩ́ de nɩ yel za bɛr a baarɩ, ʋ mɩ́ tɛr ɩ a Naaŋmɩn-saw-deb a yele za pʋɔ, lãw nɩ a tɩɛrʋ ʋ na ƴãw a Naaŋmɩn ƴãw a, ɛ mɩ́ nyɔw ʋ tʋɔra bom za ƴãw. 8A nɔ̃wfʋ bɛ tɛr nãà tɔl ɛ. A Naaŋmɩn-ƴɛr-manɛ tome na baar ɩ bibir kãw, a ƴɛr-bʋʋrɛ ƴɛrʋ na kpiir a, a bãwfʋ na baar a. 9Bʋ̃ʋ n'ʋ vɛ̃, a tɩ bãwfʋ ɩ n ŋmaarɛ ŋmaarɛ lɛ, ɛ a tɩ Naaŋmɩn-ƴɛr-manɛ tome tɛr tɛwfʋ zie. 10Ɛ cɛ a vɩɛlʋ za bio wa vɩɛ a, a al na vɩɛl cɛ ŋmãa a, na baar a. 11Ɩ̃ na tɩ ɩ bi-bile a, ɩ̃ tɩ ƴɛrɛ na mɛ̃ bi-bile a, ɩ̃ tɩ tɩɛrɛ na mɛ̃ bi-bile a, ɛ a ɩ̃ yã tɩ ɩ bibi-yã. Ɛ cɛ ɩ̃ na wa ɩ nɩ-kpɛ̃ɛ baar a, ɩ̃ bɛr ɩ a bi-bi-ɩb. 12Ƴɛrɛ ŋa a, caala pʋɔ n'a tɩ jɩrɛ mɩ́ nyɛ̃ a bom ʋ bɛ maal sãá ɩ, ɛ cɛ a nɩdaar a, tɩ na mɩ́ caar a nyɛ̃. A ƴɛrɛ ŋa a, a ɩ̃ bãwfʋ tɛr ɩ tɛwfʋ zie, nɩdaar a, ɩ̃ na bãw nɩ a Naaŋmɩn vla mɛ̃ a lɛ ʋ na bãw mɛ̃ a. 13A na ɩ a ŋa a, a ƴɛrɛ ŋa a, a Naaŋmɩn-saw-deb, a ƴãw a tɩɛrʋ a Naaŋmɩn ƴãw, nɩ a nɔ̃wfʋ be n be a za ata, ɛ cɛ a za ata pʋɔ a, a nɔ̃wfʋ n'ɩ a kpɛ̃ɛ.

will be added

X\