TIT 3

1Aŋ'á̱baŋinan kéeyilene ku kaanuku kawarawar kajamu ti keeemo ku t'éŋguur i fe. Kawariinwar kájeŋgin, abe ni kafare káhinu buroon beejake bu fe. 2Itim kasok t'an beejakut, itim yooŋ káyemi eloba, bare káyemi bakan kéeneenie, abe ni káwufoor ésuk i fe kunoŋk keejake. 3Ábuki hítiyar hu, úne yooŋ úbajut kikaw, újeŋginaariit an, abe úmoomi naane bakan keehiile. Úne yéeni búsukateen bite wúfaŋi weejakut wánowan, ni katoofu kánokan. Úkinaanakinaani ti bánafut ni bíhiñanoor. Uŋ'úhuuf bakaaku, ni kahuuf úne yooŋ. 4Bare Atambatun Afakana ite úne n'áwufoor úne kajaku koone, nu buŋ b'ámaŋie fu húŋgowulan ariike. 5N'afakan úne, káanukiiit man aŋarkeyi naane úne úhine ajakee, bare aŋarkeyi naane am ayubiyene úne. Ti sembe site Búwejet Beenabe bu t'añawe fu úne. Búwejet Beenabe bu ifi bíhin n'úbukee ti kátiyar, abe nu buwun úne buroŋ bíyeni. 6Ábuki Atambatun awunawun úne Búwejet Beenabe bu ahahan, áŋaasann bo ti Yesu Kiris Afakana ite úne. 7Náami makamu ti kajaku koone áhinahin úne núujub, úne káyini kabaju buroŋ béehabanaariit bu b'úyakare bu. 8Hirim honde héewoore. Ímaŋamaŋi a̱sooñoor tu bonde b'isoke bee, man kéeyilene ku t'Atambatun ni kanaŋ toko kikawiin iŋi káhin buroon beejake. Bondu bijake fu tu húŋgowulan, abe ni bíñjeriŋo. 9Bare a̱tey síjeeŋoor seeñunut su, ni báhamin bu uŋu kuruwu kite sifaaf site kóŋkeyin, ni síheñjeŋoor su, man yooŋ síñakoor su tu buroon bite Eluwa yite Moyis. Bondu fe bijarut, abe bibajut éñjeriŋ. 10An aŋ'ayeeñooran kéeyilene ku, a̱jab á̱yeegalo hifeeneŋ, bija kúsuba, abe n'a̱tik a̱nuutano. 11Á̱moomi kaanuku an naane ondu awasawas bítim beejoŋoore bu, abe wuhoofoor woone wúwufoorawufoor kaanuku ondu t'ébaani. 12Íñje káboñini Artemas man yooŋ Tisik. An u af'áreeŋin, n'aŋ'á̱hin wáhowah a̱abin á̱ŋaabeinam Nikopolis, ábuki íhabaneino kaanuku iija íihin bo haajam hu. 13Á̱hin wáhowah yooŋ á̱ayokunan Senas ite u ti kiŋki kákotin báhamin bu, n'Apolos, kaanuku man doon itim dijahaliin ti kátuki kooniin. 14Bakan wane yooŋ kawarawar káñiŋkaan keeliiken káhinu buroon beejake, kaanuku man ni káyini káyokunan keebaje ku bisawula bómbokun. Ifi káhin iyu, n'iŋi káñjeriŋ ti dike doon. 15Keeemo ku n'íñje fe kasaafi. A̱saaf bákawiy úne kéeyilene ku. Atambatun aja ásoniyanuun arireyi fe.

will be added

X\