TIT 2

1Tit, awe bare a̱liiken ésuk i beeriibe bu ni beeliikenee bu beejoŋoore bu. 2A̱ane háyine hu keehaane ku itim'iŋi káwusan; káhin ajakee, kayinoor yooŋ ajakee, kajok alitee ti káyilen ku, ni kámaŋi ku, ni kámuñu ku. 3A̱ane yooŋ haare hu keehaane ku kabaj buroŋ beetoofe Atambatun. Kawarut kasoku t'an, itim káyemi yooŋ búsukateen bite ehob. Kawarawar iŋi karimu ésuk i ajakee. 4Ifi káhin ii, n'iŋi kaliiken toko yooŋ éfur i kámaŋi bákayiniin ni bakañiiin, 5ni kayinoor ajakee, abe ni kakuur. Kawarawar kaliikeniin yooŋ kajokoor sunuuf sooniin ajakee, ni káyemi bakan keejake, abe ni kájeŋgin bákayiniin man an atum'abin asok beejakut ti hirim hite Atambatun. 6A̱ane yooŋ húbaakiit hu iŋi kayinoor ajakee. 7Awe humuumi a̱warawar iŋi káhinu ajakee tu buroon bu fe man ésuk i n'éhin naane awe. Af'á̱yemi ti kaliiken ésuk i, á̱habann eheli, abe n'a̱sok báhamin beeñune. 8A̱sok kirim kéejube k'an ayinaat kawaaŋatoor. Af'á̱hin ii, enatoora íiwe n'iŋi kafuño, ábuki iti kabaj beejakut bite kasoku t'úne. 9Búsukateen bu kawarawar kájeŋgin bakan kéekiniiin ku, abe ni kaŋes katoofiiin tu dóonodoon fe. Kawarut kajeeŋoor nu boko, 10kawarutiin yooŋ kákuwat doon. Bare káyemi kep bakan keejake, abe doon fe di kasoke, ni káhin do. Ifi káhin iyu, ésuk i kasoku beejake tu bumb'úliiken bite b'Atambatun Afakana ite úne. 11Atambatun áwufoorawufoor ésuk i kajaku koone kéeyinie ku kafakaniin kareyi fe. 12Kajaku koone kiliikenaliiken úne kawasu buroŋ beejakut, nu wúfaŋi wute t'etaam ye, kaanuku man n'úyinoor ajakee hahiye, n'úbaj yooŋ buroŋ beejoŋoore, abe nu bújub t'Atambatun. 13Iyu u úware fu kanahan hunak heetoofe hu h'úyakare hu. Hunak hondu, Yesu Kiris Afakana ite úne, eeemo u Atambatun eehahe u, bibin káanikin naane. 14Awunawun buroŋ boone iŋ'ite h'úne, kaanuku eefakan úne ti meejakut fe, abe n'akuuran úne. Iyu, n'uŋ'útumb úyemi bakan koone kéeñiŋkaane ti káhinu buroon beejake taŋ. 15Bonde b'a̱ware fu kaliiken ésuk i. A̱yaŋganan kikaw kiŋki kajamatani, abe kéejeŋginaariit ku, n'a̱kamoor tu boko. Á̱hin bondu ayan faŋ, abe atum'a̱was an tu boko eesooŋi.

will be added

X\