ROM 8

1Náami hahiye kéehine ku t'afeeneŋ ni Yesu Kiris iŋkut káyiniee kajoloŋan ti kaayeen. 2Ábuki Búwejet Beenabe bu bumbu buwun buroŋ bite bu nu múniyo ti káhinu ku t'afeeneŋ ni Yesu Kiris biramamram ti kaahoofoor ku n'eket i. 3Eluwa yite Moyis eyinaat káhinu bondu iŋi kabajaate kite húŋgowulan kite sembe. Bare Atambatun áhinahin bo: áboñinoboñin Añio éeyemi húŋgowulan naane úne ehoofoora i, kaanuku eeram úne ti kaahoofoor ku. Iyu a Atambatun atinane fu kaahoofoor ku kiŋki kinij tu kúŋgowulan ku. 4Áhinahin bondu kaanuku man n'úyini karoŋu jes naane t'Eluwa i esoke du, úne keeemo ku tu buroŋ káanukiiit naane hutoofe i úne, bare naane hutoofe i Búwejet Beenabe bu. 5Múniyo kiŋki karoŋ naane hutoofiin i, iŋi kayinoor ko kireyi fe beetoofiin bu. Bare kiŋki karoŋ naane hutoofe i Búwejet Beenabe bu, iŋi kafin kayinoor beetoofe bu Búwejet bu. 6Kayinoor kite beetoofe bu an u humuumo iŋi kibin n'eket i. Bare kayinoor kite beetoofe bu Búwejet Beenabe bu iŋi kibin nu buroŋ bite bu nu múniyo, ni káasuumaay yooŋ. 7Kiŋki kayinoor ko kireyi fe beetoofiin bu, bokondu enatoora Atambatun. Kájeŋginut eluwa yite Atambatun, kátumbut yooŋ káyini yo kájeŋgin. 8Abe kiŋki káhin beetoofiin bu kayinaat katoofu Atambatun. 9Bare aruun árihinaariit beetoofuun bu; aŋ'árihin beetoofe bu Búwejet bite Atambatun, ábuki bikinakin t'aruun. An afut'abaj Búwejet bite Kiris, an ondu anooto an ite Kiris. 10Bare Kiris af'akin t'aruun, hutoof yooŋ naane aamo i sini soonuun suwarawar bibin kaketu uŋu wuhoofoor wu, Búwejet Beenabe bu kawunuuun buroŋ aŋarkeyi naane Atambatun ajokuunjok bakan kéejube. 11Arko Búwejet bite Atambatun eeritane u Yesu t'eket i bikinakin t'aruun, Atambatun ondu eeritane u Kiris t'eket i kawunu buroŋ bu sini soonuun seeemo su iŋi siket. O káŋaasanna bo tu Búwejet boone beekine bu t'aruun. 12Náami kújakuwe, buroŋ bite b'úne buwarawar katoofu Búwejet bite Atambatun, káanukiiit beetoof sini site s'úne. 13Af'aŋ'árihin beetoofe bu so, aruun kaketu. Bare af'ariwun Búwejet Beenabe bu bítim bite káyokunanuun ariiyool kunoŋk koonuun keejakut ku, aruun karoŋu. 14Ábuki kiŋki kawas Búwejet bite Atambatun béewufooriin bítim bu, bokondu bakañi Atambatun. 15Abe Búwejet b'Atambatun awunuun bu bíteiit káhinuuun áriiyemi búsukateen, ariisooñ áriyemi bukoloow. Bare Búwejet b'awunuun bu bite káhinuuun áriiyemi bakañio. Bo b'ifi bitiŋg úne núutaŋk úeno: «Aba, Faafa!» 16Búwejet Beenabe bu humuum hite te bo búwufoorawufoor búwejet bite b'úne kaanuku úne bakañi Atambatun. 17Abe makamu úne bakañio, úne kabaju húrub t'ebaj y'anaŋe i bija ti bakan koone. Úne kamaatu te yo ni Kiris, ábuki uf'úmaat ti sílaam soone, úne yooŋ kamaatu ti kániku koone. 18Bukuuramkuur kaanuku kaliiku kániku kite ku kuwaatu k'Atambatun aja ku káwufoor úne, ni sílaam s'úemo su te so hahiye, n'aŋ'áami so dóoniit fe. 19Aduna i ereyi fe yeeemo i Atambatun áwuwane fu yo emokena kajuku kóyin k'aja ku káwufoor aañiin kaamo fu bakañio. 20Ábuki sembe seebajut mayet éñjeriŋ síkinie fu yo. Káanukiiit man yo eŋese bo; aaa, yo ejoloŋanee tu bondu. Eyakar yendu toko bare: 21aduna i karamiee ti sembe sunsu súbuj yo abe nu sujok yo naane ásukateen. Náami n'eŋ'emaat ti kafaku kite biñi bite Atambatun, ni kániku kooniin. 22Úmoomi kaanuku bija yooŋ t'úmiye, aduna i ereyi fe eroŋa n'eriŋgan, abe n'ejuk yooŋ sílaam naane anaare eeemo ti bíyihino. 23Abe yóiit barebare: úne yooŋ keebaje ku Búwejet Beenabe bu naane bítiyar bu dók tu buroon b'Atambatun aja bu kawunu úne, uŋ'úriŋgan tu suhol site s'úne. Úne bokondu yooŋ ti kanahan ku kaanuku Atambatun éehin úne bakañio nu múniyo, abe n'aram úne áhabanein. 24Ábuki n'eyakar yendu n'úfakanee fu. Eyakar yeejukee eŋkut éyemi eyakar: ake fíya abaa kayakar doon d'aŋ'ajuk? 25Bare uf'úyakar doon d'újukoorut, uŋ'úmoken do. 26Iyu yooŋ u Búwejet Beenabe bu ufu búyokunan úne ti kabajaate kite k'úne kite sembe su, ábuki útumbut úmeyi buŋ b'úware fu kalawu Atambatun ariike. Bare Búwejet Beenabe bu iŋi bilaw Atambatun bíhabanein bija t'úne naane an eeemo ti kariŋgan, kariŋgan k'an ayinaat kanaban. 27Abe Atambatun aa ajuk tu suhol su aŋ'ámeyi biyinoor bite Búwejet Beenabe bu, ábuki iŋi bilawo naane ámaŋie i bija ti bakan k'akino ku. 28Úmoomi kaanuku doon fe deeyino kabaju kéemaŋie ku Atambatun, bokondu k'aruwe ku naane t'afiye du asok, aŋ'áhin do déeyemi deejake bija ti káasuumaay kooniin. 29Ábuki bakan k'asoŋke ku bijifan, asoŋka yooŋ bíhabaneina kaanuku eebin éehiniin keenokoor n'Añio, man Añio n'abin áyemi aneemak ite butoŋ beehooje. 30Bakan kéekinineŋe ku Atambatun n'asoŋk bíhabaneina tu bondu, aruwiinruw yooŋ; k'aruwe ku, ajokiinjok yooŋ bakan kéejube; k'ajoke ku bakan kéejube, áhiniinhin yooŋ keemaat ti kániku koone. 31Núusooñ yooŋ úene buŋ? Atambatun af'ásiiŋoorein n'úne, aañ ayino fu kásokum úne? 32Akina éetumbut u awas Añio, bare n'ásiko asaan eeket bija t'úne úreyi, buŋ b'atuf'awun úne doon areyi fe t'afeeneŋ n'Añio? 33Aañ aja fu katinan úne, úne k'Atambatun ajifane ku? Atambatun fíya? Aaa, ábuki akina humuumo aanaan újubajub. 34Aañ aja fu kayoosan úne ti kaayeen? Yesu Kiris fíya? Aaa, ábuki akina humuumo aketaket abe n'aritanee yooŋ t'eket i; ondu inde baatos Atambatun, abe aŋ'áwasiyano bija t'úne. 35Naŋ fíya níyinie fu kákinineŋ kámaŋi ki Kiris ámaŋie ku úne nu kuwas? Sílaam su fíya, man yooŋ kátaañi ku, man yooŋ káhihinoor ku, man yooŋ bujoñjol bu, man yooŋ kabajaate ku, man yooŋ doon déekolinanie, man yooŋ eket i? 36Míkiñjin mu meenaan: «Bújom tujon, iŋ'íriheelin t'eket i iŋi naane iriemo i bakan kúuwe awe Atambatun. Ésuk i ejokajok uni naane bíkarniina bite bija kamootu.» 37Bare naane bije i iyu fe, úne úriiŋane fu, abe an éemaŋie u úne éekinineŋ. 38Ábuki bukuuramkuur kaanuku doon diyinaat kákinineŋ kámaŋi k'Atambatun ámaŋie ku úne nu kuwas. Eket i, nu buroŋ bu, n'emalaka i, ni sirab su, nu buroon beebaje bu hahiye, ni beeware bu bibin kabaju, ni bakate sembe su, nu buroon beeemo bu t'etiir, ni beeemo bu yooŋ t'etaam, nu doon fe déewuwanee, mayet bifeeneŋ tu bondu biyino kákinineŋ kámaŋi k'Atambatun ámaŋie ku úne áŋaasann ko t'Anahaan ite úne Yesu Kiris nu kuwas.

will be added

X\