ROM 6

1N'úene yooŋ buŋ? N'úboo fíya kakinu tu wuhoofoor wu kaanuku man kajaku k'Atambatun kaŋk'áwufoor úne ni kihaŋ? 2Mánoman aaa! Ti kaahoofoor ku, úne bakan keekete. Buŋ b'úyinie fu kasooñu úkin te ko? 3Árimeyiit kaanuku t'eket ite Yesu Kiris t'úbostee fu, úne keebostee ku úreyi fe kaanuku núuhin t'afeeneŋ ne o? 4Náami ti kaboste ku, úketaket ni Kiris, abe n'úhokee ne o, kaanuku naane aritanee i t'eket i ti sembe site Faaf u séenike su, úne yooŋ buroŋ bite b'úne ni bíyemi bíyeni. 5Múniyo, makamu úhinahin ne o t'afeeneŋ t'eket yeenokoore ni yeene i, úne yooŋ káhinu ne o t'afeeneŋ ti bíriteina bu t'eket i naane boone bu. 6Úmoomi kaanuku manoŋkar mite m'úne mítiyar mu mitibeetib t'ekuruwa i ni Kiris, kaanuku man kaahoofoor keeemo ku ti sini site s'úne nu kúbujarooree, utum'uŋk'úyemi búsukateen bite te ko. 7Ábuki an eekete ayihoora ni kaahoofoor ku. 8Makamu úketaket ni Kiris, úyilena yooŋ kaanuku úne karoŋu ne o. 9Múniyo úmoomi kaanuku Kiris aritaneeritan t'eket i, abe aroŋut kaketu. Eket i eŋkut ebaj te o sembe. 10Aketaket hifeeneŋ kaanuku éebuj sembe site kaahoofoor ku, abe eket yendu eraanu; hahiye bare ondu tu buroŋ bija t'Atambatun. 11Náami aruun yooŋ árihin iye: ti kaahoofoor ku, arijokooro naane bakan keekete, abe n'arijokooro naane bakan keeroŋe bija t'Atambatun iŋi naane árihine i t'afeeneŋ ni Yesu Kiris. 12Kaahoofoor ku kuwarut iŋki kabaju sembe ti sini soonuun seeemo su iŋi siket, kiyak iŋi kitiŋguun áriihin wúfaŋi wute te so. 13Atum'aŋk'árisik siniuun arisaan kaahoofoor ku, kaanuku iŋi sibin síhin meejakut mu. Árisik so arisaan Atambatun naane bakan keeritanee t'eket i, abe n'árihabanein fe tu burok boone, aŋ'aribin árihin beejoŋoore bu. 14Kaahoofoor ku kuroŋut kabaju t'aruun sembe, ábuki Eluwa yite Moyis eŋkut ékiniuun, bare kajaku k'Atambatun kaŋk'áwufooruun kíkiniuun fu hahiye. 15Eluwa yite Moyis eŋkut ékini úne, bare kajaku k'Atambatun kaŋk'áwufoor úne kíkinie fu úne. Náami naŋ? Bondu buwarawar fíya kákinineŋ n'uŋ'úhoofoor? Mánoman aaa! 16Árimeyiit kaanuku af'árisik kikawuun arisaan ake, abe n'aŋ'arijam te o, áriyemia búsukateen boone? Hahiyu arijuk, man áriijeŋgin kaahoofoor ku kiŋki kibin n'eket i, man yooŋ áriijeŋgin Atambatun, abe n'aŋ'ajokuun bakan kéejube. 17Bare úene Atambatun eyeehen: aruun kéeyemie ku hítiyar hu búsukateen bite kaahoofoor ku, arijokajok hahiye árihabanein tu múniyo m'ariliikenee mu. 18Aŋkut áriyemi búsukateen bite kaahoofoor ku; áriyemia búsukateen bite Atambatun kaanuku áriihin buroon beejoŋoore. 19Íihamin iliik bo tu buroŋ bite bu húnakonak aŋarkeyi naane árisoŋkaariit arijok. Hítiyar hu, aŋ'árihabanein ariirok naane búsukateen bija tu buroon beekuurut bu, ni káhinu kite meejakut mu, ariibaj buroŋ beejoŋoorut. Hahiye, aŋ'árihabanein ariirok naane búsukateen bija ti béejube bu, man n'aribaj buroŋ beenabe. 20Aruun káaroŋin ku búsukateen bite kaahoofoor ku, arikolut ni béejube bu. 21Náami naŋ n'aribaje fu toko? Buroon béefuñinanie t'aruun úmiye, ábuki iŋi bibin n'eket i! 22Bare hahiye arikolut ni kaahoofoor ku, abe aruun búsukateen bite Atambatun. Doon d'aribaje du toko deemo fu buroŋ beenabe, abe ti biraanu, aruun kabaju buroŋ béehabanaariit. 23Ábuki bajaam bite kaahoofoor beemo fu eket i; bare b'Atambatun bamb'awun fuufu beemo fu buroŋ béehabanaariit bu iŋi naane úhine i t'afeeneŋ ni Yesu Kiris Anahaan ite úne.

will be added

X\