ROM 5

1Náami Atambatun ajoka úne bakan kéejube aŋarkeyi naane úyilenayilen, abe hahiye káasuumaay kibaja t'etut úne ne o, Anahaan ite úne Yesu Kiris éekinineŋ. 2Akina áfeŋgine fu úne bítim bu, kaanuku núumeyi kajaku k'Atambatun kaŋk'áwufoor úne aŋarkeyi naane úyilenayilen. Hahiye úsiiŋaa ti kajaku kondu jirib. Abe béekinineŋe bu kikaw úne n'uŋu kutoof beemo fu eyakar y'úbaje i yite kamaatu ku ti kániku kite Atambatun. 3Abe bóndiiit barebare: kikaw úne uŋu kutoof yooŋ kane újuk sílaam, ábuki úmoomi kaanuku sílaam af'abuk kámuñu; 4kámuñu n'abuk kajoku alitee; kajoku alitee n'abuk eyakar. 5Abe eyakar yendu ébuutaariit, ábuki Atambatun ásikasik ti kámaŋi koone áyuus tu suhol site s'úne, áŋaasann ko tu Búwejet Beenabe b'awune bu úne. 6Múniyo kóŋkeyin úne t'úbajoorut sembe, Kiris aketaket bija t'ehoofoora i hunak h'Atambatun ajoke hu te ho. 7Bítaañataañi kajuku ake n'aane hee eeket bija t'áwiyo, hutoof yooŋ áwiyo ondu an éejube. Maske ake bija ayak abin áami aana hee eeket bija t'an eejake. 8Bare iye a Atambatun áwufoore fu buŋ b'ámaŋie fu úne ariike: Kiris aketaket bija t'úne, úne káaroŋin ku ehoofoora. 9Kaasarah koone kíkinineŋakinineŋ Atambatun n'ajok úne hahiye bakan kéejube. Buŋ b'atuf'afakan úne yooŋ ti kayiŋat kite Atambatun? 10Úne yéeni enatoora Atambatun; bare áhina núubukan ne o t'eket ite Añi oone. Abe makamu hahiyu Añi oone ondu tu buroŋ, abe úbukana, buŋ b'atuf'afakan úne ariike? 11Abe bóndiiit barebare: kikaw úne uŋu kutoof t'Atambatun, o éehine u núubukan ne o, Anahaan ite úne Yesu Kiris éekinineŋ. 12Afeeneŋ taŋ áyoosanna fu kaahoofoor ku t'etaam ye, abe kaahoofoor ku ni kibin n'eket i: o aamo fu Adam. Iyu e eket i éreeŋina fu kúŋgowulan ku fe, ábuki kareyi fe kahoofoorahoofoor. 13Kaahoofoor ku kúmoomi t'etaam ye t'Atambatun asaanoorut Moyis Eluwa i. Makamu t'Eluwa i ebajoorut, Atambatun ájokaariit wuhoofoor wu doon. 14Bare huta hu t'Adam bija yooŋ tu Moyis, eket i eŋ'émiñ ésuk i fe, bija yooŋ ni keehoofoorut ku naane Adam éejeŋginut u b'Atambatun asoko bu. Adam áyemie fu búnokoorum bite an eeware u bibin, 15bare kawayawayo tu dómbokun. Katin kite Adam kiŋaaŋut káyemi naane b'Atambatun bamb'awun fuufu. Múniyo bakan keehooje kaketaket iŋi katin kite an afeeneŋ ondu. Bare kajaku k'Atambatun kaŋk'áwufoor kihaŋahaŋ tu dómbokun, abe bamb'awun bakan keehooje-hooj fuufu, áŋaasann bo t'an afeeneŋ taŋ eeemo u Yesu Kiris nu busooñ bihaŋ. 16Abe b'Atambatun bamb'awun biŋaaŋut káyemi naane kaahoofoor kite ániine afeeneŋ. Kaahoofoor kifeeneŋ taŋ k'Adam áhine ku kíkinineŋe fu n'ajoonanee abe n'ayoosanee, bare b'Atambatun bamb'awun ésuk i ifi bíkinineŋ n'ajokiin bakan kéejube, hutoof yooŋ wuhoofoor wooniin káahoojin. 17Múniyo an afeeneŋ atinatin, abe eket i émiñamiñ bakan keehooje iŋi húŋgowulan hifeeneŋ hondu taŋ. Bare iŋi an afeeneŋ taŋ eeemo u Yesu Kiris, úbajabaj ahaŋ diyu. Bakan k'Atambatun kaŋk'áwufoor kajaku koone kómbombokun ku, abe n'anoŋk eejokiin bakan kéejube, boko karoŋu, abe ni káyemi bákayi, Kiris éekinineŋ. 18Náami naane aamo i kaahoofoor kite Adam kifeeneŋ ku taŋ kuyoosane fu ésuk i fe ti kaayeen, burok yooŋ béejube bifeeneŋ taŋ bite bu Yesu Kiris bíhine fu Atambatun n'ajok kúŋgowulan ku fe bakan kéejube, abe nu buwuniin buroŋ. 19Naane kájeŋginaate kite an afeeneŋ taŋ kíhine i bakan keehooje ni káyemi ehoofoora, afeeneŋ yooŋ taŋ ájeŋgine fu ayak áhin bakan keehooje kéejub t'Atambatun. 20Eluwa yite Moyis esiiŋasiiŋo, wuhoofoor wu nu wuhaŋ kahooju. Bare ti kaahoofoor ku kihaŋe du kahooju, kajaku k'Atambatun kaŋk'áwufoor kihaŋe toko. 21Náami naane kaahoofoor ku kíbajaanie i sembe kiyak uŋu kuyool, kajaku k'Atambatun kaŋk'áwufoor kibaja yooŋ sembe site káhinu ésuk i kéejub te o. Iŋ'ite ho h'úyinie fu kaŋaasu t'Anahaan ite úne Yesu Kiris núubaj buroŋ béehabanaariit bu.

will be added

X\