ROM 4

1Úliik t'Aburaham faaf úne. Naŋ kereŋ nibajo fu? 2Arko Atambatun ajokojok an éejube uŋu buroon b'áhine bu, Aburaham n'aŋ'áyini kamaku. Bare abajut beeware kákinineŋ n'amak hágila Atambatun. 3Múniyo Míkiñjin mu meenaan: «Aburaham áyilenayilen Atambatun, abe Atambatun n'ajuk ti káyilen koone n'ajoko an éejube.» 4An af'arok, aŋ'ajaamee. Bajaam bondu, ákinaiit awunee bo fuufu: diyu doono. 5Bare an éesike eyakar yeene anaŋ t'Atambatun, abe ajokooreit an éejube t'Atambatun uŋu burok beejake bamb'áhin, Atambatun aa ajok ehoofoora i kéeyilene ku te o bakan kéejube, kajuku ti káyilen koone n'aŋ'ajoko an éejube. 6Iye i Dafit áhamine fu ti káasuumaay kite an a Atambatun ajoke an éejube t'ajukerut tu buroon bamb'áhin. Aanaan: 7«Atoof ti bakan k'Atambatun aboŋkete ku katin kooniin, abe n'anuutan wuhoofoor wooniin! 8Atoof t'an a Atemit ajokut wuhoofoor woone!» 9Katoofu kondu, kite fíya keeteye ku karam barebare? Kíteiit yooŋ keeteyit ku karam? Úenaan memee: «Atambatun ajukajuk ti káyilen kite Aburaham, n'ajoko an éejube.» 10Kaakaŋ nu bondu bibaje fu? Aburaham fíya káateyin karam, bare t'ateyoorut ko? Aaa, Atambatun ajokojok an éejube t'ateyoorut karam. 11Abe Atambatun n'abin áhino eetey karam: karam kondu keemo fu ékeetanuma yéewufoore i kaanuku Atambatun ajokojok an éejube iŋ'ite káyilen koone, abe kóŋkeyin o t'ateyoorut karam. Iyu i Aburaham aamo fu faaf ite bakan ku fe kéeyilene ku t'Atambatun ti kateyit karam. Abe bokondu Atambatun ajokiinjok bakan kéejube. 12Aburaham aamo fu yooŋ faaf ite keeteye ku karam; káanukiiit ti keeraane ku ti kateyi karam ti siniiin barebare, bare n'iŋi kaneefan yooŋ ti káyilen ki faaf úne Aburaham abaje ku, o t'ateyoorut karam. 13Atambatun asokasok Aburaham ni bakañio aaniin o kawuniiin etaam i kéekini yo. Asokasok bondu káanukiiit man Aburaham ájeŋgine Eluwa i, bare aŋarkeyi naane akina Atambatun ajokojok an éejube iŋi káyilen koone. 14Arko yéeni kiŋki kájeŋgin Eluwa i kaware fu kabaju buroon b'Atambatun asoke bu unooniin, n'aŋ'áami káyilen ku, ko káfiiten, abe buroon b'Atambatun aane bu o kawunu bibajut éñjeriŋ. 15Eluwa i eŋ'éhin Atambatun n'ayiŋat tu kúŋgowulan ku, ábuki kájeŋginaariit yo; bare t'eluwa enooto du, kájeŋginaate eluwa kunooto yooŋ toko. 16Náami b'Atambatun aane bu o kawunu, káyilen kíkinineŋe fu, kaanuku t'áami kawunu kite kásoniyan, abe ni kíyemi kite ku bakañi Aburaham kareyi fe. Kíteiit kéejeŋgine ku Eluwa i barebare, bare kite yooŋ kéeyilene ku káhabanein naane Aburaham. Akina faaf úne úreyi fe, 17naane Atambatun asoke i ti Míkiñjin mu. Aanaan: «Íhinihin á̱ayemi faaf ite biheet beehooje-hooj.» Aburaham aamo fu faaf úne t'Atambatun, ábuki áyilenayilen Atambatun. Akina Atambatun af'aritan keekete ku, abe n'asok yooŋ buroon béemusut bu káwuwina béewuwin. 18Aburaham ayakarayakar t'eyakar eŋkut ebaj, abe n'áyilen. Iyu a abine fu áyemi «faaf ite biheet beehooje-hooj», naane t'Atambatun asoko du aano: «Iye i bakañi kaja fu kahooju.» 19H'Atambatun asoko hu bondu, Aburaham káabajin simit seelohene téemeer. Ámoomi kaanuku eket taŋ eŋeñeno fu, abe anaar'o Saara ahaana, ámusut yooŋ kámeyi kaharat. Bare awasut hikee káyilen ku, 20araanut ko yooŋ, abe ajeeŋanut b'Atambatun asoko bu. Káyilen koone ni kihaŋ kayanu, abe n'asokoroor Atambatun. 21Bukuurokuur áhabanein kaanuku Atambatun áyinooni káhinu b'asoke bu. 22Bondu bíkinineŋe fu Atambatun n'ajuker ti káyilen koone «n'ajoko an éejube». 23Bare kirim konde: «Atambatun ajokojok an éejube», kikiñjutee bija t'Aburaham unoono. 24Kikiñjeekiñj yooŋ bija t'úne k'Atambatun ayak ku kajoku bakan kéejube, úne kéeyilene ku t'an eeritane u Anahaan ite úne Yesu t'eket i. 25Yesu ásikeesik asaanee kúŋgowulan ku kaanuku eeket uŋu wuhoofoor wute w'úne, abe n'aritanee t'eket i kaanuku éehin núuyemi bakan kéejube hágila Atambatun.

will be added

X\