ROM 3

1Kame náami Esuwif i, te naŋ ti kahaŋe fu keenooto ku Esuwif? Man yooŋ karam ku, éñjeriŋ ite te ko naŋ? 2Kahaŋu kondu toko tu doon areyi fe. Kítiyar ku keemo fu Esuwif i k'Atambatun asaane fu hirim hoone. 3Náami arko bakaake tu boko kajoŋoorut, n'uŋ'úene fíya buŋ? Atambatun n'aŋ'araan yooŋ kajoŋoor ku aŋarkeyi naane boko kajoŋoorut? 4Mayet fu! Hutoof yooŋ kúŋgowulan ku fe ejuusa, híkinineŋut Atambatun n'áyemiaati ate bifeeneŋ. Múniyo Míkiñjin mu meenaan: «Af'á̱hamin, ésuk i fe kámeyi kaanuku bite toko, abe an af'atinani, n'aŋ'a̱heeko.» 5Bare arko kajoŋooraate kite k'úne, ko kite káwufoor kaanuku Atambatun ájubajub, n'uŋ'úene fíya buŋ? Atambatun fíya ájubut aŋarkeyi naane aŋ'ayiŋat t'úne? (Íihaminuun naane bakaake ii káhamin.) 6Mayet fu! Arko Atambatun ájubut, n'áyini fíya kajoonan ésuk i? 7Abe arko haajuus húuma, ho hite káwufoor múniyo mite Atambatun akuur but, abe nu húwutiyen kániku koone, iŋi naŋ n'aamo fu iroŋa n'ijoonanee naane ahoofoora? 8Iŋi naŋ ni bakaake kájoŋooraariit fu keeene: «Úhin meejakut man meejake nu múnuutin toko»? Bakaake iŋi kasok t'íñje kaane iyu if'isok. Boko katinanee, abe boko kaŋese bo! 9Náami naŋ? Uni Esuwif i irihaŋahaŋ fíya keenooto ku Esuwif? Mayet fu! Iheeka íiwufoor kaanuku kaahoofoor ku kihaŋahaŋ sembe Esuwif i ni keenooto ku Esuwif. 10Míkiñjin mu meenaan: «Abajut an éejube, mayet afeeneŋ. 11Abajut an éewesinatee, abajut an aŋ'aŋes Atambatun. 12Kareyi fe kawasawas bítim beejake bu, an tu boko aŋkut áñjeriŋ Atambatun. Abajut an aŋ'áhin meejake, mayet afeeneŋ. 13Bukundaaju booniin búmoomi naane búlum beewakee, wúleluf wooniin wute kabuutu bakan, abe bíniw bite káayoomuna ufu búnuutin ti kibiniin. 14Báhamin béetike bite káwuumu ufu búnuutin tu ñutumiin. 15Iŋi kahil naane ti kayoolu bakan; 16ti kaŋaase fe, boko kábujaroor toko, kátaañi yooŋ kabaju. 17Kámeyiit bítim bite káasuumaay ku. 18Kátumbut kaŋaaŋ kákoleyi Atambatun.» 19Abe bare úmoomi kaanuku b'Eluwa yite Esuwif i esoke bu fe, esokasok bo bakan k'ékinie ku, kaanuku man ñutum ñu fe nu ñukoowan, abe Atambatun n'ajoonan ésuk i kareyi fe. 20Ábuki abajut an a Atambatun ayak kajoku an éejube aŋarkeyi naane an ondu áhinahin naane Eluwa i esoke i. Aaa, Eluwa i eŋ'éwufoor an kaanuku ahoofoorahoofoor. 21Bare hahiye Atambatun áwufoorawufoor buŋ b'af'ajok húŋgowulan an éejube, abe bondu bukolut n'Eluwa yite Moyis. Eluwa i bare esokasok bo, n'eyiŋana yite Atambatun yooŋ. 22Kéejube ku t'Atambatun kaamo fu bakan ku fe kéeyilene ku ti Yesu Kiris. Te o, kúŋgowulan ku kawayeit, 23ábuki ésuk i ereyi fe ehoofoore fu, abe ni kábuur kániku kite Atambatun. 24Bare Atambatun, ti kajaku koone, n'áhiniin kéeyemi bakan kéejube fuufu, aŋaasan bo ti Yesu Kiris aa afakaniin tu wuhoofoor wu. 25Atambatun aboñaboñ Kiris éeyemi kaasarah kaanuku man halan hoone nu hunuutan wuhoofoor wute ésuk i kéeyilene ku te o. Atambatun áhinahin bondu kaanuku éewufoor ésuk i buŋ b'ájube fu ariike. Kóŋkeyin, wuhoofoor w'ésuk i wiwi káhinaani, aŋ'áhin kite ájukaariit wo aŋarkeyi naane aŋ'ámuñ. 26Bare hahiye kaasarah kondu kúwufoorawufoor kájubu koone. Akina an éejube, abe n'ajok an fe éeyilene ti Yesu Kiris an éejube. 27Bike fíya buroŋa b'an aware bukuuso te bo eemak? Mayet fu bifeeneŋ! Iŋi naŋ? Ábuki beeemo bu toko, kájeŋgin kite kíiit Eluwa i, bare káyilen ku. 28Uŋ'úene Atambatun ajokajok húŋgowulan an éejube iŋi káyilen koone ti Yesu Kiris, káanukiiit man iŋi naane ájeŋgine i Eluwa i. 29Bare fíya Atambatun, akina Atambatun ite Esuwif i barebare? Anooto yooŋ Atambatun ite keenooto ku Esuwif? Wala, akina Atambatun ooniin yooŋ, 30ábuki Atambatun afeeneŋ taŋ abaje fu. Akina aja fu kajoku Esuwif i bakan kéejube ti káyilen kooniin, n'ajok yooŋ keenooto ku Esuwif bakan kéejube ti káyilen kooniin. 31Aamo fu uf'úyilen, n'uŋ'úbuj fíya éñjeriŋ ite Eluwa i? Mayet fu! N'uŋ'úhaŋ kalitan éñjeriŋ ite te yo.

will be added

X\