ROM 2

1Náami awe aa a̱joonan bakaaku, hutoof á̱yemi aañ, aŋkut a̱baj b'a̱ware bukuuso te bo hágila Atambatun. Af'aŋ'a̱joonan bakaaku, a̱yoosanooraa ti kaayeen awe humuumi, ábuki aŋ'á̱hin yooŋ buroon bimbi káhin. 2Úmoomi kaanuku Atambatun aŋ'ajoonan kiŋki káhin naane iyu ajoŋoor júl. 3Awe aa a̱joonan kiŋki káhin buroon naane bondu, abe bare bo yooŋ b'af'á̱hin, butum aŋ'a̱ane awe kafaku kane Atambatun áyemi ti kajoonan ésuk i? 4Bare me á̱wiinianawiinian Atambatun aŋarkeyi naane ajakajak aa, aŋ'ámuñ yooŋ, abe amokenut ti kajoonan kúuwe? Á̱meyiit kaanuku kajaku kite Atambatun kuwarawar katiŋgii a̱awatanooro kinij kúuwe? 5Bare a̱yaŋgayaŋg hikaw, á̱maŋiit buwatanooro. Iŋ'ite ho aamo fu aw'ondu ti binaŋooro kúnuur keehaŋe kásufu tu hunak h'Atambatun aja hu káwufoor kayiŋat koone, abe n'ajoonan te ho ésuk i ajoŋoor júl. 6O kabatikan huruw fe aliik tu doon d'aroke du. 7Atambatun kawunu buroŋ béehabanaariit bu kiŋki káñiŋkaan ti káhinu kite meejake mu. Tu bondu t'ifi kaŋes kániku ku, nu kusokorooru ku, nu buroŋ béehabanaariit bu. 8Bare kiŋki kárahan te o, kájeŋginaariit yooŋ múniyo mu, abe n'iŋi kawas meejakut mu méekiniiin, o káwufooriin kaanuku ayiŋatayiŋat ni sembe. 9Kiŋki káhin meejakut mu kareyi fe, boko kajuku sílaam nu wútaañi, ájabin t'Esuwif i, abe n'ahabanooro ti keenooto ku Esuwif. 10Bare kiŋki káhin meejake mu kareyi fe, Atambatun kánikaniin, n'asokorooriin, abe n'awuniin káasuumaay, éejabin t'Esuwif i, abe n'ahabanoor ti keenooto ku Esuwif. 11Ábuki t'Atambatun ésuk i erare. 12Keenooto ku Esuwif, Eluwa yite Moyis ékiniitiin. Iŋi kahoofoor, abe bútowuto bi kayake; Eluwa i ekolut nu bondu. Esuwif i, boko Eluwa yite Moyis ékiniiin fu. Ifi kahoofoor, boko kajoonanee aliik naane t'esoke du. 13Káanukiiit kiŋki kajamatan Eluwa i abe araanee toko kaamo fu kéejube ku t'Atambatun; aaa, kéejube ku te o kaamo fu kiŋki káhin naane esoke i. 14Bakan keenooto Esuwif, kéemeyiit yooŋ Eluwa yite Moyis, abe ni kanoŋk kéehin naane esoke i, hutoof kámeyiit Eluwa i, káwufoora kaanuku kámoomi naŋ ni kaware fu káhinu. 15Iŋi káwufoor iyu kaanuku naane Eluwa i eene i an aŋ'áhin, bikiñjeekiñj tu ñúwejet ñooniin. Biyinoor booniin yooŋ uŋu búwufoor bondu, ni siheliin fe, ábuki ti hike iŋi sitinaniin, ti hike ni sísiiŋoorein nu boko. 16Bondu bija fu kajukiee akuur but hunak h'Atambatun aja hu kaŋaasu ti Yesu Kiris eejoonan biyinoor béenuusee bite kúŋgowulan ku, naane Hirim Heetoofe hu hih'iwaare iye husoke i. 17Hahiyu íitif t'awe, awe aa a̱ane awe a̱amo Asuwif, a̱yakarayakar t'Eluwa yite Moyis, abe n'aŋ'a̱mak a̱ane Atambatun úuwe u. 18Á̱moomi b'Atambatun ámaŋie bu, abe Eluwa i eliikeniliiken kakeetan beejake bu b'an aware káhinu. 19A̱jokoorajokooro naane ágilana ite kéefuume ku aa á̱wufooriin bítim bu, n'a̱jokooro yooŋ naane meejaaŋe mite keeemo ku t'ébaani i, 20n'ajoŋoorana ite kéeniyeit ku, n'aliikena ite kéemeyiit ku doon ti bítim bu, aŋarkeyi naane bukuurikuur kaanuku Eluwa i éwufooriwufoor akuur but kámeyi ku nu múniyo mu. 21Kame náami awe aa a̱liiken bakaaku, iŋi naŋ n'atuf'a̱liikenoolo? Awe aa a̱waare a̱ane an awarut kákuwat, iŋi naŋ n'af'á̱kuwat? 22Awe aa a̱waare a̱ane an awarut kaŋotu n'anaare i kaseñeit, iŋi naŋ n'af'a̱ŋot ni haare hu k'ariseñeit ku? Awe aa a̱ane a̱huufahuuf ñúwisenum ñu, iŋi naŋ n'af'á̱kuwat ti kimiile ku? 23Awe aa a̱mak a̱ane á̱moomi Eluwa yite Moyis, aŋ'a̱fuñatan Atambatun, ábuki aŋ'á̱hin buroon beewayee ni b'Eluwa i esoke bu! 24Ábuki Míkiñjin mu meenaan: «Keenooto ku Esuwif kálafatina huruwu hite Atambatun áriikinineŋ.» 25Af'á̱hin naane Eluwa i esoke i, kateyi karam ajakajak. Bare afut'á̱jeŋgin Eluwa i, anokooreenokoor kite a̱teyit karam. 26An eenooto Asuwif, abe ateyit karam, af'aŋ'áhin naane t'Eluwa i esoke du, Atambatun man fíya ajoko naane an eeteye karam? 27An eeteyit u karam, abe n'aŋ'áhin naane Eluwa i esoke i aja fu katinani, awe Asuwif u. Ábuki naane aamo i fe a̱teyatey karam, abe n'á̱yeki yooŋ Eluwa i, á̱jeŋginut yo. 28Kabukiee Asuwif kíkinineŋut an u n'áyemi Asuwif ite nu múniyo, karam yooŋ keejukanee t'eni i kíkinineŋut náami karam kondu kite nu múniyo. 29Asuwif ite u nu múniyo, tu búwejeto t'aamo fu Asuwif, abe kateyi karam kite ku nu múniyo keemo fu kite ehol i. Karam kondu, tu Búwejet bite Atambatun tu kúnuutina fu, t'Eluwa yíiit yeekiñjee i. Asuwif ondu ite u nu múniyo, Atambatun af'asokorooro, kúŋgowulan kíiit.

will be added

X\