ROM 15

1Úne keeyane ku ti káyilen ku, úwarut kaŋesu káhinu beetoofe bu úne, bare úwarawar káyokunan keebajut ku káyilen keeyane. 2Huruw fe t'úne aŋes káhinu beetoofe bu áwiyo bite káñjeriŋo, man káyilen kite an ondu ni kihaŋ kayanu. 3Ábuki Kiris aŋesut káhinu beetoofo bu. Bi Míkiñjin mu musoke bu bibajo fu. Meenaan: «Atambatun, kílafatinu ki kálafatini ku fe, íñje i kálafatine fu.» 4Beesokee bu kóŋkeyin ti Míkiñjin mu fe, bo bite kaliiken úne, ni biyaŋganan úne kikaw, abe ni bíhin úne uŋ'úmuñ kaanuku man n'úbaj eyakar. 5Yala Atambatun aa áhin ésuk i iŋi kámuñ, abe n'ayaŋgananiin kikaw, n'áhinuun ariijamoor aliik naane ti Yesu Kiris áwufooruun du, 6man arireyi fe n'árihin kaaji kifeeneŋ ariisokoroor Atambatun, Faaf ite Anahaan ite úne Yesu Kiris. 7Náami arijokoor áwariee naane Kiris ajokuun i áwariee. Af'árihin iyu, Atambatun kánikanee. 8Iisokuun bonde: Kiris abinabin éeyemi aroka bija t'Esuwif i. Áhinahin bondu kaanuku éereeŋinan b'Atambatun abine bu asok sifaafiin, aaniin o káhinu, éewufoor kaanuku Atambatun an ite bifeeneŋ. 9Abinabin yooŋ kaanuku man keenooto ku Esuwif ni kasokoroor Atambatun iŋi kajaku koone, naane busokee i ti Míkiñjin mu. Meenaan: «Iŋ'ite ho aamo fu íñje kasokoroori ti keenooto ku Esuwif, abe n'ihooñi.» 10Nu musooñ yooŋ meene: «Aruun keenooto ku Esuwif, aritoofan t'afeeneŋ ni bakan kite Atambatun!» 11Ni meene yooŋ: «Aruun arireyi fe keenooto ku Esuwif, arisokoroor Atemit. Arisokorooro, aruun bakate etaam i arireyi fe!» 12Esayi yooŋ asokasok ti Míkiñjin mu aane: «Ake kánuutina tu noota nite Seese. O bíriteina eebin éeyemi aseef ite keenooto ku Esuwif, abe boko kanaŋu te o eyakar yeeniin.» 13Yala Atambatun aa áhin ésuk i ni kayakar te o, n'áhinuun ariitoofan dómbokun, abe n'áhinuun ariibaj káasuumaay iŋi naane áriyilene i te o. Káhinu iyu, sembe site Búwejet Beenabe bu n'iŋi síhinuun ariihaŋ kabaju eyakar. 14Kújakuwe, bukuuramkuur kaanuku áritumbatumba arijak, árimoomi yooŋ beeware bu kámeyiee arihaban, abe árinooni yooŋ karimoor. 15T'eleetar yende bare, bike iŋ'íbaŋinanuun bo akuur but, ínuuseit. Íhinahin bo aŋarkeyi naane Atambatun, ti kajaku koone áhinamhin 16íiyemi aroka ite Yesu Kiris bija ti keenooto ku Esuwif. Burok b'eemo bee te bo bite kawaare kite Hirim Heetoofe hu búmoomi naane bite asaraha, kaanuku man keenooto ku Esuwif ni káyini káyemi kaasarah keetoofe Atambatun, ku Búwejet Beenabe bu bíkajine bija te o. 17Náami naane íhine i t'afeeneŋ ni Yesu Kiris, íyinooni kasaŋgoor nu burok b'eemo bu te bo bija t'Atambatun. 18Ábuki ikañenut kasoku bike fe t'arkut bi Kiris áhine bu aŋaasan t'íñje. Bo beemo fu man keenooto ku Esuwif ni kájeŋgin Atambatun. Áhinahin bo ti kirim kiŋk'isok, ni manoŋkar múuma. 19Áhinahin bo ni sembe ti beehaŋe bu ésuk i kikaw, ni ti sembe site Búwejet Beenabe bu. Iye i iwaare fu fe Hirim Heetoofe hite hu Kiris tánotan fe, huta hu Serusalem bija yooŋ Iliri. 20Abe íhabaneinohabanein kaanuku iŋ'iwaare Hirim Heetoofe hu tu búsuk bu t'an ajamoorut du huruwu hite Kiris, kaanuku man itim'ibin isiiŋan kiñaan kúuma ti kite ake. 21Íhinahin naane Míkiñjin mu musoke i. Meenaan: «Keesokutee ku moone mu kajukio, abe kéemusut ku kajamu huruwu hoone, boko kajoku.» 22Bondu ifi bifandam kakolen h'íbinaariit hu t'aruun. 23Abajee simit naane ímaŋie i bibin kajukuuun. Bare makamu hahiye ihabana burok búuma tu búsuk bondu, 24eenaan íñje káŋaasina t'aruun iijukuun kane íyemi ti bija Esipañ. Iyu, n'aŋ'áriyiniam káyokunan íñje ti bija bu. Bare mánoman íñje bifiyo dikee t'aruun man ehelam n'erooŋo. 25T'eemo dee bare, iija Serusalem nu kuboñ bija ti bakan kite Atambatun keeemo ku bo. 26Ábuki bakate ku Maseduwan kéeyilene ku, ni bakate ku Akayi kategateg bija ti bakan kite Atambatun bakate ku Serusalem keebajut ku. 27Boko kanoŋke fu keeteg, bare kafiyafiya káyekiiin kaamaag. Ábuki naane aamo i Esuwif i kéeyilene ku ti Kiris káyokunaniinyokunan keebaj káyilen, boko yooŋ keenooto ku Esuwif kawariinwar káyokunan n'ebaj yeeniin. 28If'ija ayak abin áami isaaniin kuboñ ku, butum hahiyu íkolinaa tu bondu, n'iŋ'íŋaasin t'aruun iitik ija Esipañ. 29Abe bukuuramkuur kaanuku if'ija ibin t'aruun, kásoniyan kómbokun kéenuutina ti Kiris k'ibin fu ne ko. 30Kújakuwe, íñj'endu ti káwasiyanuun bonde t'Anahaan ite úne Yesu Kiris, ni ti naane Búwejet Beenabe bu ii bíhin úne núumaŋioori: árisiiŋoorein n'íñje ariilaw Atambatun árihabanein uŋu húuma hu. 31Arilaw man n'ifak ti bakate ku Súde kéeyilenut ku, abe bakan kite Atambatun keeemo ku Serusalem kikawiin nu kutoof tu kuboñ k'ija kee ne ko. 32Náami Atambatun af'aane hee, n'iŋ'íyini bibin t'aruun hikawam káatoofin, abe n'iŋ'ibaj t'aruun biriiko beetoofe. 33Atambatun aa awun káasuumaay ku aja áyemi n'aruun arireyi fe! Amiin.

will be added

X\