ROM 14

1Arijok áwariee bakan keebajoorut ku káyilen keeyane, abe atum'arisok meejakut tu boko iŋ'ite bimbi kayinoor. 2Ake kaanu abajutee doon d'áteŋaariit, ake eebajoorut káyilen keeyane n'afin aane áteŋaariit doon deebaje síhiinu. 3Eeene u aŋ'ateŋ doon areyi fe awarut kahuufu an éeteŋaariit u doon deebaje síhiinu, abe an éeteŋaariit u doon deebaje síhiinu awarut katinan aa ateŋ doon areyi fe, ábuki Atambatun ajokojok áwariee. 4Kame awe a̱amo fu aañ ayak aŋ'a̱tinan aroka ite ake? Af'ajok alitee tu burok boone, man yooŋ n'akananoor, an u t'aamo du tu burok bu kasokio naane áhine i. Abe akina kajoku alitee, ábuki Anahaan u áyinoonio káyokunan. 5Ake aŋ'ayinoor n'aane kike kunak kihaŋahaŋ kaaku, ake n'ayinoor n'aane kireyi fe ko kifeeneŋ ku. Huruw fe, beeemo bu ti hikawo buwarowar kakuuru. 6An af'aane hike hunak hihaŋahaŋ kaaku, áhinahin bo kaanuku aŋ'abin asokoroor Anahaan u. An u aa ateŋ doon areyi fe, áhinahin bo kaanuku aŋ'abin asokoroor Anahaan u, ábuki aŋ'aane Atambatun eyeehen bija tu buroon bu bamb'ateŋ. Abe an éeteŋaariit u doon deebaje síhiinu, áhinahin bo yooŋ kaanuku aŋ'abin asokoroor Anahaan u, abe aŋ'aane yooŋ Atambatun eyeehen tu buroon bamb'ateŋ. 7Múniyo uf'úyemi buroŋ, man yooŋ n'úket, úkiniooriit. 8Úne bokondu tu buroŋ bija t'Anahaan u, uŋ'úket yooŋ bija te o. Náami uf'úroŋ man yooŋ n'úket, Anahaan u akino fu úne. 9Ábuki Kiris aketaket abe n'arito t'eket i kaanuku éeyemi Anahaan ite u keekete ku ni keeroŋe ku. 10Náami awe, iŋi naŋ n'af'a̱tinan áwiyi húŋgowulan? Awe yooŋ iŋi naŋ n'af'a̱huuf áwiyi húŋgowulan? Úne úreyi fe bibin bisiiŋo hágila Atambatun eejoonan úne. 11Ábuki Míkiñjin mu meenaan: «Íñje Atemit eeemo u buroŋ inoŋke fu iisok iye: "Kúŋgowulan ku fe kájiŋgitan hágilaam, abe huruw fe kaseede eeene íñj'eemo fu Atambatun."» 12Náami huruw fe t'úne kakamu hágila Atambatun buroon b'áhine bu. 13Náami úraan kajoonanoor ku. Bonde b'úware fu kajoku te bo alitee: utum'úhin doon fe deeyino káhinu ake eeney, butum dite kayoosano ti kaahoofoor. 14Naane íhine i t'afeeneŋ n'Anahaan u Yesu, bukuuramkuur but kaanuku abajutee doon deekuurut. Bare an af'ayinoor n'aane dike doon dukuurut, do káyemi te o doon deekuurut. 15Af'á̱buj áwiyi ehel iŋ'ite doon d'a̱teŋe, anokooreenokoor kite á̱maŋiito. Doon dite kateŋu duwarut kákinineŋ n'á̱towutan an i Kiris akete uŋu hoone hu! 16Beejake bu t'aruun buwarut káyemi ti bakaaku húkuuseima hite kasoku te bo meejakut. 17Ábuki Jáyi jite Atambatun buroon bíteiit buñoofo bu man yooŋ búhujo bu; jo jite kájubu, ni káasuumaay, ni katoofu, abe bondu fe tu Búwejet Beenabe bu t'ufu búnuutin. 18An af'áhin burok bite Kiris naane iyu, o katoofu Atambatun, abe ésuk i yooŋ kasoku te o beejake. 19Náami úŋes bimbi bíkinineŋ núuriiko t'afeeneŋ ti káasuumaay, abe ni bilitan yooŋ káyilen kite bakan úne. 20Doon dite kateŋu duwarut kákinineŋ n'á̱buj burok bite Atambatun. Múniyo buroon bu fe bijakajak kateŋu. Bare kateŋu buroon béeyinie kayoosan ake ti kaahoofoor, bondu bijakut. 21Kateŋaate efuwa, ni káhujaate ehob, ni biteñeko doon fe deeyino kayoosan an éeyilene ti kaahoofoor, bondu bijakajak. 22B'a̱yinoore bu tu bondu, a̱jok bo ti hikawi hágila Atambatun, atum'a̱sok bo an. Atoof t'an i hikawo híteyooraariit tu buroon bamb'áhin! 23Bare an eeteŋe dike doon, abe bare hikawo hiteyoorateyoor, ayoosanooraa, ábuki ehelo esokut. Doon fe d'an áhine t'ehelo esokut, diyu kaahoofoor.

will be added

X\