KAFEEÑAL KU 8

1H'Ametek u ákotine hu húkotanin hutoken hu nu kúsuba, n'átumb akoowan kem tu bufor bu areeŋ egenawala ewahatu. 2Abe n'ijuk emalaka i hutok ni bákasuba ku kiŋki kasiiŋo hágila Atambatun. Ni kawunee wúbiinu weemo hutok nu wúsuba. 3Ake amalaka yooŋ n'abin, abe n'asiiŋo kaagoroor n'ataabul ite wusarah wu. Ajokajok tu sumoŋio báasufum bite ejuraay bite éwurus. Ni kawuno ejuraay úkaan kaanuku eesarah yo t'ataabul ite wusarah wu ite éwurus i eeemo u hágila eriikeey ite híyiaate hu, yeeriboor ni kalawu kite bakan kite Atambatun kareyi fe. 4Hárunda hite ejuraay i nu húnuutin t'emoŋu yite amalaka u heeja t'etiir hágila Atambatun. Bakan k'Atambatun akino ku, kalawu kooniin yooŋ ni kija t'etiir. 5Ahaban, amalaka u n'ásik báasufum bite ejuraay i, eehoojan bo bib ni sineemak site ataabul ite wusarah wu, abe n'áfiiten bo t'etaam i. Biranda bu nu busok, n'awen toko, etiir i n'esib, etaam i yooŋ n'eyoŋoŋanooro. 6Náami emalaka i hutok ni bákasuba ku kéeyekie ku wúbiinu hutok nu wúsuba wu ni kafare kaanuku keesok te wo. 7Amalaka átiyar u n'asok ti káabiinu koone. Egalas n'ehaŋ énubin t'etaam i yéegiiloole ni sineemak, ni halan. Efej efeeneŋ ti síhaaji site etaam i n'ésufo, efeeneŋ ti síhaaji site ñunukanuk ñu n'ésufo, abe mahos meeleebejane mu fe nu músufo. 8Amalaka ásooboriyan u n'asok ti káabiinu koone. Dike doon naane hirij hómbombokun héetife ni dífiitenee ti han hu. Efej efeeneŋ ti síhaaji site han hu n'ehosanooro halan. 9Efeeneŋ ti síhaaji site buroon bite ti han hu beebaje bu síhiinu n'eket, efeeneŋ yooŋ ti síhaaji site bisahar bu n'ébujo. 10Amalaka áhaajiyan u n'asok ti káabiinu koone. Káaloofiiloof kómbokun kéetife naane híit ni kíneyin tu bufor bu. Ni kiney t'efej efeeneŋ ti síhaaji site móhujo míniina fe. 11(Káaloofiiloof kondu huruwu hite te ko Kátiku.) Efej efeeneŋ ti síhaaji site móhujo mu fe n'étik, abe bakan keehooje-hooj ni kaket iŋi naane káhujee i tu móhujo mu, ábuki mítikatik. 12Amalaka ábaakiiriyan u n'asok ti káabiinu koone. Efej efeeneŋ ti síhaaji site taanak tu n'émiñee, n'efeeneŋ ti síhaaji site hiim hu, n'efeeneŋ ti síhaaji site búloofiiloof bu, ayak abin áami efej efeeneŋ ti síhaaji site buroon bondu ébaania. T'efej efeeneŋ ti síhaaji site hunak hu, ajaaŋutee naane aa afiy ajaaŋee, bija yooŋ huhuk hu fe. 13N'isooñ íheelin, n'ijuk kalañjaŋanaa tu búwiito, abe kiliŋanaliŋan. N'ijam ko ni kitaŋk keene: «Kátaañi! Kátaañi! Afin ayak buŋ kátaañi ti bakate etaam i kane wúbiinu wute bakaaku emalaka bákahaaji ku wusok!»

will be added

X\