KAFEEÑAL KU 7

1Hunuut toko, n'ijuk emalaka bakabaakiir ti kasiiŋee tu suwus sibaakiir site etaam i. Kajokajok siyam sibaakiir site etaam i kaanuku mayet eyam etum'etib t'etaam i, ni ti han hu, man yooŋ ti nike nunukanuk. 2Abe n'ijuk ake amalaka ti bisiro, ánuutin káasiŋ ki taanak tu tundu túnuutin, abe n'ajok t'emoŋio éenee yiyi káhin ne yo t'ésuk i ékeetanuma yite Atambatun eeemo u buroŋ. N'áhamin ataŋk n'emalaka i bakabaakiir ku k'Atambatun awune ku sembe site kábuju etaam i ni han hu aaniin: 3«Atum'arifin áribuj etaam i, ni han hu, nu ñunukanuk ñu; ajendan káyemi úhina bíkeetanuma tu kúyuut kite eroka yite Atambatun ite úne.» 4Ake n'asokam bakayem ki kaja fu káhinu bíkeetanuma bite Atambatun tu kúyuut: kaamo súñjune téemeer, nu súñjune bakan bákasuba ni sibaakiir tu butoŋ bánoban fe ti bakañi Israyel. 5Kaamo súñjune sumoŋu nu súsuba ti bakañi Suda ni káhinee bíkeetanuma tu kúyuut; ti bakañi Ruben, kaamo súñjune sumoŋu nu súsuba; ti bakañi Gad, kaamo súñjune sumoŋu nu súsuba; 6ti bakañi Aser, kaamo súñjune sumoŋu nu súsuba; ti bakañi Neftali, kaamo súñjune sumoŋu nu súsuba; ti bakañi Manase, kaamo súñjune sumoŋu nu súsuba; 7ti bakañi Simiyoŋ, kaamo súñjune sumoŋu nu súsuba; ti bakañi Lefi, kaamo súñjune sumoŋu nu súsuba; ti bakañi Isakar, kaamo súñjune sumoŋu nu súsuba; 8ti bakañi Sabulon, kaamo súñjune sumoŋu nu súsuba; ti bakañi Siseef, kaamo súñjune sumoŋu nu súsuba; ti bakañi Beŋsame, kaamo súñjune sumoŋu nu súsuba. 9Hunuut toko, n'ijuk hahooja hómbokun h'an ayinaat kafinu: biheet bánoban, ni bakate búsuk bánoban, ni bakan kánokan, ni bakate kíhaminiin kánokan. Kasiiŋasiiŋo hágila eriikeey ite híyiaate hu, hágila yooŋ Ametek u. Kasiimasiimo wañ weefañje, abe ni kajok kijar tu sumoŋiiin. 10N'iŋi kataŋk t'etiir kaane: «Atambatun ite úne eeriikee u t'eriikeey ite híyiaate hu, n'Ametek u kafakane fu úne!» 11Abe emalaka i kareyi fe ni kasiiŋo kaŋolool eriikeey ite híyiaate hu, ni bíhaaniin bu, nu muroon mibaakiir meeroŋe mu. Ni kájiŋgitan hágila eriikeey i, keeya kúyuutiin t'etaam, abe ni kasokoroor Atambatun 12ti kaanu: «Amiin! Atambatun ite úne aja ákini hiraanu kuhooñu ku, ni kániku ku, nu búwesinato bu, nu kusokorooru ku, ni sembe su, ni kámaki ku! Úeno eyeehen ko kireyi fe! Amiin.» 13Ake ti bíhaaniin bu n'ákandijenam aanam: ---Bokondu keesiimee kii wañ weefañje wu, boko kaamo fu aañiin? Diin ti kánuutina fu? 14N'ísafino eeno: ---Ámuse u, bondu awe á̱meyie fu bo. Náami eeenam: ---Boko kaamo fu kéenuutina ku ti sílaam sómbombokun su. Kañawañaw wañ wooniin, abe ni kafañjan wo ti halan hite Ametek u. 15Iŋ'ite ho h'ifi kasiiŋo hágila eriikeey ite Atambatun yite híyiaate hu, abe ni kasokorooro káajiim ni kaajiŋgan t'enuuf yeene. An eeriikee u t'eriikeey ite híyiaate hu kajukariin akina humuumo. 16Karoŋut kajoñjolat, ñukuniin yooŋ ñuroŋut kasayi; taanak tu turoŋutiin kabutu, ni kásufa kánokan fe. 17Ábuki Ametek eeemo u kaagoroor n'eriikeey ite híyiaate hu aja fu kahaawiiin, abe o bija nu boko tu wúbulanu wute móhujo mummu muwun buroŋ bu. Abe Atambatun katotu muhuw mánoman ti ñíkiniin.

will be added

X\