KAFEEÑAL KU 22

1Hunuut toko, amalaka u n'áwufooram kaayelu kite móhujo mite buroŋ bu, kéenuutina ku t'eriikeey ite híyiaate hu yite i Atambatun n'Ametek u, abe ni kijaaŋ wililil naane eweer. 2Móhujo mu iŋi mitey t'etut éhuhu yite hikinu hu. Nunukanuk nu nunnu nuwun buroŋ bu númoomi ti kaayelu ku kilandoole du, abe uŋu nubuk keemo sumoŋu nu kúsuba t'emit i, hiim-hiim fe hifeeneŋ. Búsuus bite te no uŋu busonten biheet bu fe. 3Doon fe iti díyemi toko déewuumee. Eriikeey ite híyiaate hu yite i Atambatun n'Ametek u káyemi ti hikinu hu, abe eroka yite Atambatun kásukaayo. 4Boko kajuku buhooŋio, abe huruwu hoone kakiñjiee tu kúyuutiin. 5Káajiim kuroŋut kabaju, abe karoŋut bisawulo meejaaŋe mite ejaaŋana, ni mite taanak tu, ábuki Atemit Atambatun aja fu kajaaŋaniin, abe boko káyemi bákayi hiraanu. 6Abe amalaka u n'aanam: ---Kirim konde kúwoorawoor, kite nu múniyo. Abe Atemit, Atambatun aa awun eyiŋana yeene Búwejet boone áboñina fu amalaka oone eebin éewuforoor eroka yeene beeware bu kabaju memee. 7Yesu n'aane: ---Arijamatan, íñje bibin memee! Atoof t'an éejeŋgine u báhamin béenuutina bu t'Atambatun, beesokee bu ti kaawiit konde! 8Íñje Saaŋ, íñje ijame fu bondu, abe n'ijuk bo. Abe h'aamo hu ijama bo, abe n'ijuk bo ihaban, n'íjiŋgitan bite wuwot wute amalaka éewufooram u bo kaanuku íisukaayo. 9Bare n'aanam: ---A̱was, atum'á̱hin bondu! Íñje aroka yooŋ naane awe, naane yooŋ bakatii eyiŋana yite Atambatun, ni kéejeŋgine ku báhamin bite ti kaawiit konde. Á̱sukaay Atambatun! 10Abe n'aanam: ---Atum'á̱nuus báhamin béenuutina bu t'Atambatun, beesokee bu ti kaawiit konde, ábuki memee bo kabaju. 11An eejakut u ajok alitee ti kajakaate ku, an eekuurut u yooŋ ajok alitee ti kakuuraate ku; an eejake u ajok alitee ti kajaku ku, an eenabe u yooŋ ajok alitee ti kanabu ku. 12Yesu n'aane: ---Arijamatan, íñje bibin memee! Íñje bibin ni kisiibanu, abe íñje kabatikan huruw fe aliik tu doon d'aroke du. 13Íñj'eemo fu átiyar u n'araan u toko, kájabina ku ni bihabanooreey bu. 14Atoof ti kiŋki kañaw wañ wooniin. Boko kaŋaasu tu wuruŋ wute hikinu hu keeyooso, abe n'iŋi káyini kateŋu ti miriyaay mite nunukanuk nunnu nuwun buroŋ bu. 15Bare kiŋki káhin meejakut mu, n'élugusa i, ni kiŋki kaŋot ni bakan ki kaseñeit ku, ni kiŋki kayool bakan, ni kiŋki kásukaay ñúwisenum ñu, n'ejuusa i fe kiŋki kámaŋi buroon bite haajuus hu, boko káyemi tíyaŋ! 16«Íñje Yesu íboñina fu amalaka úuma eebin eesokuun bo aruun kéeyilene ku. Íñje ite tu butoŋ bite áyi u Dafit, íñj'eemo fu yooŋ kaarabu ku.» 17Búwejet Beenabe bu n'anaare ite Ametek u ni kaano: «A̱bin!» An yooŋ eejame bonde aja aano: «A̱bin!» An i nukuno nisaye abin. An éemaŋie búhujo tu móhujo mite buroŋ bu aja áhujo te mo fuufu. 18Íñje Saaŋ íñj'endu ti káyeegal an fe eejame báhamin béenuutina bu t'Atambatun, beesokee bu ti kaawiit konde: an af'áwutiyen toko dike doon, Atambatun káwutiyeno wútaañi weesokee wu ti kaawiit konde. 19Abe an n'afin anuutan dike doon ti báhamin béenuutina bu t'Atambatun, beesokee bu ti kaawiit konde, Atambatun kanuutano húrub hoone tu nunukanuk nunnu nuwun buroŋ bu, nu húrub hoone yooŋ ti hikinu heenabe hu heesokee hu ti kaawiit konde. 20An eeseedee u kaanuku bondu fe bite nu múniyo aane: «Hee, íñje bibin memee!» Amiin! A̱bin Anahaan u Yesu! 21Anahaan u Yesu aja ásoniyanuun arireyi fe.

will be added

X\