KAFEEÑAL KU 2

1---A̱kiñj amalaka ite bakate ku Efees kéeyilene ku a̱ano: «An eejoke u t'emoŋio yaatos i wúloofiiloof wu hutok nu wúsuba wu, abe n'aŋ'añaah t'etut báanaŋum bite búrundoora bu beeemo bu hutok nu súsuba bite éwurus i aane: 2ímoomi buroon b'á̱hine bu bireyi fe, ni naane aa á̱miñooro tu burok, ni naane aa á̱muñ yooŋ. Ímoomi kaanuku a̱yinaat kakinu ni bakan keejakut ku. A̱jondomanajondoman yooŋ jak ti kiŋki kaane boko kaamo epotor ayak a̱juk kaanuku nu múniyoiit, boko kajuuse. 3Ímoomi yooŋ kaanuku á̱muñamuñ aa, a̱jukajuk sílaam uŋu húuma hu, abe a̱ruuseit hikee. 4Bare b'ítaañiane bu t'awe beemo fu bonde: aŋkut á̱maŋiam naane hítiyar hu. 5Á̱baŋino t'a̱bine du a̱ney. A̱watanooro wuhoofoor wúuwe, abe n'aŋ'á̱hin ajakee naane aa á̱hinaani ti kátiyar ku. Afut'a̱watanooro, n'iŋ'ibin t'awe, abe n'iŋ'inuutan báanaŋum bite árundoora úuwe ti beemo du. 6Bare beetoofam bu t'awe beemo fu bonde: a̱huufahuuf naane íñje bi bakan keeriboore ku ni Nikola bimbi káhin. 7«An fe eebaje wúkondin ánandin naŋ nu Búwejet bu busoke fu kéeyilene ku! «An fe eeyak kariiŋan, íñje kawunio eeteŋ ti miriyaay mite nunukanuk nunnu nuwun buroŋ bu neeemo nu t'etiir t'etool ite Atambatun.» 8---A̱kiñj amalaka ite bakate ku Simirn kéeyilene ku a̱ano: «An eeemo u átiyar u n'araan u toko, éeketaanie u, abe n'aritanee t'eket i aane: 9ímoomi sílaam s'a̱amo su te so, ímoomi kabajaate kúuwe, bare t'Atambatun awe husaanum! Ijamajam kílafatinu ku kiŋki kálafatini. Bakan kondu iŋi kaane boko kaamo Esuwif, bare nu múniyoiit: boko bakan bakate Setani! 10Atum'á̱koleyi sílaam s'a̱ja su kajuku. A̱jam i: Setani kajoku bakaake t'aruun aja akul kaanuku man n'áhinuun áriiwuŋg Atambatun kiñaawu, abe aruun kajuku sílaam kunak keereeŋe sumoŋu. Bare a̱jok alitee hutoof yooŋ ni kayooli, abe n'iŋ'iwuni buroŋ bu naane hisiibanu. 11«An fe eebaje wúkondin ánandin naŋ nu Búwejet bu busoke fu kéeyilene ku! «An fe eeyak kariiŋan, eket ésooboriyan i et'émiño.» 12---A̱kiñj amalaka ite bakate ku Perigam kéeyilene ku a̱ano: «An éeyekie u kábura keebaliŋge ku aane: 13ímoomi t'a̱kine du: Setani anaŋanaŋ toko eriikeey yeene yite híyiaate hu, bare a̱jokajok t'íñje alit tip. Antipas aseede úuma éejeŋginam u ayooleeyool t'aruun, toko ti Setani akine du. Awe bare, naane bondu bibaje i fe, a̱wasut káyilen ku t'íñje. 14Bare ítaañianataañian t'awe ti bike: bakaake bokondu t'awe keejoke ti bi Balam abine bu aliiken ésuk i kóyin sifaaf. Balam aliikene fu Balak eetiŋg bakate ku Israyel ti kaahoofoor, ti kateŋu kite efuwa yite sunuk seesarahee tu ñúwisenum, nu huŋotu hu ni bakan ki kaseñeit. 15N'abaj yooŋ t'awe bakan keejoke ti bi bakan keeriboore ku ni Nikola bimbi kaliiken ésuk i. 16A̱watanooro wuhoofoor wúuwe. Káhinaate iyu, n'iŋ'ibin t'awe memee, abe n'iŋ'itiik bakan kondu ni kábura ku kiŋki kíŋaasin tu butumam. 17«An fe eebaje wúkondin ánandin naŋ nu Búwejet bu busoke fu kéeyilene ku! «An fe eeyak kariiŋan, íñje kawunio t'emaan yéenuusee i eeteŋ. Íñje kasaano yooŋ ejuju yeefañje tu huruwu híyeni hikiñjee, abe an fe at'ámeyi huruwu hondu, kane arko taŋ akina eesaanee u ho.» 18---A̱kiñj amalaka ite bakate ku Tiyatiir kéeyilene ku a̱ano: «Añi ite Atambatun ite ñíkin ñeeemo ñu naane sineemak, abe wuwoto n'uŋu wútumb wusilan naane mañ meebunane aane: 19ímoomi buroon b'á̱hine bu fe. Ímoomi kaanuku á̱maŋamaŋi an, awe yooŋ an ite bifeeneŋ. Á̱ñiŋkaanañiŋkaan tu burok búuma, abe aŋ'á̱muñ dómbokun. Ímoomi kaanuku bamb'á̱hin hahiye bihaŋahaŋ bítiyar bu. 20Bare b'ítaañiane bu t'awe beemo fu bonde: a̱wasawas Sesabel, anaare ondu eeene u akina aamo ayiŋana ite Atambatun eebuut bakan kúuma ti naane aa aliikeniin huŋotu hu ni bakan ki kaseñeit, ni kateŋu kite efuwa yite sunuk seesarahee tu ñúwisenum. 21Iwasowas ewaaŋ, akina Sesabel, kaanuku man n'awatanooro, bare ateñekateñeko karaan bufurukato bu. 22Iŋ'ite ho aamo fu íñje káfiiteno t'elal ite sílaam, abe kiŋki kafurukato ne o, ifit kawatanooro meejakut mondu, íñje káhiniiin yooŋ keejuk sílaam sómbokun. 23Íñje yooŋ kayoolu bakañio, abe bakate tu búsuk bu fe kéeyilene ku n'iŋi kánandin kaanuku íñj'eemo fu an éemeyie u biyinoor bite an, n'ehol yeene. Íñje kabatikan huruw fe t'aruun iliik tu buroon b'aroke bu. 24«Bare aruun bakaaku bakate ku Tiyatiir kéeyilene ku, ariteñekateñeko maliikenar mondu. N'ariteñeko yooŋ kámeyi bondu bimbi kaane: "béesulie bite bu Setani". Íñje isok fee n'aruun: it'isejanuun bike, 25kane arko taŋ bite kaanuku arijok kep alitee ti b'arijoke bu bija kóyin k'ibin ku. 26An fe eeyak kariiŋan, abe n'aŋ'áhin kep naane isoke i bija tu hunak hiraanu hu, íñje kawunio sembe ti siheet su fe. 27O kahaawu so nu hútaŋkaru hite mañ; o kawelej so naane simeenaay site ekaf. 28O kabaju sembe naane si Faafam awunam su. Íñje yooŋ kawunio kaarabu ku. 29«An fe eebaje wúkondin ánandin naŋ nu Búwejet bu busoke fu kéeyilene ku!»

will be added

X\