KAFEEÑAL KU 19

1Hunuut toko, n'ijam naane wuji wute bakan keehooje-hooj t'etiir bufor bu ti kataŋku uŋu weene: «Aleluya! Atambatun ite úne akino fu kafaku ku, ni kániku ku, ni sembe su! 2Majoonanar moone mite nu múniyo, abe mujoŋoorajoŋoor! Ábuki ajoonana hikinu hómbombokun hu huhu hubuusatan yéeni etaam i nu bufurukato bite te ho. Anukana te ho aŋarkeyi naane húyuusayuus halan hite eroka yeene.» 3Wuji wu nu wusooñ weene: «Aleluya! Hárunda hite hikinu héesufee hu hibaa birito hiraanu!» 4Bíhaaniin bu butuman ni bakabaakiir ku ni kásukaay, nu muroon mibaakiir meeroŋe mu, keesokoroor Atambatun eeriikee u t'eriikeey ite híyiaate hu abe ni kaane: «Amiin! Aleluya!» 5Kaaji ni kíhaminn t'eriikeey ite híyiaate hu keene: «Arisokoroor Atambatun ite úne aruun arireyi fe, sifaaf su ni biñi bu keeemo ku eroka yeene kéejeŋgino ku!» 6Abe n'ijam naane wuji wute bakan keehooje-hooj, uŋu wusok naane kúsuw kite káajuŋeey, ni naane biranda bu. Wuji wu n'uŋu weene: «Aleluya! Ábuki Atemit, Atambatun ite úne eehaŋe u ebaja sembe asiiŋana jáyi joone! 7Kikaw úne kutoof, abe n'útoofan núunikano, ábuki asibar ite Ametek u afaraa, abe huyoosan hoone hireeŋa! 8Kawunowun eesiimo wañ wéewarie-wari, weesilane, abe nu wukuur but.» (Kaawañ kéewarie-warie ku keemo fu burok beejake bi bakan kite Atambatun káhine bu.) 9Amalaka u n'aanam: ---A̱kiñj bonde: atoof ti keeruwee ku bite hiriy hu tu huyoosan hite asibar ite Ametek u. Abe n'asooñ aanam: ---Diye kirim kite Atambatun, kirim kite nu múniyo. 10Náami íjiŋgitana bite wuwoto kaanuku íisukaayo, bare n'aanam: ---A̱was, atum'á̱hin bondu! Íñje aroka yooŋ naane awe, ni bakatii keejoke ku múniyo mi Yesu áwufoore mu. Á̱sukaay Atambatun! Múniyo mi Yesu áwufoore mu meemo fu búwejet beeemo bu t'eyiŋana yite Atambatun. 11Hunuut toko, n'ijuk bufor béefeŋginee, abe efaliñj yeefañje n'éŋaasin. An eerabee u te yo huruwu hoone Éejube u, huruwu hoone yooŋ Múniyo mu. Aŋ'ajoonan, abe n'átuum ajoŋooree. 12Ñíkino iŋi ñisilan naane sineemak, abe asolasol búkuhe beehooje bite híyiaate. Kakiñjakiñj te o huruwu h'an ámeyiit, kane arko akina taŋ. 13Asolasol kájufa kéetuusanee ti halan. Huruwu hoone «Hirim hite Atambatun». 14Esulaan i bakate ku t'etiir iŋi kasao ti hiñaawu. Kasiimasiimo wañ weefañje wéewarie naane, nu wukuur yooŋ but, abe karabarabo ti bifaliñj beefañje. 15Kábura keebaliŋge suf iŋi kíŋaasin tu butumo; ne ko n'aja fu kámiñu biheet bu fe. O kahaawu bo nu hútaŋkaru hite mañ, abe n'atuusan bo naane kireseŋ ti báatuusanum bite b'Atambatun eehaŋe u ebaja sembe bite bu kane ayiŋat dómbokun. 16Kakiñjakiñj ti kájufa koone nu tu huboŋo huruwu honde: «Áyi ite bákayi ku, n'Anahaan ite kunahaan ku». 17Abe n'ijuk ake amalaka eesiiŋee ti taanak tu. N'ataŋk áhamin ni bilele bu bumbu búwiito biliŋan aane bo: «Aribin, arikuukanooro bija bite hiriy hómbokun hu hite h'Atambatun! 18Aribin ariiteŋ kihaay kite bákayi ku, ni kite esulaan i n'eseef yeeniin, ni kite bifaliñj bu, ni kite bakan keerabee ku te bo, ni kite ésuk i fe, biñi bu ni sifaaf su, búsukateen bu ni keenooto ku búsukateen.» 19Náami ijuka éndakakureŋ i, ni bákayi kite etaam i, n'esulaan yeeniin ni kakuukanooro keetiik n'an eerabee u t'efaliñj i n'esulaan yeene. 20Éndakakureŋ i n'ejokee, yo n'an u aa ajuus aane akina ayiŋana ite Atambatun, eebine u áhin buroon beehaŋe bu ésuk i kikaw tu buhooŋu éndakakureŋ i. (Nu bondu beehaŋe bu ésuk i kikaw n'abuute fu bakan kéeyekie ku ékeetanuma yite éndakakureŋ i, abe n'iŋi kásukaay búwisenum bite te yo.) Éndakakureŋ i n'an u aa ajuus aane akina ayiŋana ite Atambatun ni káfiitenee bároŋari ti han hite sineemak su n'efor yéesufe i. 21Keeŋeñene ku ni kayoolee ni kábura ku kiŋki kíŋaasin tu butum bite an eerabee u t'efaliñj i, abe bilele bu fe ni biteŋ kihaay kooniin biyak bibir bib.

will be added

X\