KAFEEÑAL KU 18

1Hunuut toko, n'ijuk ake amalaka éenuutina t'etiir bufor bu áwanein. Sembe soone sihahahah, abe kániku koone ni kijaaŋan etaam i. 2N'ataŋk t'etiir aane: «Eneya, Babilon yómbombokun i eneya! Éyemia báakinum bite sirab, nu ñúwejet ñánoñan ñeejakut, ni bilele bánoban fe beekuurut abe nu búhuufunani. 3Ábuki biheet bu fe búhujahujo t'ébiñ ite bufurukato bite te yo beehahe bu biyak uŋu búwusan. Bákayi kite etaam i kaŋotaŋot ne yo, abe éjulaata i bakate t'etaam i káyemia kusaanum t'ebaj yeene yeehahe i yite bufurukato bu.» 4Abe n'ijam kike kaaji kéehaminna t'etiir bufor bu keene: «Aruun bakan kúuma, arinuut ti hikinu hondu. Af'árihin iyu, man arimaat tu wuhoofoor wute te ho, man arimaat yooŋ tu wútaañi weeja wu kámiñu ho. 5Ábuki wuhoofoor wute te ho wujuulajuulo bija yooŋ t'etiir bufor bu, abe Atambatun afiilut kinij kite te ho keejakut ku. 6Arinij yooŋ te ho naane hinije i t'aruun. Aribatikan ho kireeŋ kúsuba meejakut mi híhine mu. Abe ekot ite te ho tundu huwun bakaaku kéehujo, arihoojan ho yo kúsuba n'ébiñ yeehaŋe kayaŋgu. 7Árihin ho heejuk sílaam, nu wútaañi are ni naane hínikaanie i, are yooŋ n'ebaj yeehahe i yi híbajaanie i. Iŋi hiyinoor yéeni ni heene: "Iriikariiko diye naane áyi anaare, inooto anaare a áyino akete, abe it'ímus kátiñja hikee." 8Iŋ'ite ho aamo fu wútaañi wonde wunaŋeenaŋ bija te ho: bujoñjol bu, n'eket i, ni kátiñja ku. Wo kámiñu ho tu hunak hifeeneŋ taŋ, abe sineemak su kásufu ho. Ábuki Atemit, Atambatun eejoonane u ho abajabaj sembe.» 9Bákayi kite etaam i fe keeŋote ku ne ho, abe ni kariy yooŋ t'ebaj ite te ho yeehahe i, boko kayiyu, abe ni kalolobool iŋ'ite hikinu hondu kane kajuk hárunda hite kásufa kite te ho. 10Boko bísiiŋeina akambee iŋi ekoloowe sílaam si hikinu hondu hija su kajuku, abe n'iŋi kaane: «Híiña! Híiña! Babilon yómbombokun i yeebaje i sembe, t'ewahatu efeeneŋ taŋ náami Atambatun ajoonani yooŋ?» 11Éjulaata i bakate t'etaam i ni kayiy yooŋ, abe n'iŋi kalolobool iŋ'ite te ho, ábuki an aŋkut ajoohen buroon booniin. 12Buroon bondu beemo fu éwurus i, ehalis i, ni baabu buroon bite kasaŋgan eni beeseere-seer; bípiis béewarie-wari, beelaañe ni beelaañane, bike bite suwa; efasoŋ-fasoŋ fe yite wubiliŋgit weehunde, buroon bánoban beerokee nu wúŋiiŋ wute siñaab su weebaase wu, nu buroon bánoban beerokee nu wubiliŋgit wéetaañie kabaju, man yooŋ ni ñañ, man yooŋ nu bujuju béewarie-wari; 13mátiso mánoman, búsuus beehunde, miir i, ejuraay i; ébiñ i, éfariŋ i, édugub i; suboos su, síkarniina su, sifaliñj su, bisaret bu, búsukateen bu ni kéejokine ku bite kitiik ku. 14Éjulaata yendu ni kaane hikinu hu: «Buroon beetoofe b'á̱maŋie bu yéeni kabaju bifaki, ebaj íiwe ereyi fe á̱buura yo yooŋ, a̱roŋut yo hikee-kee kajuku!» 15Éjulaata i kiŋki kájula yéeni ti hikinu hondu ayak abin áami káyemia kusaanum bísiiŋeina akambee iŋi ekoloowe sílaam si hija su kajuku. Boko kayiyu, ni kalolobool, 16abe n'iŋi kaane: «Híiña! Híiña hikinu hómbombokun hu! Hisiimasiimo yéeni wañ wéewarie-wari, weelaañe ni weelaañane, nu husol yooŋ búwurus, ni bike buroon beeseere-seer bite kasaŋgan eni. 17T'ewahatu efeeneŋ taŋ náami ebaj ite te ho fe ébujaa?» Eteyana yite bisahar bu kareyi fe, ni kiŋki karok te bo, ni ki kájufe ku fe, ni kiŋki kájula te bo fe ni kásiiŋein akambee. 18Hi kajuke hu hárunda hite kásufa kite hikinu hu ni kataŋk kaane: «Hikinu hómbombokun naane hondu húmusut kabaju!» 19N'iŋi kahor hafor hu ti kikawiin, iŋi kataŋk keeyiy, abe ni kalolobool kaane: «Híiña! Híiña hikinu hómbombokun hu! Ebaj ite bakate bisahar beeemo bu ti han hu fe, t'ebaj ite hikinu hondu t'énuutina fu. T'ewahatu efeeneŋ taŋ, náami húbujaa?» 20Awe bufor bu, hikawi hutoof naane hikinu hu húbujee i! Kikawuun kutoof yooŋ, aruun bakan kite Atambatun, n'epotor i, n'eyiŋana yeene, ábuki Atambatun ajoonana ho iŋi kátaañi ki híhinuun ku! 21Náami ake amalaka eebaje sembe ásika ejuju yómbokun yeeniŋe naane, abe n'áfiiten yo ti han hu o ti kaanu: «Awe yooŋ Babilon hikinu hómbombokun hu, iyu a a̱yakee fu káfiiten ni sembe, abe an aroŋut káheelin t'awe hikee-kee. 22An aroŋut kajamu t'awe ake ti káyifu ekondiŋ, man yooŋ an tu kuhooñu, man yooŋ an ti kasoku ti hiñjeŋ, man yooŋ ti káabiinu. Kiŋki káhin yooŋ saama náami burok, an aroŋut káheelin tu boko t'awe. An yooŋ aroŋut kajamu t'awe hítigisu t'etiŋanu. 23Ejaaŋana eroŋut kawitikanee t'awe, an yooŋ aroŋut kajamu t'awe huyoosan. Éjulaata íiwe káyemie fu kómbokun ku t'etaam i, abe a̱buutabuut biheet bu fe ni kálugus kúuwe. 24Náami bondu fe bija fu kabajii, ábuki halan hite eyiŋana yite Atambatun hujukeejuk t'awe, ni hite bakan koone, ni hite bakan keeyoolee ku fe t'etaam i.»

will be added

X\