KAFEEÑAL KU 17

1Hunuut toko, ake t'emalaka i hutok ni bákasuba ku kéeyekie ku sukot hutok nu súsuba su n'abin eeenam: ---A̱bin, abe n'iŋ'íwufoori buŋ b'anaare u aa afurukato ahah iya ayakee fu kajoonan. Anaare ondu, akina hikinu hómbokun heenutee kaagoroor nu wuyelu weehooje. 2Bákayi kite etaam i kaŋotaŋot ne o, ésuk i yooŋ éhujahujo ébiñ yeene yite bufurukato bu eyak éwusan. 3Búwejet Beenabe bu nu bujokam, abe amalaka u n'aja n'íñje t'eke eramba. N'ijuk bo anaare u t'ariikee t'éndakakureŋ yeelaañe yite kikaw keemo hutok nu kúsuba, nu wusiin weemo sumoŋu, abe kuruwu kite kálafatin Atambatun kikiñjeekiñj t'eni i. 4Anaare u asiimasiimo wañ weelaañe wéewarie naane, ni weelaañane, abe n'asol búwurus, ni bike buroon beeseere-seer bite kasaŋgan eni. Ajokajok t'emoŋio ekot ite éwurus yeehooje bib nu buroon béekojie, ni beekuurut bite bufurukato boone. 5Iye u huruwu hoone hikiñjee fu tu húyuuto hukolofanee: «Babilon yómbombokun i, íñaay ite bufuruka bu, nu buroon béekojie bite etaam i.» 6N'ijuk kaanuku anaare ondu áwusanawusan. Áhujahujo halan hite bakan kite Atambatun, bakan keeyoolee ku iŋi naane ii kaseede Yesu. H'ijuko hu, n'ijahale dómbokun. 7Náami amalaka u eeenam: ---Kame iŋi naŋ n'a̱jahalee fu? Íñje káhandini béenuusee bite anaare u, n'éndakakureŋ yeeyito i, yéeyekie i kikaw ku hutok nu kúsuba ku, nu wusiin wu weemo sumoŋu. 8Éndakakureŋ y'a̱juke i émoomi yéeni buroŋ, bare eŋkut eroŋ. Yo kánuutina ti kaayeen kéesulie-sulie ku, bare yite bútowuto hiraanu. Bakate ku t'etaam i, ku kuruwu kooniin kikiñjutee ku ti kaawiit kite buroŋ bu huta h'etaam i eŋ'ebin éwuwanee, bijahale kane kajuk éndakakureŋ i, ábuki émoomi yéeni buroŋ, abe hahiye eŋkut eroŋ, bare yo kásooñina. 9«Bonde bíkandijenakandijen kámuusu nu búwesinato. Kikaw hutok nu kúsuba ku, diyu kirij keemo hutok nu kúsuba t'anaare u ariikee du. Kikaw kondu, bákayi yooŋ kaamo hutok ni bákasuba. 10Kaamo hutok tu boko kahabana híyiaate hooniin, ake ondu te ho, aau aroŋa. Bare af'aja abin, híyiaate hoone iti hifiyo. 11Éndakakureŋ yéeyemiaanie i buroŋ, abe bare eŋkut eroŋ, humuum hite te yo yooŋ ake áyi. O aamo fu atoken u ni bákahaaji. Akina ite ti bákayi ku hutok ni bákasuba ku, abe ite bútowuto hiraanu. 12«Wusiin wu sumoŋu w'a̱juke wu, diyu bákayi kaamo sumoŋu, abe híyiaate hooniin hisiiŋoorut. Bare boko kabaju sembe site káyemi bákayi n'éndakakureŋ i areeŋ ewahatu. 13Bákayi kondu doon difeeneŋ taŋ di kaja fu kaŋesu: keerok káhabanein bija t'éndakakureŋ i. 14Boko katiiku Ametek u, bare Ametek u kaheekiiin, ábuki akina aamo fu Anahaan ite kunahaan ku, akina yooŋ aamo fu Áyi ite bákayi ku. Bakan koone k'aruwe ku abe n'ajifan, bokondu kéejeŋgino ku kariiŋaniin yooŋ ne o.» 15Amalaka u n'asooñ aanam: ---Wuyelu w'a̱juke wu, t'anaare eefurukatee u ariikee du, diyu bakan, ni hahooja, ni biheet, ni kíhaminiin. 16Wusiin wu sumoŋu w'a̱juke wu n'éndakakureŋ i kahuufu anaare eefurukatee u. Boko karamu buroon boone fe, abe ni kahelo. Boko kateŋu kihaay koone, abe ni kásuf doon deeŋeñene du. 17Ábuki Atambatun ásikasik b'ámaŋie bu káhinu anaŋ tu ñúwejet ñooniin kaanuku kéehin bo. Boko kajamoor t'efeeneŋ kéesik sembe sooniin site híyiaate hu keerok bija t'éndakakureŋ i, ayak abin áami yooŋ báhamin b'Atambatun asoke bu bibaja. 18«Abe anaare ondu a a̱juke u, o aamo fu hikinu heebaje hu sembe ti bákayi kite etaam i.»

will be added

X\