KAFEEÑAL KU 16

1Hunuut toko, n'ijam kaaji kómbokun kéenuutina t'enuuf ite Atambatun, abe ni keene emalaka i hutok ni bákasuba ku: «Arija áriyuus t'etaam i sukot hutok nu súsuba su séeyekie su kayiŋat kite Atambatun!» 2Amalaka átiyar u n'aja, abe n'áyuus ekot yeene t'etaam i. Náami busontaay beejakut abe ni bíseñji ni bíŋaasin ti bakan kéeyekie ku ékeetanuma yite éndakakureŋ i, abe n'iŋi kásukaay búwisenum bite te yo. 3Amalaka ásooboriyan u n'áyuus ekot yeene ti han hu. Móhujo mu nu muhosan méeyemi naane halan hite an eekete, abe buroon beebaje bu síhiinu fe béeyemie bu ti han hu ni biket. 4Amalaka áhaajiyan u n'áyuus ekot yeene tu sujolob su, ni tánotan fe tu móhujo míniina meemo t'etaam i. Móhujo mu nu muhosan méeyemi halan. 5N'ijam amalaka eebaje u sembe tu móhujo mu n'aane Atambatun: «Á̱jubajub naane a̱joonane i iye, awe Eenabe u, awe eeemo u, awe yooŋ éeyemie u. 6Ábuki káyuusayuus halan hite bakan kúuwe n'eyiŋana íiwe, abe hahiye a̱wuniinwun halan kéehujo. Boko kaŋese bo!» 7N'ijam kaaji kéehaminna t'ataabul ite wusarah wu keene: «Hee, Atemit, Atambatun eehaŋe u ebaja sembe, majoonanar múuwe mite nu múniyo, abe mujoŋoorajoŋoor!» 8Amalaka ábaakiiriyan u n'áyuus ekot yeene ti taanak tu. Nu tuwunee sembe site kabutu ésuk i ni sineemak site te to. 9Nu tubut ésuk i ni hásufa hómbombokun kayak kálafatin huruwu hite Atambatun eebaje u sembe tu wútaañi naane wondu. Bare ni kateñeko buwatanooro, ni kateñeko yooŋ kánikan Atambatun. 10Amalaka atoken u n'áyuus ekot yeene t'eriikeey ite éndakakureŋ i yite híyiaate hu. Ébaani i n'ékumbalool búsuk bite éndakakureŋ i. Ésuk i n'eŋ'eriŋgan iŋi káseñji taŋ. 11Ni kálafatin Atambatun ite bufor bu uŋu wúseñji wooniin nu busontaay booniin. Bare kawatanooreit kunoŋk kooniin keejakut ku. 12Amalaka atoken u n'afeeneŋ n'áyuus ekot yeene ti kaayelu kómbokun ku kiŋki kaane Ófurat. Móhujo mu nu musooŋ kaanuku meewas bákayi kéenuutina ku káasiŋ ki taanak tu tundu túnuutin keekan. 13N'ijuk sirab síhaaji seenokoore nu buhoon nu súnuutin, eke tu butum bite éjufuur i, eke tu butum bite éndakakureŋ i, eke tu butum bite an u aa ajuus aane akina ayiŋana ite Atambatun. 14Diyu ñúwejet ñite Setani ñiññi ñíhin buroon beehaŋe bu ésuk i kikaw. Ñúwejet ñondu t'éhaaji te ño ni ñija ti bákayi kite etaam i fe kaanuku ñeekuukaniin bija bite hitiik hu, tu hunak hómbokun hite h'Atambatun eehaŋe u ebaja sembe. 15Anahaan u n'aane: «Arijam, bibin búuma káfufu naane ákuw! Atoof t'an eeŋotut u, abe n'ajukar wañ woone kaanuku atum'abin aja fuufio ésuk i keejuk ñufuñ ñoone.» 16Sirab su nu sukuukan bákayi ku tindi kaane ti kíhaminiin kite Esuwif i «Arumagedoŋ». 17Amalaka atoken u ni bákasuba n'áyuus ekot yeene t'eyam i. Kaaji kómbokun ni kíhaminn t'enuuf ite Atambatun, t'eriikeey ite híyiaate hu keene: «Hahiyu ahabanee!» 18Etiir i eŋ'esib toko, n'awen toko, biranda bu yooŋ nu busok, abe etaam i n'eyoŋoŋanooro ni sembe. Buyoŋoŋanooro bite etaam i naane bondu búmusutee kajuku huta hu húŋgowulan aŋ'abin áwuwanee! 19Hikinu hómbokun hu ni hijeho héehin sifej síhaaji, abe kikinu kite tu búsuk bu fe nu kúbujo. Atambatun n'ábaŋino Babilon yómbokun i. N'áhujan yo ébiñ ite ekot ite kayiŋat koone kómbokun ku. 20Bikiŋk bu fe nu bumoj, an yooŋ aŋkut abin áheelin ti hirij. 21Kifiit kite egalas keeyino kafeese síkilo bakan bákasuba nu kúnuutin t'etiir bufor bu kéeneyin tu kúŋgowulan ku. Abe ésuk i ni kálafatin Atambatun iŋ'ite káseñji kondu kite egalas i, ábuki kátaañi kondu kihaŋahaŋ kahahu.

will be added

X\