KAFEEÑAL KU 15

1Bondu buwas, n'isooñ ijuk t'etiir bufor bu bike bómbokun beejahalam: emalaka kaamo hutok ni bákasuba keejoke wútaañi weemo hutok nu wúsuba. Wútaañi wondu weemo fu wuraanu wu, ábuki ne wo n'Atambatun aja fu karaan kayiŋat ku. 2N'ijuk naane han heesilane naane eweer, abe ni hígiilool ni sineemak. N'ijuk yooŋ keeriiŋane ku éndakakureŋ i, nu búwisenum bite te yo, ni naane huruwu hite te yo hije i ti kafinu. Kasiiŋasiiŋo ti han hondu heejaaŋe hu naane eweer, abe ni káyekan bukondiŋ b'Atambatun asaaniin bu. 3Iŋi kahooñ huhooñu hi Moyis aroka ite Atambatun abane hu, nu huhooñu h'Ametek u abane hu yooŋ. Iŋi kaane: «Atemit, Atambatun eehaŋe u ebaja sembe, burok búuwe bihahahah, abe bijaaŋajaaŋo ésuk i! Awe Áyi ite biheet bu, máhinar múuwe meejoŋoore, abe mite nu múniyo! 4Aañ atuf'ákoleyii, Atemit? Aañ ayak fu biteñeko kánikani? Ábuki awe unooni taŋ a̱nabe fu, abe biheet bu fe bibin béesukaayi, aŋarkeyi naane bukuura kaanuku manoŋkar múuwe mujoŋoorajoŋoor.» 5Hunuut toko, n'ijuk t'etiir bufor bu enuuf ite Atambatun yéeyekie i anuuf u aa áwufoor bakan koone kaanuku ondu nu boko. Enuuf ite Atambatun n'éfeŋgino, 6abe emalaka i hutok ni bákasuba ku keejoke ku wútaañi wu hutok nu wúsuba wu ni kánuutin. Kasiimasiimo wañ weefañje daŋ weesilane, abe ni kawuuj ñibaŋ ñite éwurus tu ñúsusiin. 7Ake tu muroon mibaakiir meeroŋe mu n'asaan emalaka i hutok ni bákasuba ku sukot site éwurus seemo hutok nu súsuba, seehooje bib ni kayiŋat kite Atambatun eeemo u buroŋ hiraanu. 8Enuuf ite Atambatun n'ehooj bib ni hárunda héenuutina ti kániku koone ni sembe soone. An fe ayinaat buyooso t'enuuf ite Atambatun, bija yooŋ kóyin ku wútaañi wu hutok nu wúsuba w'emalaka i hutok ni bákasuba ku kásikina wu wuyak ku bihabano.

will be added

X\