KAFEEÑAL KU 14

1N'isooñ íheelin, n'ijuk Ametek u t'asiiŋee ti hirij hihi kaane Siyoŋ, akina ni bakan kaamo súñjune téemeer, nu súñjune bakan bákasuba ni sibaakiir, abe huruwu hoone ni hite hu Faafo kikiñjeekiñj tu kúyuutiin. 2N'ijam kaaji kéehaminna t'etiir bufor bu, uŋu kusok naane kúsuw kite káajuŋeey, naane yooŋ biranda bu. Kaaji k'ijame ku kúmoomi naane an eeemo ti káyifu t'ekondiŋ. 3Bakan kondu keehooje kii kasiiŋasiiŋo hágila eriikeey ite híyiaate hu, hágila yooŋ muroon mibaakiir meeroŋe mu, ni bíhaaniin bu, abe iŋi kahooñ huhooñu híyeni. An fe ayinaat kaliiken huhooñu hondu, kane arko taŋ bakan kondu súñjune téemeer, nu súñjune bakan bákasuba ni sibaakiir su keejoohenee ku t'etaam i. 4Boko kaamo fu kéemeyiit ku haare, kakuurakuur but. Iŋi kasa Ametek u tánotan fe t'aje. Kájoohenneejoohenn tu kúŋgowulan ku kaanuku kéeyemi étiyar i ti kawuniee ku Atambatun n'Ametek u. 5Haajuus húmusut kánuutina tu ñutumiin, abe kayinaatee kawatan tu doon. 6N'ijuk ake amalaka tu búwiito, abe aliŋanaliŋan. Ákooki Hirim Heetoofe héehabanaariit hite kawaare bakate ku t'etaam i fe: bakate biheet bánoban, nu búsuk bánoban, ni bakate kíhaminiin kánokan, ni bakan kánokan. 7N'aŋ'ataŋk t'etiir aane: «Árikoleyi Atambatun, abe n'árinikano! Ábuki ewahatu y'aja i kajoonan kite kúŋgowulan ku ereeŋa. Árisukaay an éewuwane u bufor bu, n'etaam i, ni han hu, ni tánotan fe tu móhujo míniina meemo!» 8Ake amalaka ásooboriyan n'ásein o ti kaanu: «Eneya, Babilon hikinu hómbombokun hu huhu húhujan yéeni biheet bu fe ébiñ ite bufurukato bite te ho beehahe bu biyak uŋu búwusan, eneya tuus!» 9Amalaka áhaajiyan u n'ásein ti bákasuba ku étiyar i ti kataŋku aŋ'aane: «An éesukaaye éndakakureŋ i nu búwisenum bite te yo, abe n'áhinee ékeetanuma tu húyuut man yooŋ t'emoŋu, 10o yooŋ búhujo ébiñ ite Atambatun yite i kane ayiŋat! Ébiñ yendu káyunanee t'ejoofutee t'ekot ite Atambatun yite i kane ayiŋat. Kiŋki kanij ii fe káhihinooree ti sineemak su n'efor yéesufe i tu buhooŋu emalaka i keenabe ku n'Ametek u. 11Hárunda hite sineemak seeja su káhihinooriin hibaa birito hiraanu. Abe bokondu kéesukaaye ku éndakakureŋ i nu búwisenum bite te yo, n'an fe éeyekie ékeetanuma yite huruwu hite te yo, iti kayih hikee-kee, abajut kaajiŋgan, abajut káajiim.» 12Iŋ'ite ho aamo fu bakan kite Atambatun, kiŋki kájeŋgin buluwa boone, abe ni kajok alitee ti Yesu kawarawar iŋi kámuñu. 13Hunuut toko, n'ijam kaaji ni kíhaminn t'etiir bufor bu keenam: ---A̱kiñj a̱ane: «Áfiitin t'úmiye, kiŋki káhin t'afeeneŋ n'Atemit abe n'iŋi kaket, atoof tu boko!» Búwejet Beenabe bu ni beene: «Hee, nu múniyo, boko kayihu tu burok booniin beeniŋe bu, ábuki meejake mi káhine mu mondu ti kásilimbaniin.» 14N'isooñ íheelin, n'ijuk kaafor keefañje, abe ake eenokoore nu húŋgowulan ariikariiko te ko. Asolasol ékuhe yite híyiaate yite éwurus, abe n'áyekan t'emoŋio étuuriaatuma yeeriye las. 15Ake amalaka n'ánuutin t'enuuf ite Atambatun, abe n'áhamin ataŋk n'an eeriikee u ti kaafor ku aano: «Á̱sik étuuriaatuma íiwe á̱ahotukan, ábuki éhotukan i ereeŋa. Etaam i ereeŋa káhotukanee!» 16Náami an eeriikee u ti kaafor ku ásika étuuriaatuma yeene éehotukan etaam i. 17Ake amalaka n'ánuutin t'enuuf ite Atambatun yeeemo i t'etiir bufor bu. Ákooki akina yooŋ étuuriaatuma yeeriye las. 18Ake amalaka yooŋ eebaje sembe ti sineemak su n'ánuutin t'ataabul ite wusarah wu, abe n'áhamin ataŋk n'aau éeyekie u étuuriaatuma yeeriyee i aano: «Á̱sik étuuriaatuma íiwe yeeriye i a̱afaran kísind kite kireseŋ kite etaam i, ábuki kilaaña.» 19Náami amalaka u ásika étuuriaatuma yeene eefaran kísind kite kireseŋ kite etaam i, abe n'áfiiten ko ti báatuusanum bómbokun bu bite kireseŋ ku bite b'Atambatun bite bu kane ayiŋat. 20Kireseŋ ku nu kútuusanee ti báatuusanum beeemo bu tíyaŋ hikinu hu. Halan nu húnuutin ti báatuusanum bu heetey naane móhujo areeŋ síkilomeetar síteemeer síhaaji, abe arko efaliñj esiiŋee fee te ho, hikaw hu barebare hija fu káŋaasina ku.

will be added

X\