KAFEEÑAL KU 13

1Hunuut toko, n'ijuk éndakakureŋ ti kánuutina ti han hu. Ebajabaj kikaw keemo hutok nu kúsuba, nu wusiin weemo sumoŋu. Kaasiin-siin fe kusolasol ékuhe yite híyiaate, abe kuruwu kite kálafatin Atambatun kikiñjeekiñj ti kikaw ku. 2Éndakakureŋ y'ijuke i ejaja kanokoor n'esaamaay. Wuwot wute te yo nu wúyemi naane wute kandaafaan, abe butum bite te yo naane bite éŋaŋ. Éjufuur i n'ésik ti sembe site te yo, n'eriikeey ite te yo yite híyiaate hu esaan éndakakureŋ yendu. 3Hike ti kikaw kite éndakakureŋ i, kajuku ni kite hunufaneenufan yéeni hulohen kaketu, bare esontaay i etulujatulujo. Kúŋgowulan ku fe ni kajahale dómbokun, abe ni kasa yo ti hiñaawu. 4Kareyi fe ni kásukaay éjufuur i, ábuki ésikasik ti sembe site te yo esaan éndakakureŋ i. Ni kásukaay yooŋ éndakakureŋ i ti kaanu: «Aañ aamo naane éndakakureŋ i? Aañ ayino kalobu ne yo?» 5Éndakakureŋ i n'ewunee sembe site kamaku, ni kálafatin Atambatun. N'ewunee yooŋ sembe site kaniju naane émaŋie i bija kiim bakan bákasuba nu kúsuba. 6N'efaaŋan yéelafatin Atambatun, nu huruwu hoone, ni t'akine du, ni bakan keekine ku fe t'etiir bufor bu. 7N'ewunee sembe site katiiku bakan kite Atambatun, ni sembe site kaheekiiin. N'ewunee yooŋ sembe tu búsuk bánoban, ni ti bakan kánokan, ni ti bakate kíhaminiin kánokan, ni ti biheet bánoban. 8Bakate ku t'etaam i fe kásukaay éndakakureŋ i; aamo fu bakan ku fe ku kuruwu kooniin kikiñjutee ku ti kaawiit kite buroŋ bu huta h'etaam i eŋ'ebin éwuwanee. Kaawiit kondu kite Ametek eeyoolee u. 9«An eebaje wúkondin aja ánandin! 10An eeemo ite bibin kajokiee eekulee, o bibin kakuliee. An eeemo ite bibin kayooliee ni kábura, o kayooliee ni kábura. Iŋ'ite ho aamo fu bakan kite Atambatun kawarawar kámuñu, itim kawas káyilen ku.» 11Hunuut toko, n'ijuk eke éndakakureŋ ti kánuutina t'etaam i. Ebajabaj misiin músuba naane mite ametek, bare eŋ'éhamin naane éjufuur. 12Ebajabaj sembe site éndakakureŋ étiyar i, abe eŋ'enij ne so tu buhooŋu yo. N'enoŋkooran etaam i ni keekine ku te yo kéesukaay éndakakureŋ étiyar i yeejooŋee i yéeni, abe esontaay i n'ebin etulujo. 13N'éhin buroon bómbokun beehaŋe ésuk i kikaw: n'éhin yooŋ sineemak séenuutin t'etiir bufor bu bibin t'etaam i tu buhooŋu ésuk i fe. 14N'ebuut bakate t'etaam i nu buroon bómbokun bemb'éhin beehaŋe bu ésuk i kikaw, b'ewunee bu kaanuku yéehin tu buhooŋu éndakakureŋ étiyar i. Ehaban, n'eene ésuk i éhin búwisenum beenokoore n'éndakakureŋ yeenufanee i yéeni ni kábura, abe bare n'eroŋ. 15Éndakakureŋ ésooboriyan i n'ewunee sembe site káhinu búwisenum beenokoore bu n'éndakakureŋ étiyar i beeroŋ, kaanuku man ni bíhamin, abe nu buyool an fe eeteñekee kásukaay bo. 16N'enoŋkooran ésuk i fe, biñi bu ni sifaaf su, kusaanum ku ni keebajut ku, búsukateen bu ni keenooto ku búsukateen, kéehinee ékeetanuma huruw fe t'emoŋu yaatos i man yooŋ tu húyuut. 17An fe ayinaat kajoohen, man yooŋ n'ajay dike doon t'abajut ékeetanuma yendu; yo yeemo fu huruwu hite éndakakureŋ étiyar i, man yooŋ naane huruwu hondu hije i ti kafinu. 18Bonde bíkandijenakandijen búwesinato. An éewesinatee áyinooni kánandin ti kafinu huruwu hite éndakakureŋ i, ábuki kafinu ku kúwufoorawufoor huruwu hite húŋgowulan. Ko keemo fu síteemeer hutok n'efeeneŋ, ni bakan bákahaaji, nu hutok n'efeeneŋ.

will be added

X\