KAFEEÑAL KU 10

1Hunuut toko, n'ijuk ake amalaka eebaje sembe kane áwanein ánuutin t'etiir bufor bu. Ákumbaloolakumbaloolo ni kaafor, abe kaajeŋgeleet kuŋoloolaŋolool hikawo. Buhooŋio uŋu burum naane taanak tu, abe wuwoto nu wúyemi naane síniñj site sineemak. 2Áyekanayekan t'emoŋio awiit éefeŋginee. N'asiiŋan kuwoto kaatos ku ti han hu, kaamay ku t'etaam i. 3N'akaaw t'etiir naane éŋaŋ yeenuure. H'akaawe hu, wuranda wu hutok nu wúsuba wu nu wusok wéesafin. 4Hu wuranda wu wusoke hu, n'ija kaanuku iikiñj naŋ nu wusoke fu, bare n'ijam kaaji kéehaminna t'etiir bufor bu ni keenam: ---Á̱nuus doon du wuranda wu hutok nu wúsuba wu wusoke du; atum'a̱kiñj do. 5Náami amalaka i ijuke u t'asiiŋee kike kuwoto ti han hu, kaaku t'etaam i, n'ayit emoŋio yaatos i t'etiir, 6abe n'awaat tu huruwu hite Atambatun eeemo u buroŋ hiraanu, éewuwane u bufor bu nu doon fe deeemo te bo, n'etaam i nu doon fe deeemo te yo, ni han hu nu doon fe deeemo te ho. Amalaka u n'awaat aane: Buroŋut ni bikamb! 7Amalaka atoken u ni bákasuba af'abin asok ti káabiinu koone kep, béenuusee bite b'Atambatun b'áhabaneina bu aane bo kabaju, bo kabaju yooŋ naane t'afiye du asok eroka yeene eyiŋana i. 8Náami kaaji kéehaminam ku yéeni huta hu t'etiir bufor bu nu kusooñ keenam: A̱ja a̱sa awiit éefeŋginee u t'emoŋu yite amalaka u eesiiŋee u kike kuwoto ti han hu, kaaku t'etaam i. 9N'ija t'amalaka u abe n'eeno asaanam awiit u. N'aanam: A̱yio, abe n'a̱teŋo. O katoofu tu butumi naane májiŋin, bare ti hari o kátiku. 10N'isa awiit u t'emoŋio, abe n'iteŋo. N'átumb atoof tu butumam naane májiŋin; bare h'imero hu, n'átik ti haram. 11Ake n'asooñ aanam: ---A̱warawar iŋki kayiŋan tu huruwu hite Atambatun boone beesokee bu ti bakan keehooje, ni biheet beehooje, ni kíhaminiin keehooje, ni bákayi keehooje.

will be added

X\