KAFEEÑAL KU 1

1Kaawiit konde kíyekie fu béenuusee bu bi Yesu Kiris afeeñale bu. Atambatun n'áhino éemeyi bo kaanuku éewufoor bo kiŋki karok bija te o, man ni kámeyi beeware bu kabaju memee. Yesu Kiris n'áboñin amalaka oone eebin eesokam bo, íñje Saaŋ aroka oone. 2Abe isokasok b'ijuke bu bireyi fe: bo beemo fu hirim hite Atambatun, nu múniyo mi Yesu Kiris áwufooram mu. 3Atoof t'an eejaŋgee u kaawiit konde tu buhooŋu ésuk i, ni kiŋki kajamatan báhamin bonde béenuutina bu t'Atambatun, abe n'iŋi kájeŋgin yooŋ beekiñjee bu te ko, ábuki memee bo kabaju! 4Íñje Saaŋ ikiñje fee bakate ku ti kikinu keemo hutok nu kúsuba kite Asi kéeyilene ku: Atambatun aja ásoniyanuun, abe n'awunuun káasuumaay, akina eeemo u, akina éeyemie u, akina eebin u. Ñúwejet ñu hutok nu ñúsuba ñu ñeeemo ñu hágila eriikeey yeene yite híyiaate hu ñija ñúsoniyanuun, abe nu ñuwunuun yooŋ káasuumaay. 5Yesu Kiris yooŋ, aseede éejube u aja ásoniyanuun, abe n'awunuun káasuumaay, akina eeemo u átiyar u dók ti karitanee t'eket i, akina eeemo u áyi ite bákayi ku t'etaam i. Kiris ámaŋamaŋi úne, abe n'aram úne tu wuhoofoor wu ni halan hoone héeyuusee hu. 6Áhinahin úne núuyemi bakan bakate ti jáyi joone. Áhinahin úne yooŋ núuyemi éhina wusarah bija t'Atambatun Faafo. Yesu Kiris aja ákini hiraanu kániku ku ni sembe su! Amiin. 7Arijuk, ondu ti bibin tu bufor bu! Ésuk i fe, bija yooŋ ni keeyao ku kajukio ni ñíkiniin. Búsuk bite t'etaam ye fe kayiyu uŋu hoone hu. Hee bondu kabaju! Amiin! 8Atemit, Atambatun eehaŋe u ebaja sembe aane: «Íñj'eemo fu átiyar u n'araan u toko, íñj'eemo u, íñje éeyemie u, íñje eebin u.» 9Íñje Saaŋ atuuun iŋi naane úhine i t'afeeneŋ ni Yesu Kiris. Úne bakate ti Jáyi jite Atambatun, abe íñj'endu ti kajuku sílaam naane aruun, íñj'endu yooŋ ti kámuñu kep naane aruun. Kajokamjok kabin káfiiten t'ekiŋk yende yiyi kaane Patmos aŋarkeyi naane iŋ'iwaare hirim hite Atambatun, nu múniyo mi Yesu áwufooram mu. 10Tu hunak hite Anahaan u, Búwejet Beenabe bu nu bujokam, abe n'ijam inde hiñaawiam kaaji kéetumbe kiraas naane káabiinu. 11Ni keene: ---Bamb'a̱juk iye, a̱kiñj bo ti kaawiit, abe n'a̱boñ ko kéeyilene ku ti kikinu hutok nu kúsuba konde: Efees, Simirn, Perigam, Tiyatiir, Sarid, Filadelfi, ni Lawodise. 12N'iweteko kaanuku man n'ijuk an aa áhamin iyu n'íñje. N'ijuk báanaŋum bite búrundoora beemo hutok nu súsuba bite éwurus, 13abe ake eenokoore nu húŋgowulan n'áyemi t'etut bo. Asiimasiimo kájufa kéeyuuse, abe n'awuuj nibaŋ nite éwurus tu búsuso. 14Wan wu ti hikawo aŋ'afañj daŋ naane ehuuy, ñíkino ni ñíyemi naane sineemak. 15Wuwoto uŋu wútumb wusilan naane mañ meebuuyee ti sineemak, abe ni míhinee meebunan. Kaajio uŋu kusok naane kúsuw kite káajuŋeey. 16Ajokajok t'emoŋio yaatos i wúloofiiloof weemo hutok nu wúsuba, abe kábura keebaliŋge suf iŋi kíŋaasin tu butumo. Buhooŋio iŋi bisilan naane taanak tu kaajiŋgan far. 17H'ijuko hu, n'iney bite wuwoto naane an eekete. N'ásit emoŋio yaatos i t'íñje abe n'aanam: ---Atum'á̱koleyi! Íñj'eemo fu átiyar u n'araan u toko. 18Íñj'eemo fu an eeemo u buroŋ. Íketaanaketaani, bare hahiye íñj'endu buroŋ hiraanu. Íñje íyekie fu sijaab site eket i, ni site ti keekete ku tindi kaja. 19Náami a̱kiñj bamb'a̱juk iye: beebaje bu hahiye, ni beeja bu bibin kabaju. 20Wúloofiiloof wu hutok nu wúsuba wu w'a̱juke wu t'emoŋiam yaatos i, ni báanaŋum bite búrundoora bu hutok nu súsuba su bite éwurus i, iye i bije fu: wúloofiiloof wu hutok nu wúsuba wu weemo fu emalaka yite kéeyilene ku ti kikinu keemo hutok nu kúsuba; báanaŋum bite búrundoora bu hutok nu súsuba su ni bíyemi kéeyilene ku ti kikinu keemo hutok nu kúsuba.

will be added

X\