FILEMOŊ 1

1Íñje Pool eekulee u aŋarkeyi naane iŋ'iwaare Hirim Heetoofe hite hu Yesu Kiris ikiñje fee eleetar yende. Íñje n'ati wane Timote írikiñjini fee, awe Filemoŋ, áwiy uni bajen eeemo u burok úne bifeeneŋ. 2Uni bokondu ti kákiñjini yo awe, n'ániin úne Apiya, n'áwiy úne Arsip eeemo u étuum úne efeeneŋ, ni bakaaku yooŋ kéeyilene ku kiŋki kakuukanooro t'enuuf t'awe. 3Yala Atambatun Faaf úne, n'Anahaan u Yesu Kiris ni kásoniyanuun, abe ni kawunuun káasuumaay. 4Filemoŋ, ko kireyi fe kane íyemi ti kalawu bija t'awe, iŋ'eene Atambatun ite úne eyeehen, 5ábuki iŋ'ijam naane á̱maŋie i bakan k'Atambatun akino ku fe, ni naane á̱yilene i t'Anahaan u Yesu. 6Íñj'endu ti kalawu Atambatun man kajokoor ku waajokoore ku ti káyilen ku, ni kíhin a̱ahaŋ kámeyi meejake m'úbaje mu fe tu buroŋ bite b'úne ni Kiris. 7Óom, hutoofamtoof dómbokun, abe hikawam yooŋ ni hiyaŋg aŋarkeyi naane á̱maŋamaŋi bakan kite Atambatun, abe aŋ'á̱hin yooŋ siheliin seerooŋo. 8Náami ímaŋamaŋi kalawii bike. Naane wáahine i t'afeeneŋ ni Kiris, ibajabaj sembe site kasokii b'a̱ware bu káhinu. 9Bare íñje kalawii bonde aŋarkeyi naane wáamaŋiooramaŋioori. Íñje Pool t'ihaane dee, abe yooŋ hahiyu ikuleekul aŋarkeyi naane iŋ'irok bija ti Yesu Kiris, 10íñj'endu ti kalawii bike bija t'Onesim. Ijokojok naane añiam diye t'ekulu i, ábuki ajoka bítim bite Kiris. 11Hítiyar hu abajut t'awe éñjeriŋ, bare hahiye abaja tu wane éñjeriŋ. 12Íibatikannio hahiyu, bare anokooreenokoor kite eholam y'isaani fii. 13Ímaŋamaŋi yéeni kajokio diye éeyemi kaagoroor n'íñje éeyokunanam h'eemo hee t'ekulu i iŋ'ite Hirim Heetoofe hu, ábuki awe a̱nooto diye. 14Bare ímaŋiit káhinu doon fe t'a̱anoorutam hee. Ímaŋiit katiŋgii á̱ahinam beejake; ímaŋamaŋi awe a̱anoŋk a̱anij. 15Maske fu yooŋ Onesim anuute t'awe kunak keefamut kaanuku eebin éebatikein t'awe hiraanu. 16Ábuki hahiye aroŋut ásukateen barebare, bare ahaŋa ásukateen: akina abuke wane, abe ésuk i fe émaŋiomaŋi. Akina abuk'am i ítumbe ímaŋi, bare t'awe t'ahaŋe káyemi abuke, ábuki akina ásukateen úuwe, abe yooŋ abukei t'Anahaan u. 17Makamu a̱jokamjok naane áwiyi, a̱joko yooŋ áwariee anokoor naane íñje ibine t'awe. 18Arko atinatin t'awe, man yooŋ ákookii doon, a̱sokam bo, íñje n'iŋ'ijaami. 19Íñje inoŋke fu iikiñj bonde n'emoŋiam: íñje Pool, íñje kajaamii. (Iyakuti kábaŋinan kaanuku awe humuumi á̱kookiam dike doon: do deemo fu buroŋ búuwe.) 20Hee ati, íñje ilawi, waasi, a̱wunam bonde iŋ'ite h'Anahaan u: á̱hin ehelam yeerooŋo iŋi naane waajokoore i ti Kiris. 21Bukuuramkuur h'íkiñjin hee n'awe kaanuku awe káhinu b'ilawi bu; ímoomi yooŋ kaanuku awe káhinu ahaŋ diyu. 22Abe yooŋ n'a̱faraam anuuf, ábuki iyakarayakar kaanuku Atambatun kasayi kalawu koonuun, abe n'áhinam íibatikein t'aruun. 23Epafuras eeemo u n'íñje t'ekulu i iŋ'ite hu Yesu Kiris asaafi. 24Bakanam Mark, n'Aristarik, ni Demas, nu Luk kiŋk'irirok kasaafi yooŋ. 25Anahaan u Yesu Kiris aja ásoniyanuun.

will be added

X\