FÍLIP 1

1Íñje Pool ni Timote, eroka yite Yesu Kiris írikiñjinuun fee aruun arireyi fe, bakan kite Atambatun ki Yesu Kiris akino ku keeemo ku Fílip, nu kunahaan koonuun, n'ejokoora yeeniin. 2Atambatun Faaf úne, n'Anahaan u Yesu Kiris kaja kásoniyanuun, abe ni kawunuun káasuumaay. 3Ko kireyi fe, ehelam ef'éyemi t'aruun, iŋ'eene Atambatun ite úne eyeehen. 4Ehelam eŋ'etoofan ko kireyi fe kane ilaw bija t'aruun fe, 5iŋi naane áriyokunanam i ti kawaare kite Hirim Heetoofe hu, huta hu tu hunak h'arijame hu ho hítiyar bija yooŋ t'úmiye. 6Bonde bare bukuuramkuur: Atambatun eejabe u burok bonde béewarie bee t'aruun, abaa te bo ayak abin áami yooŋ bihabanaa tu hunak hi Yesu Kiris ábatikein hu te ho. 7Ajakeejak naane ibaje ee biyinoor bonde beejake bee bija t'aruun arireyi fe, ábuki ímaŋiuunmaŋi t'eholam. Múniyo áriyokunanamyokunan tu burok bonde b'Atambatun asaanam bu ti kajaku koone. Árihinahin bo h'eemo hee t'ekulu i. T'ikuloorutee yooŋ, hih'ísafin kiŋki kásokum Hirim Heetoofe hu, hih'iwaare ésuk i eeeniin hite nu múniyo, áriyokunanamyokunan yooŋ. 8Atambatun ámoomi kaanuku ímaŋiuunmaŋi arireyi fe naane Yesu Kiris ámaŋiuun i. 9Bonde b'if'ilaw Atambatun bija t'aruun: yala kámaŋi koonuun ni kihaŋ bija hágila, n'arihaŋ yooŋ kámeyi múniyo mu, abe n'árinandin buroon bu jak, 10áriiyini kajifan beehaŋe bu kajaku. Iyu, n'aŋ'arikuur but, abe at'áriyini kawatanee tu doon hunak hi Kiris abin hu te ho. 11Yala kunoŋk koonuun fe ni kíyemi keejake ti sembe site Yesu Kiris, bija ti kánikan kite Atambatun, ni kasokoroor koone. 12Kújakuwe, ímaŋamaŋi árimeyi kaanuku beebajam bu bifitut Hirim Heetoofe hu, bare bíhinahin ni hihaŋ bija hágila. 13Esulaan i fe kiŋki kajukar enuuf ite áyi ómbokun eeemo u Rom, ni bakaaku kareyi fe kabinabina kámeyi kaanuku íñj'endu t'ekulu i aŋarkeyi naane iŋ'irok bija ti Kiris. 14Bakan keehooje-hooj ti kéeyilene ku, hi kajame hu kaanuku íñj'endu t'ekulu i, kikawiin ni kihaŋ kayaŋgu t'Anahaan u, kasooñen ni kahaŋ káñiŋkaan ti kawaare kite ésuk i Hirim hite Atambatun ti kákoleyiit. 15Múniyo bakaake tu boko iŋi kawaare bite bu Kiris aŋarkeyi naane kahiñanamhiñan, abe yooŋ ti síñakoor; bare bakaaku iŋi kawaare bo nu búwejet beekuure but. 16Bokondu iŋi káhin iyu aŋarkeyi naane kámaŋiammaŋi, ábuki kámoomi kaanuku káwufoor kite ésuk i múniyo mite Hirim Heetoofe hu kíkinineŋe fu Atambatun n'anaŋam diye. 17K'ijabe ku isok, nu búwejetiit beekuure n'ifi kawaare bite bu Kiris, bare ni baabet; iŋi kaane man boko káhiniam iihaŋ kálaamu t'ekulu i. 18Bíhinutam doon! Arko beeemo bu ti kikawiin bijakajak man yooŋ bijakut, saama náami kep bokondu ti kawaare bite bu Kiris, abe uŋu hutoofam aa. Hee, bibaa yooŋ katoofiam, 19ábuki ímoomi kaanuku naane aa arilaw bija t'íñje, ni naane Búwejet bite bu Yesu Kiris uu búyokunanam, bondu fe biyak fu kákinineŋ n'ifak. 20Ti kanahan k'eemo kee te ko, n'eyakar y'eemo yee te yo, at'arko hikee-kee íñje ifuñee. Aaa, b'ímaŋie bu bare úmiye nu ko kireyi fe beemo fu hikawam hiyaŋg piŋ, íiwufoor íhabanein kaanuku Kiris ahahahah, hutoof íñje buroŋ man yooŋ íñje káaketin. 21Ábuki t'íñje, buroŋ bu beemo fu Kiris, abe eket i hisiibanu. 22Bare arko íñje buroŋ, íyinooni káhinu burok beebaje éñjeriŋ. Náami ímeyiit naŋ n'iware fu kajifan tu buroŋ bu n'eket i. 23Ehelam yendu ti kateyoor tu muroon músuba monde: ímaŋamaŋi kaketu íiyemi ni Kiris, ho húkoyie. 24Bare ahaŋ kajaku uŋu hoonuun hu n'iroŋ. 25Náami makamu bondu bukuuramkuur, ímoomi kaanuku íñje karoŋu, íñje káyemi n'aruun arireyi fe íiyokunanuun ariihaŋ bija hágila, abe n'aribaj katoofu ti káyilen ku. 26Iyu, if'ibin íbatikein t'aruun, n'aŋ'arihaŋ kasaŋgoor ni Yesu Kiris íñje íikinineŋ. 27Naane hiyino i káyemi fe, buroŋ boonuun bujoŋoor naane Hirim Heetoofe hite hu Kiris husoke i. Káhinu iyu, if'ibinuun kajuku, man yooŋ ibinutuun kajuku, íyinooni kajamu kaanuku arijokajok alitee. N'iŋ'ímeyi kaanuku arijokoorajokoor tu búwejet bifeeneŋ, aŋ'árisiiŋoorein yooŋ áriituum t'afeeneŋ bija ti káyilen ku keeyaajee ku ti Hirim Heetoofe hu. 28Atum'ariwas enatoora yeenuun kéekolinanuun tu doon fe: toko ti kayak fu kánandin kaanuku boko bútowuto hiraanu, aruun yooŋ n'árinandin kaanuku aruun kafaku. Abe bondu t'Atambatun tu búnuutina. 29Ábuki Atambatun awunuunwun káanukiiit áriiyilen ti Kiris barebare, bare kaanuku yooŋ ariijuk sílaam uŋu hoone hu. 30Hahiyu t'étuum efeeneŋ t'úemo fu íñje n'aruun. Étuum yendu efeeneŋ i ni y'arijukam i te yo, abe árimoomi kaanuku iroŋa te yo.

will be added

X\