MÁJIYE 12

1Tu kunak kondu, t'erimaas ite Esuwif i, Yesu n'aŋaas ti kitaaŋaat ku ti kawañe dike doon aŋ'a̱juk kite maanu. Eriboora yeene bujoñjol tu boko; n'iŋi kahat te do keeteŋ. 2Bakaake t'Efarisiyeŋ i kajuka bondu, ni kaane Yesu: ---Á̱heelin fee, eriboora íiwe bokondu ti káhinu doon d'Eluwa yite y'úne eteñekee du an áhin tu hunak hite erimaas i! 3Yesu n'aaniin: ---Eeman kereŋ arijaŋgajaŋga bi Dafit áhine bu, akina ni bakano, hu bujoñjol bujokiin hu? 4Ayoosayooso t'Anuuf ite Káafimboor ku, éeyitin kumburu keebelee ku bija t'Atambatun, abe n'ateŋ, akina ni bakan koone. Abe bare t'Eluwa yite y'úne, kawarut ko yéeni kateŋu. Esaraha i taŋ kaware fu ko kateŋu. 5Man yooŋ arijaŋgeit t'Eluwa yite Moyis kaanuku erimaas-rimaas fe, esaraha i t'Enuuf ite Atambatun, naane ii karok toko fe, katina t'Eluwa i, bare Atambatun ajokut bo kaahoofoor? 6Íñje isok fee n'aruun: abajeebaj diye doon deehaŋe Enuuf ite Atambatun! 7Kane árinandin yéeni bonde b'Atambatun asoke bu ti Míkiñjin mu aane: «Arijak ti bakaaku; bondu b'ímaŋie fu, bare wusarah wíiit», man ariwatan bokonde keetinut ku. 8Ábuki Añi ute Húŋgowulan hu akino fu erimaas i. 9Yesu anuuta toko, n'ayooso ti bike ti ñáalawum ñooniin. 10Ake ániine ámoomi toko, emoŋio étimatim. Kéeyemie ku toko ni kámaŋi katinan Yesu. Ni kákandijeno kaano: ---Eluwa yite y'úne ewunawun an karitan ásomuta t'erimaas i? 11Yesu n'aaniin: ---Arko ake t'aruun abaje fee ékarniina efeeneŋ, abe n'eney ti kaayeen kéesulie tu hunak hite erimaas i, buŋ b'aja fu? At'aja ajok yo ánuutann? 12Abe húŋgowulan ahaŋahaŋ ékarniina fuf! Náami Eluwa yite y'úne ewunawun an káhinu meejake t'erimaas i. 13Náami eeene ániine u: ---A̱raaw emoŋii. Ániine u n'araaw yo, náami ékoyia, ebatikaa naane hítiyar hu, yéeyemi naane yaayu. 14Efarisiyeŋ i kéeyemie ku toko ni kánuutin, abe ni kajukoor keejuk naane kaja i káhinu keeyool Yesu. 15Hi Yesu ajame hu bondu, n'anuut toko. Bakan keehooje-hooj ni kasao ti hiñaawu. N'aritan kéesomute ku fe, 16abe n'áhaminiin ayan faŋ, aaniin itim kasok an akina aamo fu aañ. 17Iyu i bije fii kaanuku hirim honde h'Esayi ayiŋana ite Atambatun asoke hu heebaj. Aanaan: 18«Atambatun aane: an onde af'áhin naane isoke i, akina i ijifane fu, o i ímaŋie fu, te o ti hikawam hutoofe fu. Íñje kahoojano nu Búwejet búuma, abe o káwufoor bakate t'etaam i fe bítim beejake bu. 19At'ajeeŋoor n'an, abe at'ayit kaajio t'etiir, at'áwuforooro ti sifiñjan su. 20At'afiit yariyoon yeeleebee, at'ahok yooŋ ejaaŋana yeelohene kaketu. Iyu a aja fu ayak abin áami b'ímaŋie bu bisiiŋaa; 21abe kéemeyiitam ku fe kanaŋu eyakar yeeniin te o.» 22Bakan ni kabin ti Yesu n'ake ániine éefuume, ayinaat yooŋ báhamin, ábuki erab ejokojok. Yesu n'áhino éekoyi ayak aŋ'áhamin abe n'aŋ'ajuk. 23Hahooja hu fe ni hijahale, abe n'iŋi kaane: ---Añi Dafit fíya? 24Bare Efarisiyeŋ i kajama bondu ni kaane: ---Jaa! Ti sembe site fu Belsebul, áyi ite sirab su t'áyin ondu af'ákutoor sirab su. 25Bare Yesu ámoomi béeyemie bu ti kikawiin. N'aaniin: ---Bakate t'ésuk efeeneŋ ifi kayawoor, ésuk yendu búbujo. Bakate ti hikinu hifeeneŋ, man yooŋ butoŋ bifeeneŋ ifi kayawoor, boko bihabano. 26Setani af'ákutoor doon d'akino, n'aŋ'áami fu ásokumooraa. Jáyi joone fíya hite te jo man hihabano? 27Ariene íñje iŋ'íkutoor sirab su aŋarkeyi naane Belsebul awunam fu sembe su. Kame bakan koonuun, ti sembe site aañ t'ifi kákutoor so? Boko kumuumiin káwufooruun kaanuku arikooŋut! 28Bare naane aamo i Búwejet bite Atambatun buwunam fu sembe site kákutoor sirab su, Jáyi joone kame jíreeŋinuun. 29«An ayinaat buyooso t'enuuf ite an eebaje sembe éekuwato, t'ajabut afaak an ondu ite sembe su. Ajendano kafaaku, n'atik áyini kákuwat doon deeemo toko fe. 30«An éesiiŋooreinoot n'íñje, an ondu ásokumam; abe an éeyokunanutam iriikuukan, an ondu ayisaloolana. 31Iŋ'ite ho h'isok fee n'aruun: Atambatun áyinooni kaboŋket ésuk i wuhoofoor wooniin, ni naane kayako i fe kálafatin. Bare an eeyak u kálafatin Búwejet Beenabe bu, at'aboŋketee. 32An af'asok t'Añi ute Húŋgowulan hu, áyinooniee kaboŋket; bare an n'asok tu Búwejet Beenabe bu, at'aboŋketee úmiye, at'aboŋketee yooŋ kuwaatu kane Atambatun asiiŋan Jáyi joone. 33---Ariliik tu nunukanuk neejake: miriyaay mite te no iŋi mijak; nunukanuk neejakut, miriyaay mite te no míjakaariit. Nunukanuk aŋ'akeetanee ti miriyaay mite te no. 34Ñuroon ñondu! Buŋ b'ariyino fu káhamin atoofee, abe bare arijakut? Ábuki fu butum af'ánuutann beeemo bu tu búwejet bu. 35Húŋgowulan heejake aŋ'asok buroon beejake aŋarkeyi naane búwejet boone bukuurakuur. Bare húŋgowulan heejakut aŋ'asok buroon beejakut aŋarkeyi naane búwejet boone bukuurut. 36Íñje isok fee n'aruun: hunak h'Atambatun aja hu Kajoonan te ho, huruw fe kakamu Atambatun iŋi naŋ n'asoke fu kirim k'awarut ku yéeni kasoku. 37Ábuki ti kirim kúuwe t'a̱yak fu kajoonanee: man aw'ondu t'ekooŋ, man yooŋ a̱nooto t'ekooŋ. 38Náami bakaake t'émuse yite Eluwa yite Moyis, ni bakaake t'Efarisiyeŋ i ni kaane Yesu: ---Ámuse u, írimaŋamaŋi á̱hin bike beehaŋe uni kikaw, beekuur uni kaanuku Atambatun áboñini fu. 39Yesu n'aaniin: ---Aruun bakate ku hahiye arijakut, áriwuŋgawuŋg yooŋ Atambatun kiñaawu, abe bare n'árimaŋi kajuku beehaŋuun kikaw. Bare at'áriwufooree mayet bifeeneŋ, kane arko taŋ beebaje bu Sonas ayiŋana ite Atambatun. 40Ábuki naane Sonas abaje i kunak kíhaaji lám ti har hite asaan ómbokun, iyu yooŋ a Añi ute Húŋgowulan hu aja fu kahokiee, eebaj kunak kíhaaji t'etaam i. 41Hunak h'Atambatun aja hu Kajoonan ésuk i, bakate ku Niniif bisiiŋo kajoŋoor n'aruun bakate ku hahiye keetinanuun. Ábuki kawatanoorawatanooro wuhoofoor wooniin hi kajame hu bu Sonas awaareiin bu; abe bare arijuk, abajeebaj diye bike beehaŋe Sonas! 42Hunak h'Atambatun aja hu Kajoonan ésuk i, anaare éeyemiaanie u aseef ite Saba bisiiiŋo ajoŋoor n'aruun bakate ku hahiye eetinanuun. Ábuki fu abinabina ánuutin t'akambe-kamb, bibin kajamu naane Salomoŋ áwesinatee i; abe bare arijuk, abajeebaj diye bike beehaŋe Salomoŋ! 43---Erab ef'enuutanee t'an, eŋ'ehiilool t'eramba i tu móhujo munooto du, kaŋesu t'eware du kakinu. Arko ebajut, 44n'eŋ'eyinoor eene: «Iibatuko t'enuuf íima t'ínuutina du.» N'eŋ'ebatuko, abe n'eŋ'eŋaabo enuuf i fuufu te yo, káafeewinee, abe n'éhinee áwari fe. 45Náami n'eŋ'eja éruwin sike sirab seemo hutok nu súsuba seehaŋe yo kánafut. N'eŋ'ébatikein ne so, seekin toko sireyi fe. Sílaam s'an ondu aja su kajuku, so kahaŋu sítiyar su. Iyu yooŋ i bija fu káyemi ni bakate ku hahiye keejakut ku. 46Yesu ondu ti báhamin bondu ni hahooja hu, bakat'o n'íñaayo ni káreeŋin, abe ni kásiiŋein tíyaŋ keeboñ boone. 47Ake n'aano: ---A̱jam fee, íñaayi ni bakatii bokondu tíyaŋ, kaane t'awe ti kabine. 48Yesu n'ásafino aano: ---Aañ aamo fu íñaayam? Aañiin kaamo fu bakat'am? 49Ahaban, n'añoŋ t'eriboora yeene abe n'aane: ---Áriheelin, íñaayam ni bakat'am bokonde! 50An aa áhin bi Faafam eeemo u t'etiir ámaŋie bu, an ondu aamo fu at'am, ániinam, n'íñaayam toko.

will be added

X\