MARK 14

1N'aŋeñen kunak kúsuba, efeet ite Kánuutina ku Esipt n'eŋ'ereeŋ, n'efeet ite Kumburu Kéehinaariitee ku Élefir. Eseef ite esaraha i, n'émuse yite Eluwa yite Moyis ni kaŋes naane kaja i kéeyini kajoku Yesu t'an ámeyiit, abe ni kayoolo. 2Ni kaane: ---Úwaruto kajoku t'efeet i, ésuk i n'eŋ'ejendan kárahanna. 3Yesu n'áyemi Betani, t'enuuf ite Simoŋ éebajaanie u yafot i. Ondu tu buñoofo bu, ake anaare n'áyoosein, o n'éndiis yeerokee nu bujuju bimbi kaane albaatar. Éndiis i ehoojahooj ni mátiso mite anukanuk ii kaane naar, abe iŋi miseer naane. N'awelej butum bite te yo, abe n'áyuus mátiso mu ti hikaw hite Yesu. 4Bakaake ti kéeyemie ku toko ni kayiŋat. N'iŋi kaanoor: ---Iŋi naŋ ni mátiso mondu múbujarooree fu? 5Tiŋkan yéeni u mujoohenee fu aseeree areeŋ bajaam bite aroka bite emit ñeeba, abe sírirem su ni sísikee t'asaan keebajut ku! Abe ni kakamoor t'anaare u. 6Bare Yesu n'aaniin: ---Ariwas an u. Kame áriilaamano iŋi naŋ? B'áhinam bee bijakajak faa. 7Keebajut ku káyemi n'aruun ko kireyi fe, abe árinooniiin káhinu meejake t'árimaŋie. Bare íñje it'íyemi n'aruun ko kireyi. 8Anaare onde áhina doon d'áyinie du. Ahundana eniam hahiye bala ibin iwananee t'élum i. 9Iisokuun bifeeneŋ bu: tánotan fe t'etaam ye ti Hirim Heetoofe hu hiyakee du kawaare, ésuk i kasoku b'anaare onde áhine bee kaanuku iŋi kabin kábaŋinoo. 10Hunuut toko, Suda Iskariyot, ake t'eriboora i sumoŋu ni bákasuba ku n'aja ajuk eseef ite esaraha i, keejamoor kaanuku man n'abin ásik Yesu asaaniin. 11H'asokiin hu bondu, nu hutoofiin fu naane. Ni kaano boko kawunio sírirem. Náami eeŋes naane aja i káhinu éesik Yesu asaaniin. 12Hunak hítiyar hu hite efeet ite Kumburu Kéehinaariitee ku Élefir, hunak hu hihi kamoot te ho bimetek bu bija t'efeet ite Kánuutina ku Esipt, eriboora yite Yesu ni kaano: ---Diin t'á̱maŋie fu irija irifarei buñoofo bite efeet ite Kánuutina ku Esipt? 13Náami Yesu eeboñ bákasuba t'eriboora yeene aaniin: ---Arija ti hikinu hu. Aruun káfimboor n'ake ániine eesejee éndiis ite móhujo. Arisao ti hiñaawu, 14abe t'enuuf i t'aja du buyooso, ariene ate te yo ámuse u aane esaal i yendu diin, ti kaja du káhinu efeet i, akina n'eriboora yeene? 15Abe n'aŋ'áwufooruun esaal yómbokun tu sunuuf sitiira su, káafareinee fe nu buroon b'úsawulee bu. Toko t'arija fu bifare buñoofo bite b'úne. 16Eriboora i ni kaja. Kareeŋ hikinu hu, ni kaŋaabo buroon bu naane ti Yesu asokiin du. Náami keefare toko buñoofo booniin bite efeet i. 17To ti bija kábaani ku, Yesu n'áreeŋin n'eriboora i sumoŋu ni bákasuba ku. 18Bokondu tu buñoofo bu, Yesu n'aane: ---Iisokuun bifeeneŋ bu: ake t'aruun keeñoofo kee n'íñje kásikiam asaan bakan. 19Eriboora i ni kátaañian; n'iŋi kákandijeno n'afeeneŋ kaano: ---Eenaan íñjeiit, bare? 20N'aaniin: ---Ake t'aruun sumoŋu ni bákasuba ku, uni irijoloŋan fee kumburu kite k'uni t'efind i. 21Añi ute Húŋgowulan hu eeja kaketu naane Míkiñjin mu musoke i uŋu hoone hu. Bare afin ayak buŋ kátaañi t'an ondu eeja u kajoohen Añi ute Húŋgowulan hu! Ahaŋ yéeni kajaku te o náami áwuwinoot! 22Bokondu tu buñoofo bu, Yesu n'ayit humburu abe n'aane Atambatun eyeehen. N'afiitar ho, abe n'asaan eriboora yeene ti kaaniiin: ---Árisik, diye eniam. 23Ahaban, n'ásik ekot ite ébiñ abe n'aane Atambatun eyeehen. N'asaaniin yo, ni káhujo kareyi fe. 24N'aaniin: ---Diye halan húuma héekinineŋe hu kaajamoor ni kibaj t'etut Atambatun ni bakan koone. Ho búyuuso bija ti keehooje-hooj. 25Iisokuun bifeeneŋ bu: iroŋut kasooñu íhujo ébiñ, bija yooŋ hunak h'ija hu búhujo éyeni ti Jáyi jite Atambatun. 26Ahaban, ni kahooñ kuhooñu kite efeet i, abe ni kaja ti hirij hite Ñúolifiye ñu. 27Yesu n'aane eriboora yeene: ---Aruun fe kateyi áriifiitenam. Ábuki Míkiñjin mu meenaan: «Íñje kayoolu an eeemo u ti jíhaaw ju, abe síkarniina su biyisaloolo.» 28Bare kane ibin iritanee t'eket i, íñje kágilanuun Gálile. 29Piyeer n'aano: ---Arko yooŋ bakaaku fe keetey kéefiiteni, íñje bare it'ífiiteni hikee. 30Yesu n'aano: ---Iisoki bifeeneŋ bu: humuum káajiim konde, bala káajuloon ku kusok kiyak kibatikan, awe kaanu á̱meyiitam kireeŋ kíhaaji. 31Bare Piyeer n'átumb fu ataŋk aano: ---Hutoof yooŋ iwarawar kaketu n'awe, at'a̱jam mo hikee íñj'eene ímeyiiti. Bakaaku eriboora kareyi fe ni kasok yooŋ mo mifeeneŋ mu. 32Yesu n'eriboora yeene ni kareeŋ tike tiŋ iŋi kaane toko Getsemane. N'aaniin: ---Aririiko diye, íñje iija ilaw. 33N'aja ni Piyeer, ni Saak, ni Saaŋ. Náami ajaba kátaañian, abe enio n'ejam. 34N'aaniin: ---Ehelam étumba ehabano fe, ilohen kaketu. Aririiko diye, abe n'áriheelin féet. 35N'atof diŋgilis, abe n'ájiŋgitan eelaw Atambatun kaanuku t'áyinie, n'áhino keekamboor n'ewahatu yendu yite sílaam su. 36Aŋ'aane: ---Faafa, á̱yinooni káhinu dóonodoon fe. Á̱hin ekot yendu yite sílaam su yeekambam. Káanukiiit á̱ahin beetoofam bu, bare á̱hin beetoofi bu. 37Ahaban, n'ábatikein bibin t'eriboora i t'éhaajiiin, n'áŋaabeiniin ti kaŋote. N'aane Piyeer: ---Simoŋ, kame huŋotu? A̱yinaat yooŋ biriiko ewahatu efeeneŋ taŋ t'a̱ŋotut? 38Abe n'aaniin: ---Áriheelin féet, abe n'arilaw kaanuku man atum'ariney ti kaahoofoor. Ñúwejet ñoonuun iŋi ñímaŋi káhinu ajakee, bare siniuun sibajut sembe sondu. 39N'asooñ atof, abe n'alaw aneefan naane hítiyar hu. 40N'asooñ ábatikein bibin t'eriboora yeene, n'aŋk'áŋaabeiniin ti kaŋote, ábuki huŋotu hu káajokiniin naane. Kámeyiit yooŋ buŋ bi kawaro fu kásafin. 41H'ábatikeina hu híhaajiyan hu, n'aaniin: ---Kame ariroŋa t'ariŋote ti kayihu kep? Hahiyu afamee, tireeŋa toko! Arijuk, Añi ute Húŋgowulan hu kásikiee asaanee ehoofoora i. 42Aririto núuja! Arijuk, an eejoohen u n'íñje ondu! 43Ti Yesu átibanoorut yooŋ báhamin bu, Suda, ake t'eriboora i sumoŋu ni bákasuba ku n'ahaŋ áreeŋin, áriboorin ni hahooja keejuŋkee, bakaake wúbura, bakaaku bugol. Eseef ite esaraha i, n'émuse yite Eluwa yite Moyis, ni sifaaf site Esuwif i káboñiniin fu. 44Suda eejoohene u Yesu, ajabajaba asok hahooja hondu buŋ bi kaja fu kakeetano. Aaniinyen: «An i ija u káfoonu t'etok, árimeyi kaanuku akina. Arijoko, abe n'arija ne o. Arijukaro jak!» 45Hi Suda áreeŋina hu, n'ajumban júl bija ti Yesu abe n'aano: ---Ámuse u! Abe n'áfoono. 46Náami bakaaku keebin, káreeŋin ni kajok Yesu. 47Bare ake t'eriboora yeene n'áruusin kábura koone. N'asib ásukateen ite asaraha ómbokun u, eejilo káakondin. 48Yesu n'aaniin: ---Íñje ítumbe íyemi ánukenoora h'aribine hee búuma nu wúbura, nu bugol yooŋ? 49Húnakonak fe úne uf'úyemi, iŋ'iliiken ésuk i hirim hu t'Enuuf ite Atambatun, abe arijokutam. Bare iyu yooŋ, kaanuku man beesokee bu ti Míkiñjin mu ni bibaj. 50Náami eriboora yeene fe kateya kéefiiteno. 51Ake ábaakiit n'anaban Yesu; ebara taŋ y'ayite fu éekumbaloolo. Ni kaŋes kajokio, 52bare n'awas toko ebara i eetey fuufio tálaŋ. 53Keejoke ku Yesu ni kaja ne o t'asaraha ómbokun u. Eseef ite esaraha i, ni sifaaf su, n'émuse yite Eluwa yite Moyis ni kaja káfimboor toko. 54Piyeer n'ásiiŋein akambee aŋ'anaban Yesu. N'ayooso yooŋ ti haanas hite asaraha ómbokun u. N'ariiko n'esulaan i, éeyemi toko tu búsuumo. 55Eseef ite esaraha i, ni sifaaf site ejoonana i kareyi fe ni káyemi ti kaŋesu ti biin ti kaware fu bukuuso keeyool Yesu, bare kabajut. 56Ábuki keehooje-hooj kajuusajuus toko kasaano, bare báhamin booniin uŋu buwayoor. 57Hireeŋareeŋ toko, bakaake ni karito keejuus bonde kasaano. Ni kaane: 58---Irijamojam ti kaanu: «Enuuf yendu yite i Atambatun yeenutee i nu sumoŋu, íñje kawelej yo, abe kabaju kunak kíhaaji, n'iŋ'inut eke yet'enutee nu sumoŋu.» 59Bare bija naane kásokina i bondu fe, báhamin booniin uŋu buwayoor. 60Asaraha ómbokun u n'arito eesiiŋo t'etut abe n'aane Yesu: ---A̱bajut bike bite kásafin ti bi kasoke bee t'awe? 61Bare Yesu n'akoowan kem, ásafinuto. Asaraha ómbokun u n'asooñ ákandijeno aano: ---Awe a̱amo fu Afakana u, Añi ite Atambatun eeware u kasokorooree? 62Yesu n'ásafino aano: ---Hee, íñje fu! Abe aruun kajuku Añi ute Húŋgowulan hu t'ariikee inde baatos bite Atambatun Ate Sembe su. Aruun yooŋ kajukio ti bibin nu bufor bu. 63Náami asaraha ómbokun u ajeha wañ woone abe n'aane: ---Uŋkut fu úsawulo eseede! 64Arijamajam naane álafatine i Atambatun. Buŋ b'arisoke? Kareyi fe ni kaane awareewar kayoolu. 65Bakaake náami kajaba kánundu te o. Ni kakobo ñíkin, abe n'iŋi kámiño bútuka ti kaanio: ---Á̱jooli fee aañ ámiñi fu! Esulaan i ni kaja ne o, abe ni karofaŋato. 66Piyeer áyemia t'etaam toko ti haanas hu, ake ásuŋgute t'ewenoora yite asaraha ómbokun u n'áreeŋin. 67H'ajuke hu Piyeer tu búsuumo bu, n'ajondoman te o afiyo abe n'aano: ---Awe yooŋ, aruun áriyemie fu ni Yesu ite u Nasaret! 68Bare n'ajeeŋoor. N'aano: ---Ijokut, ímeyiit naŋ n'á̱maŋie fu kasoku. Abe n'anuut toko eeja bija ti karuŋ kite ku tíyaŋ. Náami káajuloon kusoka. 69Bare ásuŋgute u oo aroka u n'ajuko. N'asooñ aane kéeyemie ku toko: ---Ániine ondu ite t'eriboora yeene! 70Bare Piyeer n'aŋk'ajeeŋoor. Diŋgilis kep, kéeyemie ku toko ni kasooñ kaano: ---Mánoman awe ite t'eriboora yeene, ábuki awe yooŋ ite Gálile! 71Náami Piyeer eeene: ---Iwaatuun fíya naŋ? Atambatun abin anoŋk eenij t'íñje kane arko íñje ijuuse! Ímeyiit áyin ondu aa arisok ii! 72Asoka iyu ahaban kep, káajuloon nu kusok húsooboriyan. Piyeer n'ábaŋino bi Yesu asoko bu aano: «Bala káajuloon ku kusok kiyak kibatikan, awe kaanu á̱meyiitam kireeŋ kíhaaji.» N'ásit biyiy.

will be added

X\