MARK 12

1Hunuut toko, Yesu n'asooñ áhamin n'eseef ite Esuwif i akolofan. N'aaniin: ---Abajeebaj. Ake ániine abine áhin etool ite kireseŋ. N'asiis yo, abe n'awak kaayeen t'elaaliñj yómbokun kaanuku iŋi kabin katuusan toko kireseŋ ku. N'arok yooŋ ásukut bija tu bujukar bu. Ahaban, n'aŋes eroka anaŋ toko kaanuku iŋi kabin káruboor ne o, abe n'aja kátuki. 2Kireseŋ ku kilaaña, n'aboñ ake tu búsukateen boone t'eroka i kaanuku keesaano húrub hoone. 3Bare ni kajok ásukateen u kámiñ, abe ni kayeetano ti kasaanuto doon fe. 4N'asooñ aboñ ake ásukateen. Ni kanufan ondu ti hikaw, abe ni kálafatino. 5N'aŋk'aboñ ake áhaajiyan. Ondu, ni kayoolo. N'aboñ bakaake úkaan. Bare ni kámiñ bokonde, bakaaku ni kayooliin. 6Náami bare an afeeneŋ taŋ aroŋo fu toko a ayino kaboñu; o aamo fu añi oone a ámaŋie u. Náami eeboño ti kaanu ni hikawo: «Boko kájeŋgin añi úuma.» 7Bare eroka i ni kaanoor toko: «Ondu aja fu bibin biŋeñeno n'etool i. Úyoolo, abe etool i n'eŋ'éyemi yite i úne!» 8Ni kajoko kayool, abe ni káfiiten ehunuŋ i tíyaŋ etool i. 9Yesu n'ákandijeniin aaniin: ---Naŋ n'ate etool i aja fu káhinu? Akina bibin, n'aŋ'ayool eroka yendu fe, abe n'aŋes bakaake anaŋ toko. 10Eeman arijaŋgajaŋga bonde beesokee bu ti Míkiñjin mu? Meenaan: «Elaaliñj i y'enuta i káfiitene i yéeni, yo esooñe fu éyemi meeyane mite enuuf i. 11Atemit áhine fu bondu, abe bijahalajahal úne dómbokun!» 12Eseef ite Esuwif i ni kaŋes naane kaja i káhinu kaanuku man ni kajok Yesu, ábuki kámoomi kaanuku h'áhamine hii akolofan, boko k'asoke fu. Bare makamu kákolakoleyi hahooja hu, ni kawaso iyu keeyeet. 13Bakaake t'Efarisiyeŋ i, ni bakaake ti kéesiiŋooreina ku n'Erod ni káboñinee ti Yesu kaanuku keebuuto. 14Káreeŋin ni kaano: ---Ámuse u, írimoomi kaanuku awe an ite bifeeneŋ. Á̱koleyiit yooŋ an fe, ésuk i karare t'awe, ábuki á̱anaariit man an onde an ómbokun man yooŋ, abe aŋ'a̱liiken ésuk i múniyo mu ti bítim bite Atambatun. A̱sok uni fee, man uf'újaam áyi ómbokun eeemo u Rom búhal, n'uŋ'útin t'Eluwa yite Moyis, man yooŋ bayi? Úwarawar kajaamu bo, man yooŋ aaa? 15Bare Yesu n'ámeyi kaanuku ti kabuutio ti kaamo fii. N'aaniin: ---Íñje a ariŋes fee kabuutu? Arisaanam fee érirem iijuk. 16Ni káyitino efeeneŋ, abe Yesu n'aaniin: ---Buhooŋu bonde t'érirem i bite bu aañ, nu huruwu hu? Ni kaano: ---Áyi ómbokun eeemo u Rom. 17Náami Yesu eeeniin: ---Yooh! Kame arijaam áyi ómbokun eeemo u Rom buroon b'akino bu, Atambatun yooŋ buroon boone. Hirim h'ásafiniin hu ni hijahaliin dómbokun. 18Bakaake t'Esaduseyeŋ i ni kabin kajuk Yesu. (Boko kaamo fu kiŋki kaane keekete ku karoŋut birito.) Ni kaano: 19---Ámuse u, Moyis akiñjakiñj t'Eluwa i aane úne: «Ániine eesee af'aket t'abajut añi, at'o awarawar kasayi anaare u keebaj biñi, t'áami hahiyu bakate ku at'o eekete u.» 20Náami bare abajeebaj bakati kaamo hutok ni bákasuba. Aneemak u n'asa, abe n'aket ti kabajut añi. 21Ásooboriyan u n'asa anaare u; n'aket yooŋ ti kabajut añi. Áhaajiyan u yooŋ, mo mifeeneŋ mu. 22Kareyi fe hutok ni bákasuba ku ni kaket ti kabajut biñi. Kaketa kahaban, anaare u yooŋ n'aket. 23Hunak hite bíriteina bu t'eket i, anaare u káyemi ite u aañ tu boko, makamu kareyi fe hutok ni bákasuba ku kasaosa? 24Yesu n'aaniin: ---Árijuuma fu, abe árimoomi iŋi naŋ? Ábuki árimeyiit Míkiñjin mu, árimeyiit yooŋ sembe site Atambatun. 25Keekete ku ifi káritein, háyine hu iti kasa, haare hu yooŋ iti kaseño, bare buroŋ booniin káyemi naane bite emalaka i keeemo ku t'etiir. 26Hite bíriteina bite keekete ku, kame arijaŋgeit ti kaawiit ku Moyis akiñje ku, tu busokee du iŋ'ite añoyi éeyelie u abe ásufeit? Bikiñjeekiñj kaanuku Atambatun aanaan Moyis: «Íñj'eemo fu Atambatun ite Aburaham, n'Isak, ni Sakob.» 27Atambatun, akina Atambatun ite keeroŋe ku, bija ni keeenee ku boko kakete fe, ábuki buroŋ bu t'éketiit ti biraane fu. Árijuumajuum dómbombokun! 28Ake t'émuse yite Eluwa yite Moyis ajamajam Yesu ti síjeeŋoor su n'Esaduseyeŋ i. N'ajuk kaanuku Yesu ásafiniinsafin áwari aa. N'átofin abe n'ákandijeno aano: ---Tu suluwa su fe, yiin ehaŋe fu? 29Yesu n'aano: ---Yeehaŋe i fe yeemo fu yende yeeene i: «Arijamatan, aruun bakate ku Israyel! Atemit aamo fu Atambatun ite úne, akina aamo fu Atambatun unoono. 30A̱warawar kámaŋi Atemit Atambatun úuwe á̱habanein: t'eholi, ti yaan yúuwe, ti kaayinoor kúuwe, ni ti sembe súuwe fe.» 31Ésooboriyan i eemo fu yende: «A̱warawar kámaŋi áwiyi húŋgowulan naane á̱maŋie i hikawi.» Abajut eke eluwa yeehaŋe sondu. 32Ámuse ite Eluwa i n'aano: ---Iyu kep Ámuse u! B'a̱soke bu bite toko: Atambatun afeeneŋ taŋ abaje fu, abajut ake eewayee ne o. 33Húŋgowulan awarawar kámaŋi Atambatun t'eholo, ti yaan yeene, ti kaayinoor koone, ni ti sembe soone fe. Awarawar yooŋ kámaŋi áwiyo húŋgowulan naane ámaŋie i hikawo. Bondu bihaŋe fu ti kásufu kite sunuk su bija t'Atambatun, nu wusarah wu fe. 34Yesu n'ajuk kaanuku áwasawasi aa ti kásafin koone. N'aano: ---A̱kamboorut ni Jáyi jite Atambatun. H'asoke hu bondu ahaban, an yooŋ asooñut akañen kákandijeno bike. 35Yesu n'áyemi ti kaliiken ésuk i hirim hu t'Enuuf ite Atambatun. N'ákandijen aane: ---Buŋ b'émuse yite Eluwa yite Moyis kayino fu kasoku kaane Afakana u añi Dafit? 36Dafit humuumo, Búwejet Beenabe bu bitiŋgotiŋg ayak abin áami aana: «Atemit aanaan Anahaan úuma: "A̱riiko inde baatosam ayak abin áami ikalaa enatoora íiwe tuus, awe á̱ayemi áyi u."» 37Dafit humuumo aŋ'aano «Anahaan u». Náami buŋ b'Afakana u ayino fu kasooñu áyemi añio? Bakan úkaan kámoomi ti kajamatano. Nu hutoofiin dómbokun. 38Yesu n'aliiken ésuk i aaniin: ---Arinaŋ toko kikawuun t'émuse yite Eluwa yite Moyis, kéemaŋie kee kañaahoor nu wañ wéewarie, abe ni kámaŋi ésuk i eŋ'erito yeesaafiin ti sifiñjan su. 39Boko ifi kariiko hágila ti ñáalawum ñu, abe hiriy ni hibaj, boko ifi kajab kariiko keewun ésuk i. 40Iŋi kamer haare hu ki bákayiniin kakete ku, keeyit buroon booniin fe. Abe káyemi ti kalawu, n'iŋi kafiyo naane, t'abin aane boko kajake. Atambatun kaniju tu boko ahaŋ diyu. 41Yesu n'ariiko ajoŋoor ni tindi kajoloŋan sírirem su, toko t'Enuuf ite Atambatun, eejondoman naane hahooja hu uu hujoloŋan toko sírirem su. Kusaanum keehooje ni kajoloŋan toko seefame-fam. 42Ake anaare n'áreeŋin. Abajut doon fe, áyino yooŋ aketaket. N'ajoloŋan toko mírirem músuba meejarut doon dómbokun. 43Yesu n'áruwin eriboora yeene abe n'aaniin: ---Iisokuun bifeeneŋ bu: anaare ondu eebajut ii, abe yooŋ áyino aketaket, doon d'ajoloŋane du diyu dihaŋahaŋ dite du bakaaku fe. 44Ábuki doon di kajoloŋane du, tu boko dóoniit. Bare akina, ni kabajaate koone, asaanasaan doon d'áyekie du fe, d'abaje du yéeni dite búkuumanooro.

will be added

X\