LUK 21

1Yesu n'ajondoman, n'ajuk kusaanum ti kajoloŋan sírirem t'ekees i, toko t'Enuuf ite Atambatun. 2N'ajuk yooŋ ake anaare, abajut doon fe, áyino aketaket, ti kajoloŋan toko mírirem músuba meejarut doon dómbokun. 3Náami eeene: ---Iisokuun bifeeneŋ bu: anaare ondu eebajut ii, abe yooŋ áyino aketaket, doon d'ajoloŋane du diyu dihaŋahaŋ dite du bakaaku fe. 4Ábuki doon di kajoloŋane du, tu boko dóoniit. Bare akina, ni kabajaate koone, asaanasaan doon d'áyekie du fe, d'abaje du yéeni dite búkuumanooro. 5Bakaake ni káyemi toko ti báhamin iŋ'ite Enuuf ite Atambatun, iŋi kaane sujuju si kayite su keenut yo súwarie aa, nu buroon beesarahee bu toko fe. Yesu n'aaniin: 6---Bibin birko, an at'aŋk'ajuk diyu ejuju yeelaŋgatanee t'eke; kiñaan ku kireyi fe káfiitenee. 7Ni kákandijen Yesu kaano: ---Ámuse u, a̱sok uni fee kaakaŋ nu bondu bija fu kabaju, ni te naŋ t'ésuk i eja fu kakeetan kaanuku búlohenno? 8Yesu n'aaniin: ---Arinaŋ toko kikawuun, an atum'abuutuun. Ábuki bakan keehooje bibin nu huruwu húuma iŋi kaane boko kaamo fu Afakana u, man yooŋ ewahatu i ereeŋa. Bare atum'ariseiin ti hiñaawu. 9Af'arijam kitiik, man yooŋ sulob, atum'árikoleyi, ábuki buwarawar kajabu bibaj, bare kamoosen kíteiit etaam i. 10Abe n'asooñ aane: ---Ésuk birito yeetiik n'ésuk, hikinu birito heetiik ni hikinu. 11Etaam i buyoŋoŋanooro tu búsuk beehooje, bujoñjol kabaju, nu wúsomut yooŋ. Buroon béetumbe búkolinani naane káŋaasina tu bufor bu. 12Bare bala bondu bibaj, bakan kajokuuun, ni káhihinooruun, ni kaja n'aruun ti ñáalawum ñu keejoonanuun toko, abe ni kakuluun. Boko kásikuuun kasaan bákayi ku n'eseef i uŋu húuma hu. 13N'aŋ'aribaj toko bítim ariiseedeiin bifeeneŋ bu t'íñje. 14Atum'arisoŋk bijahale ti b'arija bu kasoku ariiramooro. 15Ábuki íñje ija fu kasaanuun kirim ku. Íñje yooŋ kawunuuun búwesinato, abe mayet afeeneŋ t'enatoora yeenuun at'áyini kajokuuun ti báhamin, man yooŋ n'ajeeŋan bo. 16Kumuum kite sifaafuun, ni síñaayuun, ni bakatuuun, n'ebuke yeenuun, ni bákawiyuun kaja fu kásikuuun kasaan eseef i, abe bakaake t'aruun kayooliee. 17Ésuk i fe kahuufuuun uŋu húuma hu. 18Bare kaawan kifeeneŋ kite ti kikawuun utu kútowuto. 19Af'arijok alit tip, n'aŋ'aribaj buroŋ béehabanaariit bu. 20---Af'aribin arijuk esulaan ni kaŋolool hikinu hite Serusalem, árimeyi kaanuku búbujo bite te ho bireeŋa. 21Náami keeyak ku káyemi Súde kawarawar kateyi bija ti kirij ku; keeyak ku káyemi Serusalem kawarawar kamoken keenuut bo; keeyak ku káyemi ti kitaaŋaat ku kawarut bija ti hikinu hu. 22Ábuki kunak kondu káyemi kite hunukan, kaanuku man beesokee bu ti Míkiñjin mu fe ni bibaj. 23Afin ayak buŋ kátaañi kunak kondu ti haare hu keenooto ku fuufiiin, ni keeemo ku ti kájuwan! Ábuki sílaam sómbokun kabaju t'ésuk yendu, abe Atambatun káwufoor bakate ku bo kaanuku ayiŋatayiŋat tu boko. 24Bakaake kayooliee nu wúbura, bakaaku ni kajokee keejee nu boko tu búsuk beekambe-kamb, abe kéemeyiit ku Atambatun kakakaroor Serusalem, ayak abin áami kunak ki kawunee ku kihabanaa. 25---Bike kajukiee ti taanak tu, ni ti hiim hu, nu tu búloofiiloof bu. T'etaam ye, han hu karitan, kúsuw ku yooŋ kátumbu uŋu kuwen, ésuk i ereyi fe eyak eŋ'ékoleyi naane. 26Bakan keehooje buwato ekoloowe taŋ ti kayinoor kite beeja bu kabaju t'etaam ye, ábuki sembe site t'etiir buyoŋoŋanooro. 27Abe ésuk i n'iŋi kajuk Añi ute Húŋgowulan hu ti bibin tu bufor bu ni sembe, o káanikin naane. 28Kane buroon bondu bijab kabaju, árisaarino abe n'ariŋalo, ábuki memee Atambatun n'aŋ'afakanuun. 29Abe Yesu n'áhaminiin akolofan aane: ---Arijondoman ti nífigiye, man yooŋ ti ñaañu ñunukanuk. 30Af'arijuk búsuus bite te ño bíyeyin, aŋ'árimeyi kaanuku haajam hu húlohenno. 31Náami af'arijuk yooŋ kane buroon bondu bibaj, árimeyi kaanuku Jáyi jite Atambatun júlohenno. 32Iisokuun bifeeneŋ bu: bakate ku hahiye iti kaket kareyi tu bondu fe bibajoorut. 33Etaam i nu bufor bu kamoosen, bare báhamin búuma iti biket hikee-kee. 34---Arinaŋ toko kikawuun! Atum'ariniŋan siheluun ni biyinoor bite kiriy, n'éwusan, man yooŋ biyinoor bite buroŋ bu. Áriwasiit, hunak hu n'iŋi hijendanuun káfufu 35naane embaalu ti bisaan; ábuki ho káneyina t'ésuk i fe. 36Áriniyo, abe n'arilaw ko kireyi fe man Atambatun n'awunuun sembe site kafaku tu buroon bondu beeja bu kabaju, ni site bisiiŋo hágila Añi ute Húŋgowulan hu. 37Kaajiŋgan, Yesu aŋ'aliiken ésuk i t'Enuuf ite Atambatun; bare kaanendan, n'aŋ'aja aŋot ti hirij hite Ñúolifiye ñu. 38Nu bújom bib, ésuk i fe eŋ'esoŋk erito, yeeja t'Enuuf ite Atambatun bajamatan boone.

will be added

X\