SUD 1

1Íñje Sud aroka ite Yesu Kiris, íñje at'ute Saak íkiñjinuun fee aruun k'Atambatun Faaf u aruwe ku. Ámaŋiuunmaŋi, abe Yesu Kiris af'ajukaruun. 2Yala Atambatun n'ayubiyenuun, abe n'awunuun káasuumaay ku ni kámaŋi ku. Abe n'awunuun bondu fe arifaman. 3Kújakuwe, aruun k'ímaŋie-maŋie ku, ítumbatumba ímaŋi kákiñjinuun iŋi naane Atambatun afakane i úne. Bare hahiye ijukajuk kaanuku iwarawar kákiñjinuun bike bite kayaŋgananuun kikaw, kaanuku man n'árituum uŋu múniyo mite Hirim Heetoofe h'Atambatun awune hu hiraanu bakan k'akino ku. 4Ábuki abajeebaj bakan keejakut, kéenuusee kéeyoosein t'aruun. Iŋi kawetekanoor hirim heesoke hu mite kajaku kite Atambatun ite úne, kaanuku kéeyini káhinu beejakut naane hutoofiin i. Iyu ifi kateñeko Yesu Kiris eeemo u Aseef ite úne unoono, n'Anahaan u yooŋ toko. Afiyeefiyo naane Míkiñjin mu musoke i buŋ b'Atambatun aja fu kaniju tu boko. 5Naane ariheeke i fe áriimeyi bonde b'ija bee kasokuuun, íñje bare kábaŋinanuun bo. Atemit afakane fu bakate ku Israyel fe t'ésuk ite Esipt, bare keeteñekee ku káyilen tu boko, n'ayooliin. 6Áribaŋino yooŋ emalaka i kéemaŋiit ku biriiko t'Atambatun anaŋiin du yéeni, kayak kánuutin toko ti kakine du. Atambatun n'ajokiin, abe n'afaakiin ni ñaasel hiraanu. Ahaban, n'anaŋiin t'ébaani i bija tu Hunak hómbokun hu hi kayak hu kajoonanee. 7Áribaŋino yooŋ bakate ku Sodom, nu Gomoor, ni kikinu keeemo ku ne bo, kiŋki káhinaani naane emalaka yendu. Iŋi kafurukato yéeni, abe n'iŋi kaŋes yooŋ kaŋotu ni bakan keenooto kúŋgowulan naane boko. Hahiye bokondu ti kajuku kúnuur ti sineemak séehokaariit, abe bondu búwufoorawufoor úne kaanuku núunaŋ toko kikaw úne. 8Háyine hondu kéeyooseina ku t'aruun, iyu yooŋ ifi káhin: kíyawutu kooniin iŋi kitiŋgiin keebuusatan siniiin. Iŋi kahuuf sembe site Atambatun, abe n'iŋi kálafatin emalaka i kéenike ku keeemo ku t'etiir. 9Humuum Misel aseef ite emalaka i áhinut bondu. H'aamo hu káñakoorino ni Setani kaanuku kéemeyi aañ tu boko aja fu kásiku ehunuŋ ite Moyis, ajukerut te o n'aane éelafatino. Aanoen kep: «Atemit abin anij t'awe!» 10Bare háyine hondu iŋi kálafatin bi kámeyiit bu. Abe buroon bimbi kanoŋkooro kéehin naane bíndakakureŋ bu, bondu yooŋ bija fu kátowutaniin. 11Átaañi tu boko! Ábuki kasasa Kayin ti hiñaawu; káhinahin beejakut naane Balam kaanuku man ni kabaj sírirem; kátowutatowuto yooŋ ábuki kárahanorahan naane Kore. 12Áfuñinanieefuñinani kaanuku bokondu keeñoofo n'aruun t'afeeneŋ. Káfuñaariit yooŋ kane káyemi ti hiriy, abe uŋu hooniin hu taŋ h'ifi kayinoor. Kámoomi naane etiir yéebaaniina, eyam i n'eteyoor ne yo, abe enubut. Kámoomi naane ñunukanuk ñéebukaariit, hutoof ewahatu yite te ño ereeŋe, ñunukanuk ñeerondee, butum ñéetumbe ñiket. 13Kámoomi naane kúsuw ti han heeriye; iŋi káfuujin buroon booniin béefuñinanie bu naane han hu uu húyuusin kúsuw kite te ho ti katafa ku. Kámoomi naane wúloofiiloof weehiile, abe Atambatun afareiinfare báakinum bite hiraanu tej t'ábaanie-baanie du. 14Enok, eeemo u atoken u ni bákasuba ti sifaaf úne kéeseina ku t'Adam, asoŋka bíhamin iŋ'ite hu bokondu aane: «Arijamatan! Atemit bibin n'emalaka yeene keenabe ku keereeŋe súñjune-súñjune, 15éeyini kajoonan etaam i ereyi. Akina kaniju ti bakan keejakut ku iŋi naane káhino i beejakut. Akina kaniju t'ehoofoora yendu keejakut kii iŋi naane kálafatino i fe.» 16Bokondu burokiin kawatan ésuk i taŋ, kámusut hikee katoofan; beetoofiin bu taŋ b'ifi káhin. Báhamin booniin fe jímak, abe ñutum ñu aŋ'atoof naane kaanuku keebaj t'ésuk i doon. 17Kújakuwe, aruun k'ímaŋie-maŋie ku, aruun bare, áribaŋino b'epotor ite Anahaan ite úne Yesu Kiris kabine bu kasokuun kóŋkeyin. 18Kaanuunyen: «Tu kunak kiraanu ku, kabaju bakan keeyakuun kásuwu, abe wúfaŋi wooniin weejakut wu taŋ wi kaja fu káhinu.» 19Bokondu ifi kayeeñooran kéeyilene ku. Buroon bite kúŋgowulan ku beemo fu ti kikawiin; Búwejet bite Atambatun bunooto tu boko. 20Kújakuwe, aruun k'ímaŋie-maŋie ku, aruun bare, arihaŋ bija hágila ti káyilen koonuun keenabe ku. Aŋ'arilaw ni sembe site Búwejet Beenabe bu. 21Kámaŋi k'Atambatun ámaŋiuun ku, arijokoor te ko, ti kanahan yooŋ hunak h'Anahaan ite úne Yesu Kiris, ti kajaku koone, aja hu kawunuuun buroŋ béehabanaariit bu. 22Aŋ'ariyubiyen kéeyilenut ku káhabanein. 23Arihaawananoor keeemo ku ti bija sambuun ariiramiin. Ariyubiyen yooŋ bakaaku, bare áriwasiyoor itim kabin kátifenuun nu doon fe deekole ni máhinar mooniin meejakut mu. 24Úsokoroor Atambatun afeeneŋ u eeŋaase u t'Anahaan ite úne Yesu Kiris eefakan úne. Akina áyinie fu kajukaruun kaanuku atum'ariney, abe n'áhinuun ariisiiŋo hágilao, o éenike u. Aruun kakuuru but, abe kikawuun katoofu dómbokun. Akina akino fu kániku ku, ni kahahu ku, ni sembe su, ni hiseefaate hu huta hu ti kájabina ku, ni hahiye, nu ko kireyi fe! Amiin.

will be added

X\