SAAK 5

1Hahiyu arijamatanam, aruun kusaanum ku! Ariyiy abe n'aririŋgan uŋu wútaañi w'arija wu kajuku! 2Ebaj yeenuun efuta, busobit bu yooŋ bujoka wañ woonuun. 3Búwurus boonuun beeseme, sírirem soonuun yooŋ. Bisem bondu bija fu katinanuun, abe bo kábuju siniuun naane sineemak. Aruun bokondu ti kakuukan ebaj kep, abe bare kamoosen kite etaam i kireeŋa. 4Áritumbut ariŋaaŋ kajaamu eroka i kéehotukanuun ku kitaaŋaat koonuun. Arijam naane ii kalolobool! Wuji wute eroka yendu Atambatun ajamajam wo, akina Atemit eehaŋe u ebaja sembe. 5Aruun bokondu tu buñoofo meetoofe kep, abe n'aŋ'árihin beetoofuun bu. Áriyoŋgianayoŋgian siniuun, abe hahiye áriyemia naane sunuk site bija kamootiee. 6Arijoonanajoonan bakan keetinut, abe n'ariyooliin. Kañakoorut n'aruun. 7Kújakuwe, náami árimuñ kep ayak abin áami Anahaan u abina. Arijuk naane awaña aa ámuñ ti kanahan éhotukan i yeereeŋ. Aŋ'ámuñ ti kanahan kite káriiŋ ku, ni basokotoŋ bu fe. 8Aruun yooŋ árimuñ; arijok alitee, ábuki bibin bite Anahaan u bulohena. 9Kújakuwe, atum'aŋ'áriŋuŋunoor ti bakaaku, man Atambatun atum'abin ajoonanuun. Ajoonana u ondu, áreeŋino ti karuŋ ku! 10Kújakuwe, áribaŋino eyiŋana yite Atambatun kéehamine ku tu huruwu hite Atemit. Kámuñamuñ hi kajuke hu sílaam su. Ariliikool nu boko. 11Uŋ'úene katoofana, ábuki kajokajok alitee. Arijamajam naane Sob abine i ámuñ, abe árimoomi naŋ n'Atemit abine fu awuno. Ábuki Atemit aŋ'ayubiyen naane, abe ajakajak faa t'ésuk i. 12Kújakuwe, beehaŋe bu fe beemo fu bonde: af'ariene aruun káhinu dike doon, atum'ariwaat hikee. Atum'ariwaat bufor bu, n'etaam i, atum'ariwaat yooŋ doon fe. Af'arko hee, ariene «hee», af'arko aaa, ariene «aaa», man Atambatun atum'abin ajoonanuun. 13Ake t'aruun af'áyemi ti sílaam, alaw. Ake t'aruun af'áyemi ti katoofu, ahooñ eesokoroor Atambatun. 14Ake t'aruun af'ásomut, aruw sifaaf site kéeyilene ku keebin keelaw bija te o, boko yooŋ ti kátisio éluuliin tu huruwu hite Anahaan u. 15Kalawu kondu ifi kíhinee ni káyilen, ko kafakan ásomuta u. Atemit karitano, abe arko áhinahin wuhoofoor, n'aŋ'aboŋketo wo yooŋ. 16Náami arisokoor wuhoofoor woonuun, abe n'aŋ'arilaw bija ti bakanuun man n'árikoyi. Kalawu kite an éejube kibajabaj sembe, abe kúnooni káhinu buroon bómbokun. 17Eli húŋgowulan naane úne. N'alaw áhabanein kaanuku etiir i etum'enub; etiir i ehaŋut enub areeŋ simit síhaaji ni kiim hutok ni hifeeneŋ. 18N'abin asooñ alaw; etiir i n'énubin, abe etaam i n'esooñ ebuk miriyaay. 19Kújakuwe, árimeyi bonde: ake t'aruun af'akamb múniyo mu, abe ake n'ábatikanno, an éenuutanna ahoofoora ti bítim bu t'áyemie du tu bútowuto bu, an ondu afakano t'eket i, abe o kákinineŋ wuhoofoor weehooje nu wuboŋketee.

will be added

X\