SAAK 3

1Kújakuwe, bakate ku t'aruun kiŋki kaliiken ésuk i kawarut kahooju, ábuki árimoomi kaanuku uni eliikena yite ésuk i, uni kajoonanee ahaŋ kaniŋu bakaaku. 2Úreyi fe uŋ'újuum kuhooj aa ti máhinar meehooje. An éejuumaariit ti báhamin, akina an eekuure but, akina an éeyinie bújokumooro áhabanein. 3Bifaliñj bu, uŋ'úkob bo ñañ tu ñutum kaanuku iŋi bijam t'úne; iyu uf'úyini kajoŋooran bo. 4Arijondoman yooŋ ti bisahar bu: bihah buŋ mi bihahe, kúsofooru kite te bo kiŋgiŋgilij. Hutoof yooŋ eyam yeebaje sembe n'etib, tu hutoofe du eteyana i t'ifi bija. 5Iyu yooŋ i káaleluf aamo fu. Átetateti faa t'eni, bare áyinooni kasamban buroon beehahe. Arijondoman: sineemak siŋgilis síyinooni kásufu bujal bómbokun! 6Káaleluf ámoomi naane sineemak. Toko ti meejakut mu meemo fu. T'eni i ti keemo fu, abe iŋi kítifen yo ereyi fe. Iŋi kítifan buroŋ bite b'úne fe ni sineemak séenuutina sambuun. 7Húŋgowulan áyinooni káhinu saama náami éndakakureŋ yeejam te o, ni bilele bu, nu ñuroon ñu, ni bisaan bu. 8Bare mayet an afeeneŋ áyinie kajoku káalelufo. Káaleluf ajakut, abe yooŋ ábebaariit; aŋ'ahooj bib ni bíniw béeyinie kayoolu. 9Ne ko n'uf'úsokoroor Atemit Faaf úne, ne ko yooŋ n'uf'úwuum bakan úne kúŋgowulan k'Atambatun áwuwane ku kanokoor ne o. 10Kasokoroor uŋu kúnuutin tu butum bifeeneŋ bu ni káwuumu. Kújakuwe, buwarut bija iyu. 11Káabulanu áyinooni fíya kánuutanna t'efulu efeeneŋ móhujo míniina ni meehire? 12Níndiif áyinooni fíya kabuku bihemb, kújakuwe? Núfuuf áyinooni fíya kabuku bíndiif? Káabulanu kite móhujo meehire kiyinaat kánuutanna móhujo míniina. 13Abajeebaj fíya t'aruun an éewesinatee abe yooŋ n'áwasi? Áwufoor bo ésuk i ti manoŋkar moone meejake mu mamm'áhin, ti káneeni koone, nu búwesinato boone. 14Bare arko suhol soonuun suhoojahooj ni bíhiñanoor béetike, ni biyinoor yooŋ bite bíhaŋoor, atum'aŋ'arisambooro, atum'arijuus yooŋ arisaan múniyo mu. 15Búwesinato naane bondu búnuutinoot t'etiir, bo bite t'etaam ye, bite húŋgowulan, ti Setani tu búnuutina. 16Ábuki ti bíhiñanoor beemo, ni biyinoor bite bíhaŋoor, kajoŋooraate kondu toko, ni kinij kánokan keejakut. 17Bare búwesinato béenuutina bu t'etiir, bítiyar bite te bo beemo fu bukuurakuur. Hunuut toko ni bíyemi bite káasuumaay, ni bíneeni, abe biyaŋgut hikaw. Uŋu buyubiyen dómbokun, abe n'uŋu bubuk kunoŋk keejake. Bújokaariit ésuk i kawayo, abe bútuukaariit. 18Kiŋki káhin ésuk i keebukan iŋi kanaw káasuumaay, abe miriyaay mimmi kabaj toko meemo fu buroŋ beejoŋoore.

will be added

X\