SAAK 2

1Kújakuwe, aruun kéeyilene ku t'Anahaan ite úne Yesu Kiris éenike u, atum'arijok ésuk i kawayoor. 2Ariliik naane háyine bákasuba kabine fee káŋaabeinuun t'arikuukanooree: ake tu boko asolasol bimeŋk bite éwurus ni kájufa kéewarie-wari, áwiyo abajut, abe bires taŋ b'asiimee fu. 3N'arijok eesiimee u wañ wéewarie wu atoof ti kaanio: «A̱bin, a̱bin a̱ariiko diye t'ajake du.» Bare eebajut u, ake t'aruun n'aano: «Awe a̱siiŋo», man yooŋ: «A̱riiko t'etaam diye bite wuwotam.» 4Arko iyu af'árihin, aruun kumuumuun arijokoorajokoor fíya arireyoor? Aaa, bamb'arisok fe ti bakaaku, ti biyinoor boonuun beejakut bu t'ufu búnuutin. 5Kújakuwe, aruun k'ímaŋie-maŋie ku, arijamatan: keebajut kíiit kereŋ k'Atambatun ajifane fu kaanuku kéeyilen te o, káyilen kooniin kéeyemi ebaj yeeniin, abe ni kabaj Jáyi j'aane ju o kawunu kéemaŋio ku? 6Bare aruun aŋ'áriwiinian keebajut ku! Kame aañiin kereŋ k'ifi kálaamanuun, abe ni kakalameuun ti ñájoonanum ñu? Eeman kereŋ keebaje ku? 7Boko yooŋ ifi kálafatin huruwu hite Kiris éekiniuun u. 8Míkiñjin mu meenaan: «A̱warawar kámaŋi áwiyi húŋgowulan naane á̱maŋie i hikawi.» Diyu eluwa yéenuutina t'Atambatun áyi u. Af'árihin nu múniyo naane esoke i, árihinahin ajakee. 9Bare n'arifin arijok ésuk i kawayoor, árihina kaahoofoor, abe eluwa i etinanuun yooŋ, ábuki árijuuma te yo. 10An af'áhin naane buluwa bite Atambatun fe busoke i, abe n'ájuum t'efeeneŋ taŋ, atina ti saasu sireyi fe. 11Ábuki Atambatun eeene u: «Atum'a̱ŋot n'an ariseñeit», o yooŋ aane fu: «Atum'a̱yool húŋgowulan.» Náami arko a̱ŋotut n'an ariseñeit, abe bare n'a̱yool húŋgowulan, á̱juuma t'eluwa i. 12Iŋ'ite ho aamo fu af'áriyemi ti báhamin man yooŋ ti káhinu doon, áribaŋino kaanuku Atambatun aroŋa eebin eejoonanuun t'eluwa i yey'enuutan úne tu húsukateenaate hu. 13Atambatun af'áyemi ti kajoonan ku, at'aŋaaŋ kayubiyen an éeyubiyenaariit u bakaaku. Bare af'aŋ'a̱yubiyen bakaaku, Atambatun at'atinani. 14Kújakuwe, an af'aŋ'aane abajabaj káyilen, abe bare ánoŋkaariit ajakee, bibajabaj fíya éñjeriŋ? Káyilen kondu kúnoonio fíya kafakan? 15Ariliik naane ake ti bakanuun kéeyilene ku asawulee fee wañ wute bisiimo, man yooŋ abajut eeñoofo. 16Abe ake t'aruun n'aano: «Yooh, úwasoor, a̱riiko ti káasuumaay; a̱sol wañ weeniŋe, abe n'a̱ñoofo a̱bir!» Bondu fíya bibajabaj éñjeriŋ t'ariwunuto doon d'asawulee du kaanuku eeroŋ? 17Iyu yooŋ i káyilen ku keemo fu: an af'áyilen barebare, abe áwufoorut ko tu hunoŋk hoone heejake hu, káyilen koone keekete. 18Bare an n'afin aane: «Awe á̱yilenayilen, íñje n'iŋ'ifin inoŋk ajakee», íñje kaanio: «Á̱wufooram buŋ b'a̱yino fu káyilen t'á̱noŋkaariit ajakee, abe íñje n'iŋ'íwufoori káyilen kúuma tu hunoŋk húuma.» 19Eeman á̱yilenayilen kaanuku Atambatun afeeneŋ abaje fu? Kame beejake. Sirab su yooŋ síyilenayilen bondu, abe iŋi síbit ekoloowe taŋ. 20Esoŋ yendu! Á̱maŋamaŋi bukuuri kaanuku an af'áyilen barebare, abe ánoŋkaariit ajakee, káyilen kondu kibajut éñjeriŋ? 21Te naŋ t'Atambatun ajuke fu kaanuku faaf úne Aburaham ájubajub? Ti manoŋkar moone fu, h'ásike hu añio Isak kaanuku eesaraho. 22A̱juka kaanuku káyilen koone kiriboorariboor ni manoŋkar moone, abe káyilen koone nu kurum tak iŋi manoŋkar moone. 23Iyu i bonde bi Míkiñjin mu musoke mu bibaje fu. Meenaan: «Aburaham áyilenayilen Atambatun, abe Atambatun n'ajuk ti káyilen koone n'ajoko an éejube.» Abe Atambatun n'aŋ'aano áwiyo. 24Náami arijuka kaanuku Atambatun aŋ'aane an ájubajub ti manoŋkar moone; káanukiiit iŋ'ite káyilen k'abaje ku barebare. 25Bondu yooŋ bibaje fu Rahab aa afurukato. Atambatun ajokojok an éejube ti manoŋkar moone, h'abine hu awanan te o Esuwif i keeboñee ku, abe n'áyokunaniin keeŋaas bike bítim keefak. 26Húŋgowulan heebajut síhiinu, o an eekete. Káyilen yooŋ keeriboorut ni manoŋkar meejake, ko yooŋ keekete.

will be added

X\