SAAK 1

1Íñje Saak ii irok bija t'Atambatun n'Anahaan u Yesu Kiris ikiñje fee. Íñj'endu ti kasaafu bakan kite Atambatun kareyi fe keeyisaloolee ku t'etaam ye. 2Kújakuwe, kikawuun kutoof dómbokun kane ariwar kajuku sílaam sánosan. 3Ábuki árimoomi kaanuku af'arijuk sílaam, abe n'arijok alitee ti káyilen koonuun, at'ariruuso hikee. 4Bare arinaŋ toko kikawuun karuusaate koonuun kéeyemi kite hiraanu, man n'áriyemi bakan keeyane faŋ ti bítim bu, doon fe itim dijahaluun. 5Bare ake t'aruun afut'áwesinato areeŋ, alaw bo Atambatun, abe Atambatun kawunio bo. Ábuki Atambatun aŋ'awun ésuk i ereyi fe n'ehol yeekuure, abe áwatanaariit an. 6Bare an ondu awarawar kalawu ni káyilen, abe ehelo etum'éhin kúsuba; ábuki an e ehelo éhine kúsuba ámoomi naane húsuw hite káajuŋeey h'eyam i eritane, abe n'etiŋg ho t'émaŋie du. 7An naane ondu awarut kayinoor ti hikawo n'aŋ'aane o kabaju dike doon t'Atemit, 8ábuki hikawo iŋi hiteyoor, abe ájokaariit ti bifeeneŋ tu buroon bu fe bamb'áhin. 9Akarjen eebajut, hikawo hutoof naane Atambatun ayito i. 10Eebaje u, hikawo hutoof naane Atambatun awanano i. Múniyo naane éfuloor ite ti kitaaŋaat ku ee eñoob, iyu yooŋ i buroŋ bite eebaje u bija fu. 11Taanak tu iŋi tirito ni kásufu kite te to fe, abe iŋi tisayan mahos mu; éfuloor i eŋ'eney, abe káwari kite te yo uŋu kútowuto. Iyu yooŋ e eebaje u ayak fu bútowuto o ti bakola boone. 12Atoof t'an kane ajok alitee o ti sílaam; ábuki af'áwufoor kaanuku ajokajok alitee ahaban, o kabaju hisiibanu: ho heemo fu buroŋ b'Atambatun aane bu o kawunu kéemaŋio ku. 13Ehol ite ake ef'eŋes káhinio eehoofoor, atum'aane: «Atambatun aŋes fee n'íñje.» Ábuki meejakut mu miyinaat kaŋesu káhinu Atambatun eehoofoor, abe akina humuumo áŋesaariit káhinu an eehoofoor. 14Wúfaŋi weejakut wu ufu wubuut an, abe nu wuŋes káhinio eehoofoor. 15Wúfaŋi weejakut wu ufu wubuk kaahoofoor, abe kaahoofoor ku ifi kija ayak abin áami kihaha, n'uŋu kubuk eket i. 16Kújakuwe, aruun k'ímaŋie-maŋie ku, atum'aribuut kikawuun: 17kawunu fe keetoofe ni keejake, t'etiir tu buroon bondu búnuutina fu. T'Atambatun áwuwana ite meejaaŋe meeemo mu t'etiir t'ufu búnuutin béewanein. Atambatun áwayaariit, áwetekaariit yooŋ éehin ébaani. 18Ho hutoofo n'awun úne buroŋ, aŋ'asaan bo ti hirim hoone heeemo hu hite nu múniyo, kaanuku man n'úyemi étiyar i tu buroon b'áwuwane bu fe. 19Kújakuwe, aruun k'ímaŋie-maŋie ku, ariwarawar kámeyi bonde: huruw fe awarawar iŋi kamoken ti kajamatan kite bakaaku, bare atum'amoken ti báhamin, atum'ahil yooŋ ti kayiŋat; 20ábuki an eeyiŋate áhinaariit beejoŋoore beetoofe Atambatun. 21Iŋ'ite ho aamo fu arinuutan ti siheluun doon fe deekuurut, abe n'ariwas kunoŋk fe keejakut. Áritetianooro ariijok hirim heenawee hu ti siheluun, ábuki húnooniuun kafakan. 22Atum'ariraan ti kajamatan hirim hite Atambatun barebare, bare árihin yooŋ naane husoke i. Káhinaate iyu, n'aŋ'aribuut kikawuun. 23Ábuki an eejame hirim hu, abe áhinut naane husoke i, ámoomi naane an eeemo tu bujukooro ti kaajukooreey, abe n'ajuk naane anokoore i. 24Af'ajukooro ahaban, n'aŋ'aja, abe n'aŋ'ahaŋ afiil naane anokoore i. 25Bare an eejondomane jak t'eluwa yeejoŋoore i, af'ajok te yo alitee, Atambatun kásoniyano tu doon fe d'áhine. An ondu awarut kajamatan kaanuku eebin eefiil, bare áhin naane esoke i. Yo ef'enuutan úne tu húsukateenaate hu. 26An af'aane akina átumbatumba ajok bítim bu, abe bare ayinaat kajoku butumo, an ondu abuuta hikawo: káyilen koone kibajut éñjeriŋ. 27T'Atambatun Faaf úne, bítim bite bu nu múniyo abe nu bukuur, iye i bije fu: biñi bu éfiiten i, ni haare hu ki bákayiniin kakete ku, úyokunaniin kane káyemi ti sílaam, abe utum'úwas buroon beekuurut bu bite bu t'etaam ye béetifen úne.

will be added

X\