ESUWIF 8

1Bonde beemo fu beehaŋe bu fe ti b'iriemo bu ti kasoku ku: úbajabaj asaraha ómbokun naane ondu i irisokuun u tu bondu b'únuut bee te bo. Ariikariiko t'etiir bufor bu, inde baatos báariikeim bite híyiaate hu, bite b'Atambatun eehahe u. 2Ondu bo ti káhinu burok bite asaraha ómbokun t'Anabe du; aamo fu t'atant ite u nu múniyo. Abe atant ondu, kúŋgowulan kíiit kasiiŋano fu, bare Atemit asiiŋano fu. 3Asaraha ómbokun fe asiiŋaneesiiŋan kaanuku aŋ'abin asarah Atambatun buroon b'ésuk i bimbi kásikino. Náami asaraha ite úne ómbokun u awarawar yooŋ kabaju doon d'aware kasarah. 4Kane áyemi yéeni t'etaam ye, man átumb áyemi asaraha, ábuki abajeebaj esaraha naane t'Eluwa yite Moyis esoke du. 5Burok b'esaraha i bokondu bimbi káhin t'Anabe du, diyu búnokoorum bite beebaje bu t'etiir. Hi Moyis áyemie hu ti kaanu ku eerok atant u, Atambatun n'áyeegalo aano: «A̱naŋ toko hikawi á̱ahin areyi fe aliik naane t'íwufoori du ti hirij hu.» 6Bare hahiye Yesu asaaneesaan burok beejaaŋee bite esaraha i bakaaku, ábuki akina aamo fu t'etut Atambatun nu kúŋgowulan ku kaanuku eesiiŋan kaajamoor keehaŋe kite ku kóŋkeyin. Abe b'Atambatun asoke bu ti kaajamoor konde aane o kawunu úne bihaŋahaŋ katoofu bite bu kóŋkeyin. 7Arko yéeni kaajamoor kítiyar ku kukuure fu but, man kunuutanee kike kúsooboriyan keesiiŋanee. 8Bare bonde b'Atambatun awatane fu te bo bakan koone. Aaniinyen: «Íñje Atemit eene: bibin birko, íñje kajamoor ni bakate ku Israyel kaajamoor kíyeni, ni bakate ku Suda yooŋ. 9Ko buwayo ni k'ibine ku ijamoor ni sifaafiin kómbokun, hunak h'ibine hu ijokiin tu sumoŋu kaanuku íinuutanniin t'ésuk ite Esipt. Káhinut naane kaajamoor kondu kusoke i. Náami n'inuutan ehelam tu boko; íñje íhamine fee, íñje Atemit.» 10Abe n'áwutiyen aane: «Kaajamoor konde k'ija fu kajamoor ni bakate ku Israyel kane kunak kondu kunuut: íñje kanaŋu buluwa búuma ti siheliin, íñje kakiñju bo tu ñúwejet ñooniin. Íñje káyemi Atambatun ooniin, abe n'iŋi káyemi bakan kúuma. 11An at'aŋk'aja kaliiken at'o, man yooŋ ake ite t'ésuk yeeniin aŋ'aano: "Á̱meyi Atambatun". Ábuki kareyi fe kámeyiam, huta hu t'añi u bija yooŋ ti faaf u. 12Íñje kaboŋketiin wutin wooniin, it'iŋk'íbaŋino yooŋ wuhoofoor wooniin.» 13H'Atambatun áhamine hu aane «kaajamoor kíyeni», áwufoora kaanuku kaaku kihaana. Abe doon deefiyee, abe yooŋ ni dihaan, at'ahul nu dútowuto.

will be added

X\