ESUWIF 6

1Iŋ'ite ho aamo fu úwas inde kiñaawu buroon b'újabe bu úliiken ti bítim bite Kiris, abe n'úja hágila núujok beeniŋe bu, beeemo bu bite sifaaf su. Utum'uŋk'úsooñ ti beeheeke bu beesiiŋanee ti kátiyar ku, naane buwatanooro bite kinij keebajut ku éñjeriŋ kiŋki kibin n'eket i, ni káyilen ku t'Atambatun, 2ni kaliiken kite wuboste wu, ni bite birito bu t'eket i, ni kajoonan kiraanu ku, ni kásitu kite sumoŋu su ti bakan tu huruwu hite Atambatun. 3Úhaŋ bija hágila kep ti bite sifaaf su! Hutoof Emit, iyu u úja fu káhinu. 4Abajeebaj bakan ku múniyo mite Atambatun múmuse kajaaŋan, ni kajeken yooŋ tu doon d'Atambatun dand'awun, abe ni kabaj Búwejet Beenabe bu. 5Bokondu kámusa kámeyi meejake mite hirim hite Atambatun, ni kámeyi yooŋ sembe site Jáyi jeebin ju. 6Bare ifi kawas káyilen kooniin, an at'áyini kasooñu áhiniin keewatanooro, keewas buroŋ booniin, ábuki anokooreenokoor kite kasooña katib Añi ite Atambatun t'ekuruwa i, kéehin ésuk i yéesuwo. 7Múwañiin ifi mimer móhujo mite etiir i, abe doon deewañee du toko nu dubukoor déeñjeriŋ bakate te mo, Atambatun ásoniyane mo. 8Bare múwañiin mu ni mifin mubukoor esisa, n'efatakuñoor barebare, mibajut éñjeriŋ. At'afiyo n'uŋu múwuumee, abe ni mitik músufee. 9Kújakuwe, aruun k'ímaŋie-maŋie ku, naane írihamine ee fe bare, bukuurakuur uni kaanuku aruun bokondu ti bítim beejake bu, bite kafaku ku. 10Atambatun ájubajub. At'afiil burok b'árihine bu, ni naane árimaŋio i. Áriwufoorowufoor kaanuku árimaŋiomaŋi ti naane áriyokunane i bakan k'akino ku, abe ariroŋa yooŋ n'áriyokunaniin. 11B'írimaŋie bu beemo fu huruw fe t'aruun áñiŋkaan kep bija yooŋ tu hunak hiraanu hu, man doon d'ariyakare du fe ni dibaj. 12Írimaŋiit áriyemi biñek. Bare arineefan ti kiŋki kabaj doon d'Atambatun aane du o kawuniiin aŋarkeyi naane káyilenayilen, abe ni kámuñ. 13H'Atambatun abine hu asok Aburaham aano o káhinu bike bija te o, awaatawaat tu huruwu hoone akina humuumo, ábuki abajut an eehaŋo a ayino kawaatu tu huruwu hoone. 14Aanaan: «Nu múniyo, íñje kásoniyani, abe n'íhin kabukoor kúuwe keehooj.» 15Aburaham n'anahan ti kámuñu yooŋ kep, abe n'abin abaj b'Atambatun afiye bu asoko. 16Húŋgowulan af'áyemi ti kawaatu, aŋ'awaat tu huruwu hite ake eehaŋo, abe kawaatu ku ifi kíhin báhamin bu béetib t'etutiin. 17Bakan keeware ku kabaju b'Atambatun aane bu o kawunu bakan koone, Atambatun ámaŋamaŋi bukuuriin but kaanuku b'asoke bu utu buwas hikee. Iŋ'ite ho h'áhamine fu ahaban, n'awaat. 18Náami muroon músuba mondu miyinaatee kanuutan mike meesiiŋanee, abe Atambatun ayinaat biñako te mo. Mo miyaŋganane fu úne kikaw núujok t'eyakar y'Atambatun asoke i úne, úne keeemo ku t'ésamunan yeene. 19T'úne, eyakar yendu eemo fu hilaŋgaar hite buroŋ bite b'úne. Húwoorawoor abe ni hiyan, abe iŋi hiŋaas ti hírido hu heeyooso bija t'Anabe-nabe du t'Atambatun aamo du, 20ti Yesu ágilane du úne eeyooso kaanuku éeyokunan úne. Áyemia asaraha ómbokun hiraanu naane Melkisedek.

will be added

X\