ESUWIF 4

1Atambatun asokasok úne aane úne buyooso t'afaree du kaanuku núubin úuyih toko. Náami makamu bondu b'asoke bu buroŋa ni bisiiŋo bija t'úmiye, arinaŋ toko kikawuun, ake t'aruun atum'abin áhuunan, éeriikein inde hiñaawu. 2Ábuki újamajam Hirim hondu Heetoofe hu, hite kaanuku úne buyooso t'afaree du núubin úuyih toko, naane kéeyemie ku t'eramba i kajame i ho yooŋ. Bare hirim hi kajame hu híñjeriŋutiin doon fe, ábuki káyilenut ho tu ñúwejet ñooniin. 3Úne kéeyilene ku, úne buyooso toko t'úja du kayihu ku. Atambatun asokasok kéeyilenut ku aane: «Ti kayiŋat ku, iwaatawaat eene: "Iti kayooso hikee t'ifaree du kaanuku yéeni keebin keeyih toko!"» Iyu a Atambatun asoke fu, abe bare báayihum bu, afarafare bo huta h'aŋ'abin áwuwan etaam i. 4Iŋi hunak hutoken hu nu kúsuba, bonde busokee fu tike tiŋ ti Míkiñjin mu. Meenaan: «Atambatun áhinahin burok boone fe kunak hutok ni hifeeneŋ. Hutoken hu nu kúsuba, n'ayih.» 5Akina asoke fu kirim k'újame kee: «Iti kayooso t'ifaree du kaanuku yéeni keebin keeyih toko.» 6Étiyar i ti kajamu kite Hirim Heetoofe hu kayooseit toko aŋarkeyi naane kájeŋginut Atambatun. Bakaake bare káyinooni buyooso toko. 7Iŋ'ite ho h'Atambatun asooñe fu áfiiten hunak hite buyooso bu toko, aŋ'aane ho «úmiye». Ariikariiko simit, n'áhamin áŋaasann tu butum bite Dafit kirim konde k'arijame kee memee iŋ'ite hunak hondu. Aanaan: «Úmiye, af'arijam kaaji kite Atambatun, atum'arifeŋk ñúwejet ñoonuun.» 8Múniyo kane Sosuwe aja yéeni ni sifaaf úne ti kaware du kayihu nu múniyo, Atambatun man asooñ áhamin iŋi hike hunak hite kayihu. 9Náami kayihu kibajabaj bija ti bakan kite Atambatun, naane yooŋ koone ku tu hunak hutoken hu nu kúsuba. 10Ábuki an af'ayooso t'Atambatun afaree du kaanuku núubin úuyih toko, o kayihu burok boone naane Atambatun ayihe i yooŋ tu boone bu. 11Náami úñiŋkaan man n'úbin úyooso toko t'úware du kayihu, ake t'úne atum'abin ateñeko kájeŋgin Atambatun naane sifaaf úne t'eramba i, abe n'áyoosaati toko. 12Hirim hite Atambatun huroŋaroŋ jes, abe yooŋ hibajabaj sembe. Hihaŋahaŋ kábura kánokan fe kariyu. Uŋu huyooso bija níbahindaa ti yaan i éfimboore du nu búwejet bu, nu tu súkulinu su sífimboore du ni matoof mu. Iŋi hifeeñal biyinoor beeemo bu tu búwejet bite an, nu doon fe d'ámaŋie káhinu. 13An ayinaat kánuusu Atambatun doon. Doon fe d'áwuwane, aŋ'ajuk do fuufu te do tálaŋ, abe akina u úja fu kakamu buroon b'úhine bu. 14Úbajabaj asaraha ómbokun, o aamo fu Yesu, Añi ite Atambatun. Akanakan bufor bu eeja t'Atambatun. Náami újok alit tip ti káyilen kite k'úne. 15Asaraha ómbokun u úbaje u, káanukiiit man butumo bunooto ti sílaam site s'úne. Aŋeseeŋes kañakiee ti kaahoofoor kánokan naane úne, bare ahoofoorut mayet. 16Náami útof, utum'úkoleyi kalohu Atambatun Áyi u aa áwufoor ésuk i kajaku koone. O kayubiyen úne, abe n'áwufoor úne yooŋ kajaku koone, kaanuku uŋ'úbin úramee kane úmiñjo.

will be added

X\