ESUWIF 2

1Iŋ'ite ho aamo fu úwarawar kahaŋu kajoku alit tip tu múniyo m'újame mu, utum'úbin útowutanee. 2Hirim h'emalaka i kabine hu ne ho kasaan sifaaf úne húwufoorawufoor kaanuku hite nu múniyo. Bakaake kawiinenawiinen ho, kájeŋginut ho yooŋ, abe Atambatun anijanij tu boko ásuf, aliik ti naane kanoŋke i. 3Náami buŋ b'úyino fu kafaku tu kúnuur kondu kéesufe ku, kane arko núuwiinen hirim héeyinie hu úne kafakan, h'Anahaan u Yesu humuumo ajabe hu asok? Keejamo ku ti báhamin bu kaanaan úne hite nu múniyo. 4Atambatun n'alitan yooŋ báhamin booniin ti káhinu buroon bánoban beehaŋe ésuk i kikaw, abe n'áhin ésuk i keebaj huruw fe doon du Búwejet Beenabe bu dundu buwun naane hutoofo i. 5Múniyo etaam yeeware i bibin kabaju, yuy'úhamin iye iŋ'ite te yo, émalakaiit k'Atambatun awune fu sembe te yo. 6Ake bare asokasok ti Míkiñjin mu aane: «Atambatun, húŋgowulan átumbe fu áyemi naŋ a̱yak aŋ'a̱yinoor uŋu hoone hu? Akina átumbe fu áyemi naŋ a̱yak aŋ'a̱tofotooro? 7A̱wananowanan kawanan keefiyeit emalaka i keehaŋo. Á̱nikanonikan yooŋ dómbombokun naane áyi, 8abe n'a̱naŋ doon fe tu wuwoto éeyemi aseef u.» Atambatun áhinohin éeyemi aseef ite doon areyi fe, abajut doon d'awase. Bare t'úemo dee, újukoorut buŋ b'aamo fu aseef ite doon fe ariike. 9Újakutanajakutan bare bonde: Yesu awananeewanan kawanan keefiyeit, emalaka i keehaŋo. Ti kajaku kite Atambatun, n'aket bija tu kúŋgowulan ku fe. Bare hahiye uŋ'újuk kaanuku ánikanee dómbokun naane áyi iŋi sílaam s'ajuke su t'eket yeene. 10Atambatun áwuwanawuwan doon areyi fe, abe n'ákini do yooŋ. Ámaŋamaŋi bakan keehooje kéeyemi bakañio, keebin keemaat ti kániku koone. Makamu Yesu ajukajuk sílaam, Atambatun n'áhino éeyemi ágila eereeŋe kágilan bakan, éeyini káfeŋginiin bítim bite kafaku ku. 11Yesu aa akuuran kúŋgowulan ku wuhoofoor wooniin, ni bakan keekuuranee ku, kareyi fe Faafiin afeeneŋ. Iŋ'ite ho hi Yesu áfuñaariit fu karuwiiin bakat'o ni bákaniino. 12Múniyo aanaan: «Atambatun, íñje kasoku bakan kúuwe fe awe a̱amo fu aañ, íñje kasokoroori tu buhooŋiiin.» 13N'asooñ yooŋ aane: «Hikawam kayaŋgu piŋ t'awe.» Abe n'áwutiyen aane: «Íñj'ende ni bakan k'Atambatun awunam ku.» 14Náami makamu bokondu bakan keebaje kihaay ni halan, akina yooŋ n'abin éeyemi húŋgowulan naane boko. Áhinahin iyu kaanuku man t'eket yeene n'ábuj sembe site Setani éeyekie u sembe site kayoolu bakan. 15Iyu a arame fu bakan kéeyemie ku naane búsukateen tu buroŋ booniin bireyi fe aŋarkeyi naane kákolakoleyi yéeni eket i. 16Múniyo émalakaiit k'abine fu káyokunan ku; aaa, bakañi Aburaham k'af'abin káyokunan ku. 17Iŋ'ite ho h'aware fu kanokoor ni bakano tu doon areyi fe, kaanuku eebin éeyemi asaraha ómbokun u, éemeyie kayubiyen an, abe n'ájub tu burok boone hágila Atambatun. Iyu a áyinie fu kásiku buroŋ boone eesarah kaanuku man wuhoofoor wute ésuk i nu wuboŋketee. 18Yesu humuumo aŋeseeŋes kañaku ti kaahoofoor, abe ajukajuk yooŋ sílaam. Náami áyinooni káyokunan bakan keeŋesee kañakiee ti kaahoofoor.

will be added

X\