ESUWIF 13

1Árimaŋioori ko kireyi fe naane baatiaay, aruun bakan kite Atambatun. 2Atum'arifiil kaanuku ariwarawar kajoku áwariee emoosoora i kiŋki kawanan t'aruun. Bakaake káhinahin iyu, ni kahaŋ kawanan tu boko emalaka ti kámeyiit. 3Áribaŋino keeemo ku tu bukulu bu, anokoor naane aruun nu boko ariemo fii te bo. Áribaŋino yooŋ kéehihinooree ku, anokoor naane arijukajuk sílaam naane boko. 4Huruw fe aja áhin nu múniyo ti biseño bu: ániine u araan t'anaare u, anaare u yooŋ n'araan t'ániine u. Ábuki Atambatun kajoonan kiŋki kaŋot ti kaseñoorut, ni kiŋki kaŋot ni bakan ki kaseñeit. 5Atum'árisik kikawuun arinaŋ ti sírirem. Kikawuun kutoof kep tu doon d'aribaje du, ábuki Atambatun aanaan: «It'iwasuun hikee, it'ífiitenuun yooŋ.» 6Náami huruw fe t'úne áyinooni kasoku ni hikaw heeyaŋge aŋ'aane: «Atemit, o af'áyokunanam, it'íkoleyi doon fe. Naŋ n'ake áyinie t'íñje?» 7Áribaŋino égila yeenuun keesokuun ku hirim hite Atambatun. Ariyinoor buŋ bu buroŋ booniin búmuje fe, abe n'arineefan ti káyilen kooniin. 8Yesu Kiris afeeneŋ u hukan, n'úmiye, bija yooŋ kuwaatu fe. 9Atum'ariwas an eebuutuun ni maliikenar mánoman, meewayee ni m'ariliikenee mu. Ajakeejak suhol site s'úne ni sibaj sembe séenuutina ti kajaku k'Atambatun kaŋk'áwufoor úne. Sembe sondu súnuutinoot ti kájeŋgin kite buluwa beesoke bu tu buroon b'an awarut kateŋu. Ábuki buluwa bondu bibajut éñjeriŋ bija ti kiŋki kájeŋgin bo. 10Esuwif i kiŋki káhin wusarah wu t'atant u kawarut kateŋu tu doon deesarahee t'ataabul ite úne. 11Asaraha ómbokun u aŋ'áhin wusarah t'Anabe-nabe du bija ti kaboŋket kite wuhoofoor wu. Aŋ'aja toko ni halan hite sunuk, bare sini site sunuk sondu uŋu súsufee tíyaŋ hikinu hu. 12Iŋ'ite ho hi Yesu yooŋ akete fu tíyaŋ hikinu hu, kaanuku eekuuran ésuk i ni halan hoone. 13Náami úja úŋaaboo tíyaŋ hikinu hu, núulafatinee naane akina. 14Ábuki úbajut t'etaam ye hikinu hite hiraanu. Hikinu heeware hu bibin h'úŋes fu. 15Ko kireyi fe, úhin kaasarah kite kasokoroor Atambatun úŋaasann ko ti Yesu Kiris; aamo fu úsokoroor huruwu hite Atambatun. 16Atum'aŋ'arifiil káhinu kite meejake mu, abe n'aŋ'áriyokunanoor yooŋ, ábuki wusarah naane wondu ufu wutoof Atambatun. 17Árijeŋgin égila yeenuun, abe n'aŋ'arijam tu boko. Boko ifi kajukar siyaan soonuun, ábuki Atambatun kákandijeniin naŋ ni karoke fu. Af'árijeŋginiin, boko káhinu burok booniin ni katoofu kómbokun. Afut'árijeŋginiin, n'iŋi káhin bo ni kaseetu, abe man arijuk toko mayet éñjeriŋ. 18Arilaw bija t'uni. Bukuurakuur uni kaanuku ñúwejet ñite ñ'uni ñukuurakuur, abe írimaŋamaŋi káhinu ko kireyi fe meejake. 19Bonde b'ihaŋuun fu kalawu fe: waasuun, arilaw man Atambatun n'áhin íisooñin t'aruun ahilee. 20Atambatun aa awun káasuumaay ku, abe n'aritan Anahaan ite úne Yesu t'eket i, aja awunuun sembe aŋ'aribin árihin meejake mu, man n'áriyini káhinu b'ámaŋie bu. Aja áhin t'úne burok beetoofo bu tu huruwu hite Yesu Kiris, eeemo u ahaawa ómbokun ite síkarniina su. Halan hite kaasarah koone híkinineŋe fu kaajamoor kéehabanaariit ku ni kisiiŋanee t'etut Atambatun nu kúŋgowulan ku. Yesu Kiris aja ákini kániku ku hiraanu! Amiin. 22Kújakuwe, íñj'endu ti káwasiyanuun bonde: arijamatan jak kirim konde kite kayaŋgananuun kikaw k'íkiñjinuun kee t'eleetar yende yeekambut yee. 23Íñj'endu ti kasokuuun kaanuku ati úne Timote ánuutino t'ekulu i. Af'asoŋk áreeŋin, n'iŋ'íriboorin ne o iriibin irijukuun. 24Arisaaf égila yeenuun kareyi fe, ni bakan k'Atambatun akino ku yooŋ fe. Bakate ku Itali kéeyilene ku kasaafuun. 25Atambatun aja ásoniyanuun arireyi fe.

will be added

X\