ESUWIF 10

1Eluwa yite Moyis, yo ésamunan barebare yite buroon beejake beeware bu bibin, bare étumbut éyemi humuum hite te yo buroon bondu. Iŋ'ite ho aamo fu eyinaat kakuuran kiŋki kaŋes kalohu Atambatun emit-mit fe nu wusarah wu wowo wéehabanaariit wu. 2Kane éyini kakuuran ésuk i, bare afiyee naane wusarah wu wuraanee i káhinu, ábuki kiŋki káhin wo n'iŋi kakuuranee hifeeneŋ hiraanu, abe man iŋki kayinoor mayet wuhoofoor wooniin. 3Bare wusarah wondu ufu wúbaŋinan ésuk i wuhoofoor wooniin emit-mit fe. 4Ábuki halan hite kúyond ku ni hite kíjigen ku hiyinaat hikee-kee kanuutan wuhoofoor wu. 5Iŋ'ite ho aamo fu hi Kiris áyemie hu ti bibin bu t'etaam ye, n'aane Atambatun: «A̱ŋesut man an n'asarahi enuk, a̱ŋesut yooŋ man an n'awuni dike doon, bare á̱hinamhin iibaj eni. 6Hikawi hútoofaariit kane sunuk súsufee bija t'awe, ni kane wusarah wu yooŋ wúhinee bija ti kaboŋket kite wuhoofoor wu. 7N'áwutiyen aane: "Atambatun, íñj'endu; ibinabin káhinu b'á̱maŋie bu, naane busokee i t'íñje ti kaawiit kite Eluwa i."» 8Kiris ajabajaba aano: «A̱ŋesut man an n'asarahi enuk, a̱ŋesut man an n'awuni dike doon, a̱ŋesut man sunuk nu súsufee bija t'awe, a̱ŋesut yooŋ man wusarah nu wúhinee bija ti kaboŋket kite wuhoofoor wu. Wusarah wondu wútoofaariiti» (abe bare wúhineehin aliik naane t'Eluwa i esoke du). 9Ahaban, n'áwutiyen aane: «Atambatun, íñj'ende, ibinabin káhinu b'á̱maŋie bu.» Náami Kiris awanana wusarah wútiyar wu fe, koone ku keesiiŋo. 10Makamu Yesu Kiris áhina ahaban b'Atambatun ámaŋie bu, kaasarah k'áhine ku kite eni yeene, kifeeneŋ ku taŋ abe yooŋ kiraanu, kukuurana úne tu wuhoofoor wu. 11Asaraha-saraha fe t'Esuwif i aŋ'asiiŋo húnakonak fe éehin burok boone. Aŋ'afand káhinu wusarah wu wowo, abe yooŋ bare wuyinaat hikee-kee kanuutan wuhoofoor wute ésuk i. 12Kiris bare áhinahin kaasarah kifeeneŋ hiraanu bija tu wuhoofoor wu, abe n'ariiko inde baatos Atambatun. 13Hahiyu, ondu ti kanahan kaanuku Atambatun eekalo enatoora yeene tuus, akina éeyemi áyi u. 14Náami ni kaasarah kifeeneŋ taŋ, akuurana hiraanu bakan kéekajinee ku bija t'Atambatun. 15Búwejet Beenabe bu busokasok úne yooŋ kaanuku bondu bite nu múniyo. Bijabajaba beene: 16«Atemit aane: kaajamoor konde k'ija fu kajamoor nu boko kane kunak kondu kunuut: íñje kanaŋu buluwa búuma tu ñúwejet ñooniin, íñje kakiñju bo ti siheliin.» 17Abe n'áwutiyen aane: «It'iŋk'íbaŋino wuhoofoor wooniin, nu wutin wooniin.» 18Wuhoofoor wu ufu wuboŋketee, kaasarah yooŋ it'iŋki kisawulee kite kanuutan wo. 19Náami kújakuwe, makamu Yesu ásikasik halan hoone eesarah, úbaja hahiyu bítim bite buyooso t'Anabe-nabe du t'úkoleyiit. 20Áfeŋginafeŋgin úne bítim bondu bíyeni bu abe beeroŋe jes ti hírido hu, aamo fu eni yeene. 21Úbaja asaraha ómbokun eeemo u hikaw hu t'enuuf ite Atambatun. 22Náami úloh Atambatun nu suhol séejube, kikaw úne yooŋ kiyaŋg piŋ núuyilen, ábuki halan hite Kiris hukuuranakuuran suhol site s'úne ti biyinoor bánoban beejakut, abe sini site s'úne siñaweeñaw yooŋ nu móhujo meekuure. 23Újok alitee t'eyakar i yuy'úwaare iye, ábuki úmoomi kaanuku Atambatun káhinu b'asoke bu. 24Úyinoor naane úyino i kawunoor sihel kaanuku man n'úhaŋ kámaŋioori, abe n'uŋ'úhinoor yooŋ meejake mu. 25Bakaake kafuna iŋkut kaja kéefimboor tand'afeeneŋ keelaw. Utum'úliikool nu boko. Bare úhaŋ kayaŋgananoor kikaw, ábuki arijuka kaanuku hunak h'Anahaan u ábatikein hu te ho hihaŋa kalohu. 26Uf'únoŋk uŋ'úhoofoor, úne káaheekin ku núumeyi múniyo mu, kike kaasarah kuroŋut kabaju kéeyinie kanuutan wuhoofoor wu. 27Beeyak bu kaŋeñen úne beemo fu biriiko núunahan n'ekoloowe yómbokun beeware bu kabaju; aamo fu hunak h'Atambatun aja hu kajoonan enatoora yeene ti sineemak sómbombokun su seeja su kásufiiin. 28An af'atin t'Eluwa yite Moyis, abe bákasuba man yooŋ bákahaaji ni kaseede kaane kajukojuk, an ondu ite kayooliee, abe abajut kayubiyen. 29Náami arijuker t'an eehuufe Añi ite Atambatun: an ondu ajokut doon fe halan heekuurano hu, hite kaajamoor k'Atambatun asiiŋane ku, abe aŋ'álafatin Búwejet Beenabe bu bumbu búwufoor úne kajaku kite Atambatun. Ti kaayinoor koonuun, at'anijee fíya te o ahaŋ diyu? 30Ábuki úmoomi an eeene u: «Íñje ija fu kanukan ku, íñje yooŋ ija fu kabatikan huruw fe beejakut b'aroke bu.» Abe n'asooñ aane: «Íñje kajoonan bakan kúuma, íñje Atemit.» 31Atambatun eeemo u buroŋ af'ajok an kilib, ákolinanieekolinani! 32Áribaŋino beebajuun bu hítiyar hu, hu múniyo mite Atambatun mijaaŋanuun hu. Arijukajuk kóŋkeyin sílaam sómbombokun, bare arijokajok alitee. 33Aŋarko n'árilafatinee, abe n'árihihinooree tu buhooŋu ésuk i, aŋarko n'árisiiŋoorein ni kéelaame ku naane aruun. 34Sílaam soonuun sifeeneŋ su ni bakan keekulee ku iŋ'ite hu Yesu. Hihi karam yooŋ ebaj yeenuun, kikawuun uŋu kutoof, ábuki árimoomi kaanuku ariyakarayakar t'eke yeehaŋe yendu, abe et'ehabano hikee. 35Náami eyakar yeenuun etum'ébujo, ábuki yo eja fu kákinineŋ n'aribaj hisiibanu hómbokun. 36Kámuñu k'arisawulee fu, man n'árihin b'Atambatun ámaŋie bu, arihaban, n'aribaj doon d'aane du o kawunu úne. 37Múniyo Míkiñjin mu meenaan: «Aroŋee diŋgilis, diŋgiŋgilis kep, an eeware u bibin n'aŋ'abin, abe bibin boone bikambut. 38Atambatun aane: An éejube t'íñje, buroŋ boone káyemi bite káyilen. Bare af'añako, hikawam man hutoof te o.» 39Úne únooto ni kiŋki kañako, abe n'iŋi kátowuto hiraanu. Úbajabaj káyilen, abe úne bokondu ti bítim bite kafaku ku.

will be added

X\