GALASI 6

1Kújakuwe, an af'ajokee ti káhinu bike beejakut, arijoŋoorano aruun kaŋk'árijeŋgin Búwejet bite Atambatun. Abe bare n'arisaaho te o. Bare arinaŋ kikawuun atum'aribin ariney yooŋ ti kaahoofoor. 2Áriyokunanoor ti bisejo bite meeniŋe moonuun. Af'árihin iyu, n'aŋ'árijeŋgin eluwa yite Kiris. 3An af'ayinoor ti hikawo n'aane akina an ómbokun, abe bare anooto doon fe, an ondu abuuta hikawo. 4Huruw fe ajondoman ti manijar moone. Af'ajuk toko bike bite busokorooro, ajuk bo te o unoono, atum'aŋes kaliiku t'ake. 5Ábuki huruw fe b'áhine bu, hikawo. 6An i kaamo ti kaliiken Hirim Heetoofe hu, awarawar káruboor buroon fe beejake n'an eeemo u ti kaliiken koone. 7Atum'aribuut kikawuun: Atambatun ásuwaariitee. Huruw fe káhotukan doon d'awañe du. 8An af'awañ wúfaŋi woone weejakut wu weetoofo wu barebare, wo káhinio éehotukan eket i. Bare an n'afin awañ beetoofe bu Búwejet Beenabe bu, bo káhinio éehotukan buroŋ béehabanaariit bu. 9Utum'úene úlaama ti káhinu kite meejake mu, ábuki uf'úñiŋkaan, af'areeŋee kep, úne káhotukan. 10Náami kóyin k'úbaje bítim kep, úhin meejake bija t'ésuk i ereyi fe, áhaŋum ti kéeyilene ku naane úne. 11Arijuk hahiyu míkiñjin méekunde mee: íñje inoŋke fu iikiñj iye n'emoŋiam. 12Kiŋki katiŋguun ii kaane ariwarawar kateyi karam, kámaŋamaŋi bujukano ésuk i tu buroon bite kúŋgowulan. Bondu bimbi káhin ii, kaanuku taŋ itim kabin káhihinooree naane kiŋki kawaare eket ite Kiris t'ekuruwa i. 13Keeteye ku karam boko kumuumiin kájeŋginaariit Eluwa yite Moyis ereyi. Kámaŋamaŋi aritey karam kaanuku iŋi kabin kamak kaane boko kákinineŋe fu n'aritey karam. 14Íñje bare, ekuruwa yite Anahaan ite úne Yesu Kiris taŋ y'ija fu kamaku. Eket yeene t'ekuruwa i ékinineŋe fu n'ijok buroon bite aduna i naane beekete, bo yooŋ nu bujokam naane an eekete. 15Kateyi karam man yooŋ kateyaate karam, bondu bibajut éñjeriŋ; beeemo bu toko beemo fu Atambatun awun úne buroŋ bíyeni. 16Kiŋki kajok fe buroŋ bondu b'isokuun bu, Atambatun aja awuniin káasuumaay, abe n'ayubiyeniin, boko ni bakaaku yooŋ k'akino ku fe. 17Hahiyu an atum'aŋk'áhinam sílaam. Ábuki kimilenu keeemo ku t'eniam kúwufoorawufoor kaanuku íñje an ite Yesu. 18Kújakuwe, Anahaan ite úne Yesu Kiris aja ásoniyanuun arireyi fe! Amiin.

will be added

X\