GALASI 5

1Kiris aramaram úne kaanuku utum'uŋk'úyemi búsukateen bite Eluwa yite Esuwif i. Náami arijok alitee, atum'aŋk'arisooñ áriyemi búsukateen. 2Íñje Pool eenuun i: af'árisik kikawuun arinaŋ ti kateyi karam kaanuku man n'ariloh Atambatun, Kiris man aŋk'abaj t'aruun éñjeriŋ. 3Abe iisooñ isok bo: an fe éesike hikawo anaŋ ti kateyi karam, awarawar káhinu b'Eluwa yite Moyis esoke bu fe-fe-fe. 4Aruun keeŋes ku kaanuku man Atambatun n'aane árijubajub iŋi naane árijeŋgine i Eluwa yite Moyis, ariwasoora ni Kiris, kajaku kite Atambatun n'áruuniit. 5Uni bare, iriyakarayakar kaanuku Atambatun kaanu írijubajub aŋarkeyi naane íriyilenayilen. Bondu b'iriemo fu ti kanahan ku ti sembe site Búwejet Beenabe bu. 6Ábuki uf'úhin t'afeeneŋ ni Yesu Kiris, kateyi karam man yooŋ kateyaate karam, bondu fe bibajut éñjeriŋ. Beebaje bu éñjeriŋ beemo fu káyilen ku kiŋki kíhin úne núumaŋioori. 7Arijaja yéeni áwari fe! Aañ me áhinuun fu ariiraan kájeŋgin kite múniyo mu? 8Bi katiŋguun bu te bo, t'Átambatuniit tu búnuutina, akina eeruwuun u. 9Ésuk i eŋ'eene: «Asaan afeeneŋ af'ábuj bihek.» 10Bare Anahaan u áhinahin hikawam heeyaŋg t'aruun. Bukuuramkuur kaanuku at'ariyinoor beewayee nu búuma bu. Bare an u aa ábuj ii siheluun, are buŋ m'are, Atambatun kaniju te o. 11Kújakuwe, arko múniyo iroŋa ti kawaare ésuk i eeniin kawarawar kateyi karam, n'iroŋ fíya ti káhihinooree? Arko fu yéeni múniyo, an man aŋk'átaañian t'íñje ti bimb'iwaare bite eket ite Kiris t'ekuruwa i. 12Bokondu kiŋki kábujuun ii sihel, kaja káhin ahaŋ diyu: kakeekooro! 13Kújakuwe, aruun bare Atambatun aruwuunruw kaanuku atum'aŋk'áriyemi búsukateen. Bare naane aŋkut i áriyemi búsukateen, atum'arikuuso te bo ariinaban wúfaŋi woonuun weejakut wu. Bare árimaŋioori, abe n'aŋ'áriyokunanoor. 14Ábuki suluwa su fe, efeeneŋ yende ékumbaloole fu so; yo yeemo fu: «A̱warawar kámaŋi áwiyi húŋgowulan naane á̱maŋie i hikawi.» 15Bare af'aŋ'aritakoor, abe n'aŋ'arinufanoor, arinaŋ toko kikawuun kaanuku atum'aribin áribujoor. 16Iisokuun bonde: ariwas Búwejet Beenabe bu beejoŋooran buroŋ boonuun. Af'árihin ii, man arinaban wúfaŋi woonuun weejakut wu. 17Ábuki wúfaŋi wute húŋgowulan wuwayawayo nu wute Búwejet Beenabe bu, abe wúfaŋi wute Búwejet Beenabe bu wuwayawayo nu wute húŋgowulan. Wútumbut wuŋaaŋ kajamoor, iŋ'ite ho h'áriyiniaariit fu káhinu b'árimaŋie bu. 18Bare arko Búwejet Beenabe bu ufu bujoŋooranuun, n'aŋ'áami Eluwa yite Moyis ékiniituun. 19Úmoomi naŋ nu wúfaŋi weejakut wu ufu wúsikin ésuk i: huŋotu hu ni bakan ki kaseñeit, kakuuraate ku, bufurukato bu, 20kájeŋgin kite ñúwisenum ñu, mayaaf mu, kahuufoor ku, síheñjeŋoor su, bíhiñanoor bu, kayiŋatoor ku, kabatikanoor ku, káwaajinoor ku, 21bimero buroon bite bakan, éwusan i, buñoofo beehahe bu, ni bike buroon yooŋ beehooje naane bondu. Iisooñ íyeegaluun naane íyeegaluun i bo: kiŋki kanij iyu iti kamaat ti Jáyi jite Atambatun. 22Bare doon du Búwejet Beenabe bu dundu dubuk tu buroŋ bite b'úne deemo fu: kámaŋioori ku, ni katoofu ku, ni káasuumaay ku, ni kámuñu ku, ni kajaku ku, ni káyokunan kite bakaaku, ni káyemi an ite bifeeneŋ, 23ni káneeni ku, nu bújokumooro bu. Eluwa yite Moyis eteñekeit buroon naane bondu! 24Bakan ki Yesu Kiris akino ku kayoolayool t'ekuruwa i wúfaŋi wooniin weejakut wu. 25Makamu Búwejet Beenabe bu buwune fu úne buroŋ bu, úwas bo beejoŋooran buroŋ bite b'úne. 26Utum'úyitooro, utum'uŋ'úlob, utum'uŋ'úhiñanoor yooŋ.

will be added

X\