GALASI 4

1B'isoke bu beemo fu bonde: an eeware bibin kaŋeñen n'ebaj ite faafo, abe bare náami aroŋa añi, awayeit tiŋ fe n'ásukateen. Naane aamo i akina aware bibin kákini ebaj i, 2awarawar kajamu ti bakan keeemo ku ti kajukar koone, akina n'ebaj yeene, ayak abin áami simit si faafo asoke su sireeŋa. 3Úne yooŋ mo mifeeneŋ mu: h'úyemie hu naane biñi, úmoomi búsukateen bite ñúwejet ñite sembe su ñeeemo ñu t'etaam ye. 4Bare h'aamo hu hunak h'Atambatun ajoke hu hireeŋa, n'áboñin Añio, anaare éeyihinoo. N'ákuumanee t'Eluwa yite Moyis 5kaanuku eebin eeram bakan k'Eluwa yendu ékinie ku, abe n'áhin úne núuyemi bakañi Atambatun. 6Béewufoore bu kaanuku nu múniyo aruun bakañi Atambatun, beemo fu áboñinoboñin tu suhol site s'úne Búwejet bite Añi oone. Búwejet bondu iŋi bíhin úne núutaŋk úene: «Aba! Faafa!» 7Náami ariroŋut búsukateen, hahiyu aruun bakañio. Abe makamu aruun bakañio, Atambatun kawunuuun ti biŋeñen b'anaŋe bu bija ti bakañio. 8Hítiyar hu, t'árimeyioorut Atambatun, aruun búsukateen yéeni bite buroon beenooto etambatun ite nu múniyo. 9Bare hahiye naane árimeyie i Atambatun, man yooŋ iwarawar kaanu Atambatun ámeyiuun fu, buŋ b'arisooñe fu ariweteko iyu áriijeŋgin ñúwejet ñeebajut sembe, abe yooŋ ñibajut éñjeriŋ? Butum árimaŋamaŋi kasooñu áriyemi búsukateen bite te ño? 10Bare fu aŋ'ariŋes katoofu Atambatun tu kunak k'arihaŋe kajoku kite bifeet bu, ni kike kiim, ni kiim kite burok búmanuma, ni sike simit! 11Íkolakoleyi atum'áyemi íñje ílaame t'aruun fuufu. 12Kújakuwe, inuutananuutan hikawam t'Eluwa i íiyemi naane aruun keenooto ku Esuwif. Hahiyu íñj'endu ti káwasiyanuun, áriyemi naane íñje. Aritinut t'íñje hikee-kee. 13Árimoomi kaanuku hítiyar hu dók h'isokuun hu Hirim Heetoofe hu, kásomut kúuma kuwunam fu bítim bondu. 14Árinooni yéeni kahuufiam, man yooŋ n'áritiñjam iŋ'ite kásomut kúuma, bare árihinut bo. Arijokamjok áwariee naane amalaka ite Atambatun, man yooŋ naane Yesu Kiris humuumo. 15Kikawuun kutoofatoof faa kóŋkeyin! Náami naŋ nusooñe fu nibajuun? Bukuuramkuur bare kaanuku hítiyar hu, kane bíyini yéeni kabaju, aruun kanuutan ñíkinuun ariisaanam! 16Butum hahiyu íyemia anatoora oonuun aŋarkeyi naane isokuunsok múniyo mu? 17Bakan kondu kiŋki kabuutuun ii iŋi kakototooruun, bare beeemo bu ti kikawiin bijakut. Bi kaŋes bu beemo fu núuwasoor íñje n'aruun, áriisiiŋoorein nu boko. 18Kakototoor an ajakajak kane kíhinee bija ti meejake, abe ko kireyi fe, káanukiiit kane íyemi t'aruun barebare. 19Kúñuumo, t'eemo dee íñj'endu iŋki ti káseñji kómbokun uŋu hoonuun hu, naane anaare eeemo ti bíyihino. Káseñji kondu kibaa t'íñje ayak abin áami yooŋ arinokoora wees ni Kiris. 20Ti kámaŋi kúuma, bare yéeni íñj'endu t'aruun hahiye. N'iŋ'íyini káhamin n'aruun awayee, ábuki áritumba arijahalam! 21Aruun k'Eluwa yite Moyis ékinie ku, arisokam fee man arijokajok naŋ n'esoke fu. 22Míkiñjin mu meenaan Aburaham abajabaj biñi bákasuba: ake t'anaare ásukateen u ii kaane Agaar, aau t'anaare eenooto u ásukateen ii kaane Saara. 23A áyekie u t'ásukateen u abukeebuk naane kúŋgowulan ku fe ii kabukee, bare a áyekie u t'eenooto u ásukateen n'abukee aŋarkeyi naane Atambatun afiye asok bo faafo. 24Bondu búwufoorawufoor úne bike: haare hondu kámoomi naane wujamoor wúsuba. Kítiyar ku (keeemo ku Agaar) kúwufoorawufoor kaajamoor k'Atambatun áhine ku nu Moyis ti hirij hihi kaane Sinayi. Biñi bite kaajamoor kondu kabukeebuk búsukateen. 25Abe hirij hondu hite hu Sinayi heeemo hu Arabi, heemo fu naane Serusalem yite i hahiye, yeeemo i tu húsukateenaate hu, yo ni bakan keekine ku bo fe. 26Bare kaajamoor kúsooboriyan ku keemo fu Serusalem yite i t'etiir. Enooto tu húsukateenaate, abe yo eemo fu íñaay úne. 27Múniyo Míkiñjin mu meenaan: «Awe anaare u éemeyiit u kaharat, hikawi hutoof! A̱reŋken iŋi katoofan, awe éemeyiit u káseñji keeemo ku ti bíyihino! Ábuki biñi bite anaare eehooree u kahaŋu kahooju bakate eeemo u n'áyino.» 28Kújakuwe, aruun bare biñi keebukee naane t'Atambatun asoke du, naane Isak. 29Kóŋkeyin, añi u eebukee u naane kúŋgowulan ku aŋ'áhihinoor aau eebukee u naane tu Búwejet bite Atambatun bifiye du busok. Iyu yooŋ i bibaje fu hahiye. 30Naŋ kereŋ ni Míkiñjin mu musoke fu? Meenaan: «Á̱kutoor anaare ásukateen u n'añio, ábuki añi ite ásukateen u awarut kabaju ti biŋeñen bite faafo. Aaa, añi ite anaare eenooto u ásukateen aja fu kásiku bo.» 31Náami kújakuwe, únooto biñi bite anaare eeemo u ásukateen, úne bakañi kite anaare eenooto u ásukateen.

will be added

X\