GALASI 2

1Abaj simit sumoŋu ni sibaakiir, n'ibatuko Serusalem íñje ni Barnabas. Irijaja yooŋ ni Tit. 2Ijaja bo aŋarkeyi naane Atambatun afeeñafeeñ t'íñje eeenam iwarawar bija bo. N'irijukoor ni sifaaf site kéeyilene ku job, abe n'íwufooriin Hirim Heetoofe hu hih'iwaare keenooto ku Esuwif, ábuki ímaŋiit kaanuku t'áami burok b'iroke bu, man yooŋ b'ija bu karoku ni bíyemi bite fuufu. 3Tit i iririboore u eeemo u Agerek, kálaamanuto yooŋ kaanuku man n'atey karam. 4Abajeebaj ejuusa kéenuusee kéeŋaabeina uni, kaanuku keejuk naane iriwaayene i ariike, aŋarkeyi naane írihinahin t'afeeneŋ ni Yesu Kiris. Kámaŋamaŋi káhinu uni íriiyemi búsukateen bite Eluwa yite Esuwif i. 5Bare abinut arko hikee-kee n'iriwasiin kéehin bondu, kaanuku múniyo mite Hirim Heetoofe hu ni miriiko iyu bija t'aruun. 6Keehaŋe ku kájeŋginee ti kéeyilene ku (naane káyemie i fe butumam bunooto toko, ábuki t'Atambatun ésuk i fe erare), bokondu káwutiyenut bike ti b'isoke bu. 7Aaa, kajukajuk kaanuku Atambatun aboñamboñ kawaare keenooto ku Esuwif Hirim Heetoofe hu, naane aboñe i yooŋ Piyeer eewaare ho Esuwif i. 8Ábuki naane áhine i Piyeer éeyemi apotor oone t'Esuwif i, iyu yooŋ a áhinam fu íiyemi apotor oone ti keenooto ku Esuwif. 9Saak, Piyeer, ni Saaŋ ki kéeyilene ku kajoke ku naane eseef yeeniin, kajukajuk kaanuku Atambatun asejanam fu burok beejake bondu. Náami keesaan uni sumoŋu, íñje ni Barnabas, t'áami hahiyu kajoka ti bite b'uni. N'irijamoor kaanuku uni bija ti keenooto ku Esuwif, boko ni kaja t'Esuwif i. 10Bi kalawe bu uni kep beemo fu itim'irifiil keebajut ku. Abe iŋ'ifiy íhabanein ti káhinu kite te bo. 11Bare hi Piyeer abine hu Antiyoos, ijoŋoorajoŋoor ne o íirahan te o, ábuki áhinut áwariee. 12Hítiyar hu, aŋ'añoofo t'afeeneŋ ni keenooto ku Esuwif kéeyilene ku. Bare hi bakaake t'Esuwif i kéeyilene ku kéeyemie ku ni Saak káreeŋina hu, n'atey keenooto ku Esuwif, aŋkut añoofo nu boko t'afeeneŋ. Áhinahin bondu aŋarkeyi naane ákolakoleyi Esuwif i keebine ku, ábuki kaanaan keenooto ku Esuwif kéeyilene ku kawarawar katey karam. 13Bakaaku Esuwif kéeyilene ku ni kariboor ne o tu butuuko bondu, Barnabas yooŋ humuumo n'awasiin keeyoosano te bo. 14H'ijuke hu kaanuku kanooto ti káhinu ajoŋooree ariib nu múniyo mite Hirim Heetoofe hu, n'eene Piyeer tu buhooŋu kéeyilene ku fe: «Awe eeemo u Asuwif, á̱hinoorahinooro beebe naane keenooto ku Esuwif, á̱hinut naane Esuwif i. Buŋ b'a̱sooñe fu á̱maŋi katiŋgu keenooto ku Esuwif kéehin naane Esuwif i?» 15Uni keebukee ku Esuwif, irinooto ni keenooto ku Esuwif k'iriene ku boko ehoofoora. 16Bare írimoomi kaanuku húŋgowulan, káanukiiit man áhinahin naane Eluwa yite Moyis esoke i h'Atambatun ajoko fu an éejube. Aaa, káyilen koone ti Yesu Kiris taŋ kíkinineŋe fu Atambatun n'ajoko an éejube. Bondu bíkinineŋe fu uni yooŋ n'íriyilen ti Yesu Kiris, kaanuku man Atambatun n'ajok uni bakan kéejube iŋi naane íriyilene i ti Kiris; atum'ajok uni bakan kéejube aŋarkeyi naane man uni írihine naane t'Eluwa yite Moyis esoke du. Ábuki káhinu ku naane t'Eluwa yite Moyis esoke du kíkinineŋut hikee-kee Atambatun n'ajok ake an éejube. 17Bare af'arko uni Esuwif i, uni bokondu ti kaŋesu kaanuku man Atambatun n'ajok uni bakan kéejube ti Kiris, abe yooŋ náami uni ehoofoora naane keenooto ku Esuwif, aamo fu fíya Kiris af'atiŋg uni ti kaahoofoor? Mayet! 18Ábuki if'eene iisooñ isiiŋan Eluwa y'iheeke íibuj, n'iŋ'íhinooro an éejeŋginut Eluwa i. 19Abe bare t'Eluwa i, íñje naane an eekete, ábuki eroŋut n'ebaj sembe t'íñje. Bondu fe bibajabaj kaanuku man n'íyini karoŋu bija t'Atambatun. Iyooleeyool ni Kiris t'ekuruwa i. 20Náami aŋkut áami íñj'eemo fu tu buroŋ bu, bare Kiris aamo fu tu buroŋ bu t'íñje. Buroŋ bite t'etaam ye b'eemo bee te bo hahiye, íñj'endu te bo ti káyilen ku t'Añi ite Atambatun éemaŋiam u, abe n'ásik síhiinio asaan bija t'íñje. 21It'iteñeko hikee kajaku k'Atambatun áwufoore ku. Ábuki arko Eluwa yite Moyis eja fu kákinineŋ Atambatun n'ajok ésuk i bakan kéejube, náami kame Kiris aketaket fuufu.

will be added

X\