EFEES 6

1Aruun biñi bu, makamu aruun bakan bakate Anahaan u, árijeŋgin sifaafuun ni síñaayuun; bondu bijake fu. 2Eke eluwa eenaan: «Á̱jeŋgin faafi n'íñaayi.» Yo yeemo fu étiyar i tu buluwa bite Atambatun yéewutiyene bike beejake. Eenaan: 3«Man buroŋ búuwe nu búsoniyanee, abe n'a̱riy etaam i.» 4Aruun sifaaf su, atum'aŋ'árihin bakañuuun keeyiŋat. Arijoŋooraniin, abe n'aŋ'aririmiin naane t'Anahaan u ámaŋie du. 5Aruun búsukateen bu, árijeŋgin kéekiniuun ku bakate ku t'etaam ye. Árikoleyiiin, abe n'arijamiin nu suhol seekuure but, naane aa árijeŋgin Kiris. 6Atum'árihin bondu kane káyemiuun ti kajukar barebare, kaanuku man n'aritoofiin. Bare áriñiŋkaan áriihin b'Atambatun ámaŋie bu naane búsukateen bakate Kiris. 7Arirok bija tu boko nu suhol seekuure but, naane bakan keeemo tu burok, káanukiiit bija tu kúŋgowulan ku, bare bija t'Anahaan u. 8Árimoomi kaanuku an fe éehine beejake, Anahaan u kabatikano bo, abajut onde ásukateen, ondu ásukateeniit. 9Aruun kéekinie ku búsukateen bu, arijokiin yooŋ áwariee; atum'aŋ'arinuur tu boko. Árimoomi kaanuku Ámuse afeeneŋ ákiniuun fu aruun nu boko; ondu t'etiir bufor bu, abe te o ésuk i erare. 10Biraanu búuma beemo fu bonde: ariŋes sembe soonuun t'Anahaan u, ni ti sembe soone sómbombokun su. 11Arijok bujuŋko b'Atambatun awunuun bu bireyi fe, kaanuku man n'áriyini bisiiŋo alitee kane Setani aŋesuun kabuutu. 12Ábuki fu újeit étuum nu kúŋgowulan, bare étuum nu ñúwejet ñeejakut ñu ñeeemo ñu t'etiir, ni bakate sembe su, ni siseef su, ni keekino ku sembe su t'etaam ye yeeemo i t'ébaani. 13Iŋ'ite ho aamo fu arijok hahiye bujuŋko bite Atambatun bireyi fe! Af'árihin bondu, hunak hite sílaam su ifi hireeŋ, n'aŋ'áriyini katandarisan t'an eejonduun u. Abe af'árituum bija yooŋ ti biraanu, aruun bisiiŋo jirib. 14Náami arijok alitee: arijok múniyo mu naane aa ariwuuj ñibaŋ ti kikeejuuun. Arijok kajoŋoor ku naane aa arisol kájufa kite hitiik. 15Arifare kawaare kite Hirim Heetoofe hite káasuumaay ku naane aa arisol sikaku. 16Ko kireyi fe, arijok káyilen ku naane aa arijok ebaŋgal; n'eŋ'éyokunanuun ariihok kúsoori kéetife ku kite Batuuk bu. 17Arijok kafaku ku naane aa arisol ékuhe yite hitiik, abe n'arijok Hirim hite Atambatun heeemo hu naane kábura, ku Búwejet Beenabe bu buwunuun. 18Naane biyino i káyemi fe, arilaw Atambatun ko kireyi fe naane Búwejet Beenabe bu biyakuun i káwufoor. Siheluun síniyo, abe n'aŋ'arilaw kep bija ti bakan kite Atambatun kareyi fe. 19Arilaw yooŋ bija t'íñje, man Atambatun n'aŋ'awunam kirim keejoŋoore kane íyemi ti báhamin, hikawam heeyaŋg iŋ'iwaare béenuusee bite Hirim Heetoofe hu. 20Íñje an eeboñee kawaare Hirim honde Heetoofe hu, bija naane eemo ee t'ekulu i fe. Náami arilaw man n'iŋ'iwaare ho ni hikaw heeyaŋge naane iware i bo káhinu. 21Ati úne Tisik, u úmaŋie-maŋie u, abe n'aŋ'áhin burok bite Anahaan u ajoŋoor júl kasokuuun buŋ b'eemo fu beebe fe, man n'árimeyi te naŋ t'eemo fu. 22Iŋ'ite ho h'íboñinuun fu o eebin eesokuun buŋ b'iriemo fu, abe n'ayaŋgananuun yooŋ ñúwejet. 23Atambatun Faaf u, n'Anahaan u Yesu Kiris kaja kawunuuun káasuumaay aruun kéeyilene ku. Ni káhinuun áriimaŋioori, abe ni káwutiyenuun káyilen. 24Atambatun aja ásoniyan bakan ku fe kéemaŋie ku Anahaan ite úne Yesu Kiris kámaŋi kiraanu.

will be added

X\