EFEES 5

1Makamu aruun ariemo fu biñi bu k'Atambatun ámaŋie ku, ariliikool ne o. 2Árimaŋioori ko kireyi fe tu buroŋ boonuun naane Kiris ámaŋie i úne. Ámaŋamaŋi úne, abe n'ásik buroŋ boone eesaan bo bija t'úne naane kaasarah keehunde-hund t'Atambatun. 3Aruun bakan bakate Atambatun. Náami huŋotu hu ni bakan k'ariseñeit, kakuuraate ku, ni bimero bite buroon b'árikiniit, bondu fe áritumbut ariwar bo kajemen. 4Ajakutee yooŋ n'aŋ'arifut báhamin; ariwas yooŋ báhamin béekojie. Ho húkoyie n'arilaw Atambatun ariieno eyeehen. 5Árimeyi bonde jak: kiŋki kaŋot ni bakan ki kaseñeit, ni keekuurut ku iti kabaj húrub ti Jáyi jite Kiris n'Atambatun. Kiŋki kamero buroon bite ésuk i iti kabaj yooŋ húrub, ábuki anokooreenokoor kite bondu bi kahaŋe kajoku Atambatun. 6Kunoŋk naane kondu ifi kíkinineŋ Atambatun n'ayiŋat ti kiŋki kateñeko kájeŋgino. Náami an atum'abuutuun ni báhamin beeñunut. 7Atum'arikol ni bakan naane bokondu. 8Hítiyar hu aruun ébaani; bare hahiye, naane árihine i t'afeeneŋ n'Anahaan u, aruun meejaaŋe. Náami arinoŋk naane bakan bakate meejaaŋe, 9ábuki meejaaŋe mu uŋu mubuk doon fe deejake, ni deejoŋoore, ni dite múniyo. 10Áriñiŋkaan ariiŋes beetoofe bu Anahaan u. 11Atum'arikol nu burok beebajut bu éñjeriŋ, bite kiŋki kanij t'ébaani i, bare arirej bo. 12(Múniyo buroon bimbi kánuuso kéehin, kaanuku yooŋ núusok bo uŋ'útumb úfuño.) 13Abe bare uf'uŋ'úrej bimbi káhin, n'iŋi bíŋaasin ti meejaaŋe mu. 14Múniyo doon déeŋaasina akuur but díyemia meejaaŋe. Iŋ'ite ho hi kaane fu: «Á̱niyo, awe eeemo u t'a̱ŋote, a̱rito t'etut keekete ku, abe Kiris n'aŋ'ajaaŋani.» 15Náami áriwasiyoor jak tu kunoŋk koonuun. Atum'aŋ'arinoŋk naane busoŋ, bare arinoŋk naane kúwesina. 16Af'aribaj bítim bite káhinu meejake kep, atum'ariwas bo beefakuun, ábuki kunak k'úemo kee te ko, meejakut m'ésuk i m'ef'éhin. 17Iŋ'ite ho aamo fu atum'arisoŋoto, bare áriñiŋkaan man n'árinandin buŋ b'Anahaan u ámaŋie fu aŋ'árihin. 18Atum'aŋ'áriwusan, ábuki éwusan aŋ'ábuj an. Bare arihooj bib nu Búwejet Beenabe bu. 19Arihooñ kuhooñu kánokan kite k'Atambatun ariiyaŋgananoor kikaw. Arihooñ Anahaan u suhol soonuun síhabanein. 20Ariene ko kireyi fe Atambatun Faaf u eyeehen tu doon areyi fe, tu huruwu hite Anahaan ite úne Yesu Kiris. 21Árijeŋgin bakanuun, boko yooŋ ni kájeŋginuun iŋi naane arijoke i Kiris nu sumoŋu súsuba. 22Aruun haare hu, árijeŋgin bákayinuun naane árijeŋgine i Anahaan u. 23Ábuki ániine u aamo fu hikaw hite anaare u, naane Kiris aamo i hikaw hite kéeyilene ku. Kiris humuumo aamo fu Afakana ite kéeyilene ku, keeemo ku eni yeene. 24Náami haare hu kaware fu kájeŋgin bákayiniin tu doon areyi fe, naane yooŋ kéeyilene ku kájeŋgine i Kiris. 25Aruun háyine hu, árimaŋi haare hoonuun naane Kiris ámaŋie i kéeyilene ku, abe n'ásik buroŋ boone asaan uŋu hooniin hu. 26Áhinahin bondu kaanuku éekajiniin bija t'Atambatun. Akuuraniinkuuran nu móhujo, ni hirim hu yooŋ. 27Ámaŋamaŋi kaanuku kéeyilene ku ni kabin kasiiŋo hágilao káawariin naane, abe ni kakuur but, doon fe déefuñinanie itim díyemi tu boko. Ámaŋamaŋi káyemi bakan keenabe, keeyinaatee kawatan tu doon. 28Náami naane háyine hu kámaŋie i siniiin, iyu yooŋ i kaware fu kámaŋi haare hooniin. An af'ámaŋi anaar'o, ámaŋamaŋi hikawo. 29Ábuki an ámusut kahuufu enio; aŋ'ákuuman yo, abe n'atofotoor yo naane yooŋ Kiris aa áhin bija ti kéeyilene ku. 30Abe úreyi fe t'enio t'úlooñe fu. 31Míkiñjin mu meenaan: «Iŋ'ite ho h'ániine aja fu kanuutu ti faafo n'íñaayo, eeja keekin n'anaar'o, kéeyemi halan hifeeneŋ taŋ.» 32Bike bómbokun béenuusee bondu ti kirim konde k'isoke kee memee iŋ'ite hu Kiris ni kéeyilene ku. 33Náami hahiyu aruun, huruw fe ámaŋi anaar'o naane ámaŋie i hikawo, abe anaare-naare fe n'ájeŋgin áyino.

will be added

X\